🇮🇳

*Billboard ; Beyoncé leh a album thar an vul*

13th August 2022

Ram hrang hranga record maktaduai 160 vel zet hralh tawhtu Beyoncé chuan kum 2016 hnua a album tihchhuah leh hmasak ber 'Renaissance' chu ram hrang hrang chart-ah a rawn champion pui nghal viau a, Billboard chart lamah pawh ro a relpui mek.

Billboard 200 chart-ah 'Renaissance' hi pakhatna a ni chiang hle a, equivalent album unit 332,000 lai hmu chhuakin a studio album pasarihna hmang hian chart a thunun hneh hle. Beyoncé hian kumin atan record ropui deuh mai rawn siam bawkin, kum 2022 chhunga Billboard 200 chart-a hmeichhe artist rorel thei awmchhun a la ni a, kumin chhunga hmeichhe album tlangzarh zingah chuan a la hlawhtling ber a ni. EAU 332,000 aṭanga 190,000 lai hi album a hralhna aṭanga a hmuh chhuah a ni hial.

US Billboard 200 chart-a pakhatna a nih bakah hian Australia, Belgium, Canada, Denmark, France, Ireland, the Netherlands, New Zealand, Scotland, Sweden, leh United Kingdom chart-ahte pawh pakhatna a ni vek bawk.

'Renaissance' hi Dance, house,discopop leh R&B album niin hla 16 lai a awm a, Billboard Hot 100 chart lamah pawh hla eng emaw zat a lanpui a ni.

ATEEZ, ENHYPEN, $uicideBoy$, Dance Gavin Dance leh Grateful Dead-te pawhin album thar tichhuak ve tho mah se Beyoncé hi chu an tluk zo lo a ni.

Hot 100 lamah pawh...

Beyoncé bawk hian ro relin Break My Soul chu pakhatna a nihpui a, Harry Styles leh Lizzo-te'n hun eng emaw chen chhung ro an rel tawhna chu a rawn titawp ta a ni.

Kar hmasa lama pakhatna Lizzo 'About Damn Time' chu pahnihna a ni thung a, Harry Styles hla hit 'As It Was' chu pathumna a ni bawk.

Kum 40 lai ni ve tawh Beyoncé hi Artist 100 chart lamah pawh pakhatna a ni nghal a, Bad Bunny leh Harry Styles-te chu a hnuaiah an awm thung a ni.

--Beyoncé hi hmeichhe artist zinga solo album tihchhuah hmasak pasarih, Billboard 200 chart topper la nihpui vek thei awmchhun a ni--

*Zofa Lelte 2022 buatsaih dawn ; Lawmman pakhatna Rs Nuai 3*

13th August 2022

Zoram Thar Zofate Lairelna Inpui buatsaih Zofa Lelte zai intihsiak chu kumin hian buatsaih a ni leh dawn a, lawmman pawh a ṭha dawn.

Zofa Lelte hi nikum lamah pawh khan buatsaih tawh niin kumin hian a vawi hnihna atan an buatsaih leh dawn a ni. Organizing committee Zofa Lelte Huaihawttu Lairelna ziaktu lian Lalruatfeli Hlawndo chuan hemi chungchuangah hian nimin khan thuchhuah siamin Zo Hnahthlak a duh apiang tan tel theih a ni ang. Kum 13 chin chunglam an ni thung tur a ni a, milar sa, music video siam tawhte erawh chu an tel thei lo thung a ni.

Pathian hla leh hnam hla (chibing hla ni lo/inpumkhatna lam hawi) sak theih a ni dawn a, September thla chhungin Mizoram chhung district hrang hrangah inelna hi zawhfel hman an tum a, October thla chhungin Mizoram pawn lam chu October-ah zawhfel hman tum bawkin Grand Finale chu November 15-17 hian Vanapa Hall-ah neih a ni ang.

"Zo ṭawng hrang hrang hmangin intihsiakna hi hmachhawn a ni dawn a. Amaherawhchu ṭawng hmanga inthliarna a ni dawn lo a, zai thiam ber thlan chhuah tur a ni ang," tiin thuchhuah an siamah chuan an tarlang.

Contestant tel turte chuan Application/registration an thehlut anga, registration fee hi Rs 100 niin, application form hi Zofa Lelte Instagram account-ah thehluh theihin an chhawp chhuak tawh bawk.

Lawmman hi a ṭha dawn hle mai a - pakhatna dawngtu hian Rs 3,00,000 a hum haw dawn a, pahnihnain Rs 2,00,000, pathumnain Rs 1,00,000 a dawng ang. A inelna tawp thleng (finalist) te chu Rs 10,000 leh certificate pek an ni bawk ang.

*Indian Army-in civilian-army cycling expedition buatsaih*

13th August 2022

Indian Army chuan a ṭum khatna atan Assam-Arunachal Pradesh inkarah civilian-army cycling expedition a buatsaih a, mi 75 an tel.

Assam-a Sonitpur district-a Thakurbaari khuaah Ningani khan expedition-a telte hi vailiam an ni.

He expedition hi Indian Army-a Gajraj Corps buatsaih a ni a, Assam-a Thakurbari khua aṭanga tlan ṭanin, vawiinah an tawpna tur Arunachal Pradesh-a West Kameng district huam chhunga Balemku khua an thleng ang. Expedtion-ah hian Sashastra Seema Bal (SSB), Indo-Tibetan Border Police (ITBP),state pahniha civil administator-te bakah tualchhung mi cyclist eng emaw zat an tel.

An tlanna kawngah hian Misamari, Dhekiajuli, Orang, Rowta, Udalguri, Hatigarh leh Bhairabkunda-te an paltlang dawn a ni. He hun hi civil mite leh sipaite inkara inpawhna leh thawhhona ṭha a awm nan leh, hmeichhiate thuam chakna atana buatsaih a ni.

*Brett Goldstein: Thor 4-a a chan dawn vangin ni khatah pushup vawi 400 a ti ṭhin!*

13th August 2022

'Ted Lasso' star Brett Goldstein chuan 'Thor: Love and Thunder'-a a role atan khan ni khatah pushup vawi 400 a ti ṭhin tih a sawi mauh mai.

Kum 42 mi lemchanthiam, Thor 4-a Hercules lema changa cameo-a inlan hian kar hnih chiah hun a neih thu a sawi bawk a, chumi avang chuan rim takin a thawk ta niin a sawi, Director nen an inbiak ṭuma ni engzat nge hun a la neih a zawh chuan, kar hnih chiah a nih tawh thu a lo hrilh niin a sawi a, chumi avang chuan a theihtawp chhuahin ni khatah pushup vawi 400-te a tih ṭhin tak thu a sawi.

The Playlist-in an kawmnaah hemi chungchang hi sawiin, Roman pathian lema a chan a rin ngai loh thu a sawi bawk a ni.

Brett Goldstein hian comedy series lar 'Ted Lasso'-ah Roy Kent lem a chang a, BBC series lar Doctor Who-ah pawh khan a inlan tawh a ni. A lemchan tawhnaah chuan Ted Lasso series hi a larpui deuh ber a, award chi hrang hrang pasarih lai a dawn phah tawh nghe nghe.

*Global Citizen Festival-ah Metallica leh Mariah Carey*

13th August 2022

Central Park-a September 24-a neih tur Global Citizen New York festival-ah Metallica leh Mariah Carey-te chu headline tur an ni dawn.

Kum tina buatsaih ṭhin, miretheite tana fundraising concert hi kumina an buartsaih tur hi a kum 10-na tur a ni tawh a, Jonas Brothers, Rosalía, Måneskin leh Charlie Puth-te pawh inlan tur zingah an tel. Anni bakah hian Accra, Ghana, meanwhile, Usher, SZA, H.E.R., Stormzy leh zaithiam dang eng emaw zat an inlan dawn a ni.

Global Citizen CEO Hugh Evans chuan Covid vangin mi maktaduai 100 chuang chu rethei takin an awm mek tih leh Ukraine indonain chu chu nasa taka a tihpunlun thu a sawi a ni.

*Science & Environment ; Hmun dang aiin a let liin Arctic a lum chak zawk?*

13th August 2022

Mithiamte chuan tunhnaia zirchianna an neih an tihchhuahah Arctic chu khawvel hmun dang aiin a let liin a lum chak zawk niin an sawi.

Research report tarlang thin wesbsite The Conversation-ah hemi chungchang hi tarlan a ni a, kum 43 liam ta chhung khan khawvel hmun dang aiin Arctic hi a let liin a lum chak zawk niin an tarlang. Industrial Revolution ai khan khawvel hi 1.1 degree celcius-in a lum tawh zawk a, Arctic erawh kum 1980 ai khan 3 degree celcius-in a lum tawh zawk tihna a ni.

Khawvel sik leh sa inthlak danglam chungchangah Arctic hi hmun pawimawh tak a nih avangin hetiang taka a lum chak hian nghawng lian tak a la nei thei dawn a, chuvang chuan hemi chungchang hi ngaih thutak a ṭul hle niin report-ah chuan an tarlang.

Jonathan Bamber University of Bristol-a Physical Geography professor chuan report hi a tichhuak a, khawvel sik leh sa balance taka a kal zelna tura hmun pawimawh tak a nih avangin ngaih thutak a ṭul thu uar takin a ziak a ni.

_ _ _ _ _ _ _ _ v _ _ _ _ _ _ _ _