🇮🇳

*South Korea President-in Samsung hotu a ngaidam*

13th August 2022

South Korea president Yoon Suk-yeol chuan Samsung Elec­tronics vice chairman Jay Y. Lee chu nimin khan a ngaidam tih puangin, justice ministry chuan sumdawng lian hotu chu an ramin economy lama an talbuaina ata chhanchhuak turin an mamawh tih a sawi.

Thamna laa puha thiam loh chan tir, Lee hi thla 18 a tan hnuah parole-in a chhuak tawh a, mahse a thubuaia ngaihdam a nih hian sumdawnna kawngah zau zawkin hma a la chhunzawm leh thei dawn a ni. Khawvela smartphone leh memory-chip siamtu lian ber, Samsung electronic hian investment lian tham tak tak a tih theih leh phah dawn niin analyst-te chuan an sawi a ni.

"South Korea-in economy lamah buaina a tawh mek hneh vat tuma kan beih karah, technology investment leh hna siamtu, economy lama ṭhanna tura pawi­mawh, ngaihdam turte hi uluk takin kan thlang chhuak a ni," tiin Justice Minister Han Dong Hoon chuan a sawi.

Tunlai thiamna leh an bungraw hralh chhuaha thui tak innghat, South Korea hi Asia ram zinga economy lian palina hian thil man sang, demand tlahniam leh sum hmanchhuah tlakhniam vangin harsatna an tawk mek a ni.

Lee chuan President thutlukna siam chu lawmawm a tih thu sawiin, an ram economy chawisang turin theithawp chhuah a, investment tam zawk leh hna tam zawk siam a intiam.

President Yoon hian Lotte Group chairman Shin Dong-bin, thamna lak chungchang avanga kum hnih leh a chanve tang tura hrem pawh a ngaidam bawk. Lotte pawhin an ram buaina chinfel pui tumin a puih tur thu a sawi ve bawk.

*Myanmar thlai thar thawnchhuah USD tld 1.27 in a tlahniam*

13th August 2022

Myanmar-in thlaithar thawn­chhuah aṭanga sum a lakluh chu fiscal year (FY) 2022-2023 a thla hmasa pali chhungin 1.25%, USD tluklehdingawn 1.27-in a tlahniam tih Ministry of Commerce thuchhuah chuan a tarlang.

Southeast Asia ram hian kumin aṭangin fiscal year October-Septem­ber ni ṭhin chu April-March inkarah an thlak a ni. Agricultural product an thawnchhuah aṭanga sum lakluh tla hniam mah se, total export value chu 26.71%, USD tld 5.49-in April 1 leh July 29 inkar khan a ṭhang tih official data chuan a sawi a, hemi chhunga agricultural export chu private sector hmalakna hnuaia thawnchhuah vek a ni tih commerce ministry chuan a sawi bawk.

Myanmar-a agriculture product zingah, buhfai hi an ching uar ber a, foreign market lama an thawnchhuah tam ber zinga mi a ni bawk a ni.

Myanmar Rice Federation tarlan danin, kumin April leh July khan rice leh broken rice thawnchhuah hi ton 7,33,096 a tling.

Mandalay-a buh chingtu Kyaw San Oo chuan kumina buh thawnchhuah chu chhan hrang hrang vanga tlahniam a nih thu sawiin, heng zingah hian finan­cial rule thlak vang te leh buh thar chhuah tlem vang niin a sawi.

Central Bank of Myanmar (CBM) chuan kumin April thla khan, ramchhung mipuite hnenah foreign currency chu an ram pawisa kyat-a thlak vek tura a tih hnuah, he thupek hi an thlahdul leh a ni.

Kumin April 1-July 29 khan, Myanmar-a foreign trade belh­khawm chu USD tld 11.02 niin, heng zinga USD tld 5.52 chu an chawk luhna a ni thung.

*Ukraine nuclear plant kah avangin UN-in demilitarised zone puan rawt*

13th August 2022

Ukraine chhim lama Europe nuclear power plant lian ber, Zaporizhzhia complex chu Ningani khan ṭum nga kah a ni a, radioactive material dahna hmun bul mai pawh kah tel a ni. Hei vang hian UN chuan demilitarised zone puan a rawt nghal.

Nuclear power plant kaptuah hian Ukraine leh Russia chu an inpuh tawn a ni. Russia official chuan an sipaite inthlak hun tur tihbuai tumin Ukraine hian plant hi ṭum hnih an kap niin a puh.

He thil thlen vang hian Ningani vek han UN Security council chuan meeting a nei nghal a, UN secretary general Antonio Guterres chuan ram pahnihte chu plant bulah inbei tawh lo turin a ngen. He plant awmna leh a chhehvel hi inbeihna laka a him theihna turin demilitarised zone puang tura inrema siam vat a ṭul thu a sawi bawk. US pawh he rawtna hi thlawpin, International Atomic Energy Agency (IAEA) chu plant awmna hi tlawh turin a ngen bawk.

February 24-a Russia-in Ukraine a do hnuah, March thla khan Zapo­rizhzhia plant hi Ukraine kut aṭangin a laksak a ni. He plant hi Russia sipaite kuta awmin, Ukraine mi hnathawktuten an enkawl thung. Ukraine president Volodymyr Zelenskyy chuan Russia hnenah he plant hi an kuta pe kir tawh turin a phut a ni.

_ _ _ _ _ _ _ _ v _ _ _ _ _ _ _