🇮🇳

*NF Railways-in ticket nei lo sum chawitir aṭangin Kuminah Rs vbc 35.71 a hmu chhuak tawh*

13th August 2022

Northeast Frontier Railway (NFR) chuan kumin January-July inkar chhungin rel-a ticket nei loa chuangte sum a chawitir aṭangin Rs vaibelchhe 35.71 a hmu chhuak tawh.

January-July chhung hian NFR hian rel-a ticket endik hna hi ṭum 15,213 neiin, ticket neiloa zin mi nuai 4.98 manchhuah an ni. Heng mite hi ticket man zat bakah a hremna sum chawi belh tir an ni bawk a, heng aṭanga sum hmuh chhuah hi Rs vbc 35.71 hi a tling a ni.

Hemi hun chhung vek bungrua book loha phurh case 3,956 chuang a awm bawk a, pawisa an chawitir hi Rs nuai sarih a tling bawk.

Kum hmasa lam hemi hun chhung aiin kumin penalty case hi 439.33% in a tam a, sum chawitir pawh hi 783.46 in a tam zawk bawk a ni.

*Guwahati-ah digital traffic light hman vek tum*

13th August 2022

Assam khawpui, Guwahati-ah August 15 aṭangin khawpui chhunga intersection-ah traffic point-ah mihring duty tawh loin, digital traffic light hman chhoh vek a ni tawh dawn.

Assam police chuan August 15 hian signal point-a traffic police duty chu a tahtawla tihtawp chhoh a tum a ni. A hmasa berah GS Road-a Paltang Bazar leh Khanapara inkara signal point-a duty te chu tihtawp a ni dawn a, digital traffic light leh hi-tech CCTV camera dah a ni ang.

Digital lights hian intersection-a traffic a thunun ang a, CCTV camera hian driver, traffic rules bawhchhiate a lo enfiah dawn bawk a ni. Dan bawhchhiate chu E-challan kaltlangin sum chawitir ṭhin an ni ang.

Tunah hian Guwahati khawpuia digital traffic system hi 21 dah tawh niin, hengte hi August 15 aṭangin hman an ni dawn a ni. Thla thum chhungin khawpui chhungah digial traffic system hi hman vek hman an tum.

*BJP mi leh saten Tripura Congress MLA thar an bei*

13th August 2022

Tripura Pradesh Congress Committee leader leh MLA atana thlan tlin thar, Sudip Roy Barman chu Ningani khan BJP mi leh sa nia sawiten beiin, a lu ah hliam a tuar.

Majlishpur constituency-a Jirania-ah Congress hruaitute chuan motor chu BJP mi leh sa te hian an bei a, motor pahnih pawh a tichhe vek nia sawi a ni.

Tripura Pradesh Youth Congress president Rakhu Das chuan an party hruaitute hi 'Bharat Jodo' rally neih tuma kal an ni a, mahse rally neih hi phalsak an nih loh avangin Agartala lamah an kir leh,an haw kawngah BJP thlawp misualte hian an lo bei niin a sawi.

Das chuan, "Misualte hian thawk leh khatah kan motor hi an rawn bei thut a ni. Police-te chuan force mi leh sa tam zawk chu Independence Day duty tura chhawr an nih vangin kan rally neih tur chu August 15 hnu lama sawn turin min ti a, harsatna siam zui duh lohin kan kalchhuak nghal a ni. Mahse Agartala lama kan haw kawngah BJP thlawptute hian lungin kan motor-te an lo tawng a, kan motor kan tihdin laiin misualte hi rawn tlanchhuakin kan motor-te chu an rawn suasam zui ta a ni," a ti.

Misualten an beihnaah hian Tripura Pradesh Congress Committee Working President Sushanta Chakraborty pawhin a mit bulah hliam a tuar ve bawk.

MLA Sudip Roy Barman hi GBP hospital-a trauma care centre panpui nghal a ni a, A hnuah Tripura Medical College Hapania-a enkawl a ni.

*Police kutah Meghalaya BJP hruaitu awm turin ti*

13th August 2022

Meghalaya-a West Garo Hills district court chuan Ningani khan a farmhouse-a nawhchizawrhna hmun siama puh, state BJP vice president Bernard N Marak chu ni ruk chhung police kuta awm turin a ti.

Hel hruaitu hlui, Marak hi July 29 khan Uttar Pradesh-ah man niin, Meghalaya state-ah hruai kir a ni. A farmhouse dapnaah hian puakthei thil eng emaw zat hmuh tel a nih avangin hemi kaihhnawihah hian thubuai siam belhsak a ni bawk.

Nilaini khan Tura-a judicial court chuan Marak hi ni 14 chhung judicial custody-a awm turin a ti a, mahse hemi zan hian Explosive Substances Act hnuaiah man leh nghal a ni. Court-ah hruai lehin, court chuan police kuta awm turin a ti leh ta a ni. Police-te chuan Marak-a farmhouse an dapnaah gelatine tlawn 35, detonator 100, leh thal te an man tih an sawi.

Garo Hills Autonomous District Council-a elected member, Marak hian tihsual a neih loh thu a sawi thung a, chief minister Conrad K Sangma-a'n politics phuba lak a tumna kawnga a beihna niin, a nunna pawh a derthawng niin a sawi. State BJP pawhin a thusawi hi an thlawp tih an sawi bawk. Mahse Chief Minister chuan Marak-a puhna hi thu dik lo a nih thu a sawi.

_ _ _ _ _ _ _ _ _ v _ _ _ _ _ _ _