🇮🇳
*VANGLAINI - TUALCHHUNG*
*Hripui vangin August-ah mi paruk thi tawh*
13th August 2022
August 11, Ningani khan Mizoramah Covid-19 vei mi 226 hmuh chhuah a ni. Nimin khan hripui vei dam tawh mi 179 chhuahtir an ni a, Covid-19 vanga pakhat a awm belh. August thla chhungin mi paruk an thi tawh.
Ningania Covid-19 positive hmuh thar mi 226-te chu mipa 115 leh hmeichhia 111 an ni a; rapid antigen test hmanga hmuh chhuah vek an ni. Swab sample endik zat 891 aṭanga positivity rate chu 25.36% a ni. August thla chhungin mi 2,126 hmuh chhuah a ni tawh.
Hripui vei enkawl lai Vanlalchiangi (74) Lunglei Rahsi Veng chu August 11, Ningani zan dar 7 khan Lunglei DCHC-ah a thi. Amah hi mahnia swab sample endik a nih vangin Covid-19 a kai ní hriat theih a ni rih lo a, natna dang nei tel niin, August 11 khan DCHC-ah dah luh a ni.
IDSP record angin, Mizoramah Covid-19 vei 2,34,926 hmuh chhuah a ni tawh a, mipa 1,09,438 leh hmeichhia 1,25,488 an ni a, mipa aiin hmeichhia 16,050-in an tam zawk. Nimin tlai dar 5 thleng khan mi 2,33,294 (99.31%) chhuahtir an ni tawh a, mi 716 (0.30%) thi tawhin, enkawl mek mi 916 (0.38%) an awm.
Kum 2011 chhiarpui angin, Covid-19 vei hmuh tawh 2,34,926 chu state mipui zat aṭangin 21.41% a tling a; mi 1,000 zelah positive 214 an awm tawh ang a ni a, hripui vangin mi 1,00,000 zelah mi 65 an thi tawh ang a ni.
*4th IR din champha lâwm*
13th August 2022
4th Indian Reserve (IR) Battalion chuan nimin khan Mamit Luangpawla Battalion Headquarters multipurpose hall-ah 4th IR din champha vawi 15-na an lawm a, Mamit district bawrhsap Lalnunhlua'n a hmanpui.
Lalnunhlua chuan, 4th IR Bn-in a din champha vawi 15-na an hmang thei chu a lawmpui thu sawiin, "Dan leh thupek kenkawhnaah leh rîkrum thilah kan district innghahna in ni a, in awmna hmun apiangah rinawm leh ṭhahnemngai taka thawktu ni ṭheuh ang che u," tiin a fuih a; civil mi aiin uniform hate chu an nun uluk lehzual tur leh mite tana harsatna siamtu ni lo a, thlamuantu ni turin a chah.
4th IR Bn. commandant KL Vulmawia chuan, an hmlakna hrang hrang a tarlang a, Mamit Officers' Club secretary Dr Joseph C Lalremruata'n thu a sawi bawk.
*Tlawngah bawlhhlawh paih a nih loh nan Kawngpui hrûlah lèn zâr a ni dawn*
13th August 2022
Aizawl Municipal Corporation (AMC) mayor Lalrinenga Sailo, MNF adviser ni bawk chuan, Aizawl tui tlan lâkna Tlawng luia bawlhhlawh paih a nih loh nan tlawng kam kawngpui hrûlah lèn zâr vek a ni dawn tih a sawi.
Lalrinenga Sailo hian nimin khan Mizo Hnam Runa inkhawmah thu sawiin, "Aizawl tui tlan lâkna Tlawng luiah bawlhhlawh paih a nih loh nan tlawng kam kawngpui hrúlah lên zàr vek a ni dawn a, thui tak thawh tawh a ni," a ti.
Aizawl chu khawpui ṭhang mek a nih avangin faina leh thianghlimnaah hmalâk nasat a ngaih thu sawiin Lalrinenga chuan, "Kan khawpui a changkan zel theih nan mipuite'n kan zir a ngai a, kan bawlhhlawh paih danah leh kan chhehvel enkawl danah mipuite'n mawh kan phur a ni," a ti.
Mayor chuan, AMC-in Aizawl khawpui a thianghlim theih nan bawlhhlawh paihna hmun tur a siam tih sawiin, "Kan bawlhhlawh paih kha leiṭhaah kan sâwngbâwl leh ṭhin," a ti a; bawlhhlawh paihte chu mi ṭhenkhatin inhlawh nan an hmang a, ei leh bàr hmuh nan an hmang ṭhin tih a sawi.
Lalrinenga Sailo chuan, social media a chak tawh hle a, mipui an ṭhangharh tulh tulh a, thu dik leh dik lo an thliar thiam tawh hle nia sawiin, "Tuna AMC-in hma kan lak mek pawh hi tute emaw political party-in politics-a hamṭhatna lâk tum a, mipui rilru hruai kâwi tumin dâwt hmangin social media hmun hrang hrangah AMC hmalakna ṭhenkhat an vawrh darh ṭhin hi a ṭha lo a, khawpui a thianghlim theih nan kan ṭanho a ṭul a ni," a ti.
*PAC-in IHM an enfiah*
13th August 2022
Mizoram Legislative Assembly hnuaia Public Accounts Committee (PAC) member-te chuan nimin khan Bung Banglaa Institute of Hotel Management tura ruahman an enfiah.
Hotel Management Institute hi kum 2015 khan PWD-in an sa zo tawh a, Tourism department kutah hlàn ni tawh mah se, tun thlengin luah mumal lohin a la awm. Assembly PAC hotute chuan a dinhmun an enfiah rualin, ṭangkai taka hman a nih theih dan tur an sawiho a ni.
Hotel Management Institute tlawhnaah hian PAC hi an chairman Vanlalhlana hoin member pathum - Dr ZR Thiamsanga, Dr Vanlalthlana leh Zothantluanga te an kal a; Assembly Secretariat leh Tourism department department hotute'n an ṭawiawm a ni.
*Health Minister-in sorkar laipui dàwr*
13th August 2022
Minister Dr R Lalthangliana chuan, tun hnai khan New Delhi-ah sorkar laipui hotute a dawr a, a department enkawlte hmalakna leh hmachhawp hrang hrang a sawipui. Mizoram hmun hrang hrangah AYUSH dispensary 30 pek a nih tur thu an lo hrilh.
Sorkar thuchhuah tarlan danin, Dr R Lalthangliana hian nimin khan Ministry of AYUSH joint secretary D Senthil Pandiyan hmuin, AYUSH Directorate hnuaia thawktute hlawh leh state sorkarin harsatna a tawhte a sawipui a; Senthil Pandiyan chuan, Mizoram hmun hrang hrangah AYUSH dispensary 30 pek a nih tur thu a lo hrilh a ni.
Union Health secretary Dr Rajesh Bhushan pawh a pisaah hmuin, Zoram Medical College tihhmasawnna tura DPR thehluh tawhte a sawipui a; Union Health Secretary chuan a lo ngaihtuah zui tur thu a lo hrilh. National Health Mission hnuaia hmalakna te, supplementary budget aṭangin additional allocation dil chungchangte an sawi dun bawk a; Rajesh Bhusan chuan, RIPANS tihchangtlunna tura hmalakna pawh a ngaih pawimawh thu a lo hrilh.
R Lalthangliana hian NITI Aayog member Dr VK Paul (Health) hnenah damdawi-in hrang hranga hman tur x-ray kháwl ngaihtuahpui tur leh ZMC tihchangtlun nana one time assistance awm theite ngaihtuahsak turin a ngen a; Dr VK Paul chuan ngaihtuahna a lo sen tur thu a lo hrilh a ni.
Dr Thangtea hian Asian Development Bank hotu te, Ministry of Mining secretary Alok Tandon te, Ministry of Home Affairs (Border Management) joint secretary Sunil Kumar Barnwal te, Micro, Small & Medium Enterprises secretary BB Swain te a hmu bawk a; New Delhi Mizoram House-a additional resident commissioner Alexander V Chongthu leh HFW OSD Dr Hmingthankimi ten an ṭawiawm a ni.
*Ramrikawn YMA-in mipui ngen*
13th August 2022
YMA, Ramrikawn Branch chuan thuchhuah siamin, an veng mi Hruaitea thihna chungchangah Youtube-a thu puangzar ṭhin (Youtuber)-te ngai pawimawh lo turin mipui an ngen.
Ramrikawn YMA chuan, "Hruaitea thih danah khawi khawi aṭangin emaw Youtuber content bengverh záwng neih tuma chanchin rawn zawt an awm a nih pawhin lo ngaih pawimawhsak loh ni se tiin khawtlang mipui kan inngen e," an ti. An veng mi thih danah mi kut tuara thi a nih a rinawm loh thu an tarlang bawk.
*Tipa damdawi-in thar hawng*
13th August 2022
Minister of state Dr K Beichhua chuan nimin khan a bial chhung Tipa khuaa damdawi-in (primary health centre) sak thar a hawng. PHC hi NEDP (2018-19) sum nuai 144.8 hmanga sak a ni a, Zamzo Construction & Consultancy Services-in an sa a ni.
Tipa (Tuipang) PHC-ah hian mipa leh hmeichhe ward te, nursing room, operation theatre, induction room, labour room, casualty, x-ray room, consultation room, nursing changing room, loboratory leh pharmacy-te a awm.
*Mizoram sorkarin SEDP sem tur Sum faiin a kawl reng tawh - Robert*
13th August 2022
Sialhawk VC leh an khuaa lakhuihthei chíngtute chuan nimin khan an khaw community hall-ah Lakhuihthei Kût an hmang a, minister of state Robert Romawia Royte-in a hmanpui. Minister chuan, SEDP sem tur chu sum faiin Mizoram sorkarin a kawl reng tawh a, sem thuai a nih dawn thu a sawi.
Robert Romawia Royte chuan, SEDP sem tur sum Mizoram sorkarin a kawl reng tawh nia sawiin, "Tun aṭanga rei lo têah sem a ni dawn a, a dawngtu zawng zawngte'n rinawm tak leh dik taka SEDP sumte sorkarin a pek chhan ang taka hman ṭangkai tur a ni," a ti.
Sorkar laipuiin CSS sum chungchanga dan a siam thar zâwm theia Mizoram sorkar a awm chu lawmawm a tih thu sawiin Robert Romawia chuan, "Ni 10 chhung leka Mizoram sorkarin cheng vbc. 700 chuang a dawng leh mai leh, CSS leh sum hnár dang aṭanga sum tluang taka a dawng zel hi Pathian malsâwmna a ni," a ti a; lawm nacháng hre turin mipui a chah.
Minister chuan, Sialhawk mipui leh ṭhalaite'n hna an thawk nasa chu lawmawm a tih thu leh taima taka hna thawh chu sual dona ṭha ber a nih thu sawiin, Sialhawk VC team-te football-a Mizoram pum huap inelnaa pahnihna an ni chu a lawmpui thu a sawi a, "Football field tihchangtlunna in dil pawh project siam tawh a ni a, sum sanction erawh a la awm rih lo," a ti.
Robert Romawia Royte hian Sialhawk HS tan computer pasarih leh a hmanraw pawimawhte a pe a; Sialhawk HSS sak nan NECS kaltlangin NGO Project hnuaiah Rs 22,00,000 approval minute hmuh a nih tawh thu leh sum pek thuai a beisei thute a sawi bawk.
*Hmasawnna chanchin ṭha kan tlangaupui - Mizoram BJP President*
13th August 2022
BJP, Mizoram Pradesh president Vanlalhmuaka chuan, BJP chuan Mizoramah chuan hmasawnna chanchin ṭha an tlangaupui mek niin a sawi.
Nimina BJP pisaa inkhawmah thu sawiin Vanlalhmuaka chuan, "Mizoramah BJP chuan development chanchin ṭha kan tlangaupui mek. Kristian ramah hian Krista chanchin ṭha hretu tam tak hian Krista hmangaihte min enkawl dan ngaihtuah hian, ringlo mite'n kan sorkar hmalaknaah Isua hmél an hmu lo hi a zahthlakin a pawi tak zet a ni," a ti.
Vanlalhmuaka chuan, "BJP sorkarna hnuaiah Kristiante'n chanvo pawimawh tak tak kan chelh mek a, India ram politics-a Kristiante'n chanvo ṭha kan neih hun chu BJP sorkar hunah a ni zel. BJP aṭanga dinhmun pawimawh chelhna hun hi BJP aṭangin a ni zel bawk," a ti a; Congress leh an thawhpuite'n Kristiante an nêkchêp hle ṭhin tih an sûlhnu aṭangin a lang tih a sawi.
Mizorama harsatna leh retheihna sukiang theitu awm chhun chu BJP an nia sawiin Vanlalhmuaka chuan, "He ram chhan chhuak tur hian Pathianin min thlang a, khawvel mite mitah tling lo mah ila, chunglam mitah chuan kan tling a ni. Aigupta aṭangin Kanan ramah kum 2023 tawpah chuan Pathianin min hruai lut dawn a ni," a ti.
BJP President hian India ramin zalenna a hmuh champha kum 75-na lawmna atana in tina hnam puanzar zár tura tih chu zâwm vek turin Mizoram mipui a ngen a ni.
Mizoram BJP hian nimina an inkhawm zawhah India ramin zalenna a sual vanga thite pual leh chutiang harsatna a thlen tawh lohna turin silent march an nei bawk.
*In tina hnam puanzar tar’ (Har Ghar Tiranga) awareness rally kharna programme chu Chhingchhip Venghlunah hman a ni*
13th August 2022
09 Aug 2022 : Sainik School Chhingchhip bultum in, Chhingchhip Joint YMA leh VC te kaihhruaina hnuaiah, ‘In tina hnam puanzar tar’ (Har Ghar Tiranga) awareness rally kharna programme chu Chhingchhip Venghlunah hman a ni. He programme hi Mualpui leh Venglaiah te hman a lo ni tawhin, India zalenna champhaphak vawi 75-na denchhen a in tina hnam puanzar a tam thei ang ber zar tur a inzirtirna pek a ni bawk. He programme hi school naupang leh khawtlang mipui ten an hman pui a ni.
*Congress-a haw khâwm turin sáwm*
13th August 2022
Mizoram Pradesh Congress Committee (MPCC) chuan nimin khan Congress Bhavan-ah chhung inkhawm an hmang a; MPCC president Lalsawta chuan, Congress party-a awm tawh zawng zawngte chu haw khawm leh turin a sáwm.
Lalsawta chuan, Congress party an sorkar loh chuan Mizoram chu a ngaihtuahawm ṭhin nia sawiin, "Kum 2023-a kan sorkar loh phei chuan kan ram chhiat dan tur hi a nasa dawn. Chuvangin, a chhe lai siamṭhatu ni turin Congress party-a awm tawh zawng zawng, eng emaw vanga kan party aṭanga chàwl tawhte pawh Congress party-a lo haw khawm leh vek turin thinlung leh tih tak zetin ka sawm che u a ni," a ti.
MPCC thupuangtu Dr Lallianchhunga pawhin thu sawiin, Congress party chu sakhaw zalenna leh mihring zalenna chawisangtu leh humhim duhtu party a nih thu a sawi a, "Central-a BJP a sorkar hnu hian Kristiante rawngbawlna hrang hrangin harsatna a tawk chho mek a ni," tiin, tun hma angin Kristian missionary-te’n zalên takin crusade an nei ngam tawh lo niin a sawi.
Dr Lallianchhunga chuan, Mizorama Congress party chak leh chak loh chu Delhi-a an dinhmunin a hril lo nia sawiin, "Congress party innghahna chu Lal Isua a ni. Pathian duh dana insiamṭha a, candidate leh policy ṭha kan neih apiangin mipuiin min thlang tling ṭhin. Election manifesto pawh Mizoram mil tur kan siam a, chumi hmang chuan Zoram mipui hnenah kan inpho chhuak ṭhin," a ti.
*Aizawlah Har Ghar Tiranga Street Show*
13th August 2022
UDPA department chuan Pradhan Mantri Awas Yojana (Urban) leh Swachh Bharat Mission (Urban) hnuaiah India ram zalenna champha vawi 75-na lawmna atana in tina national flag zâr (Har Ghar Tiranga) pualin nimin khan Aizawlah Har Ghar Tiranga Street Show an buatsaih.
Street Show-ah hian PMAY(U) hnuaia in sak ṭanpuina dawngtute'n ṭanpuina an dawn hnua an nun a inthlak danglam dan leh khawtlangah rual páwl zawka an awm dante pholan a ni.
Swachh Bharat Mission (Urban) hnuaia open defecation free plus ni tura vantlang inthiarna vawn thianghlim leh enkawl fai pawimawhna te, sorkar laipuiin hman khat daih sarâng a khap chungchang leh Mizorama khawpui fai inelna (August 1 - December 31, 2022) hman mekte tarlan a ni bawk.
Har Ghar Tiranga Street Show hi sorkar laipuia Ministry of Housing & Urban Affairs thuchhuak bawhzuia huaihawt a ni a; August 15, 2022 khian UDPA department chuan PMAY(U) - Housing for All ṭanpuina dawngtute nen Mizo High School Field-ah Kite Festival an buatsaih leh dawn a ni.
*Independence Day lawmnaa tel turin sorkarin mipui sáwm*
13th August 2022
Mizoram sorkar chuan hmun hrang hranga Independence Day vawi 76-na, August 15, Thawhṭannia lawmnaah tel ṭheuh turin mi tin a sáwm a, sorkar hnathawkte chu tel ngei turin a hriattir.
Independence Day lawmna inkhawm lian ber chu Lammualah neih tur niin, zing dar 8-ah ṭan a ni dawn a, chief minister Zoramthanga khuallian a ni ang a, hnam puanzar a pawh pharh bakah, national leh state award te, parade lawmmante a sem ang.
Lammuala Independence Day lawmna hun hman zawhah chhun dar 11-ah sâwm bikte tan Raj Bhavan-ah Governor’s At Home buatsaih tur a ni bawk.
*Zirlaite'n Career Exhibition an hlut*
13th August 2022
SCERT chuan August 11-12, 2022 chhung khan SCERT directorate hmunah high school zirlaite tan Career Exhibition an buatsaih a, zirlai eng emaw zat telin, zirlai 1,426-in an chhim.
Career Exhibition hi August 11 khan SCERT director Laldawngliani Chawngthu-in a hawng a, nimin khan chhunzawm a ni. Aizawla sikul 12-a zirlai 47-te'n arts, science, commerce leh vocational lama zirna leh eizawnna awm theite an entir a, endiktu atana ruatte'n an endik. Exhibition hi sikul 12-a zirlai 1,426-in an chhim a ni.
Nimin khan SCERT Auditorium-ah kharna inkhawm neih a ni a, School Education secretary Dr Lalzirmawia Chhangte-in a hmanpui.
Dr Lalzirmawia chuan, hmanlai leh tunlai dinhmun a inthlauh tawh thu sawiin, "Hmanlai chuan a zir sang deuh chuan an zir zawhah awlsam takin hna an hmu mai a, tunah erawh chuan thiam fál bik tan lo chuan hna hmuh mai a harsa tawh a, chuvangin, career awareness hi a pawimawh hle," a ti a; tum mumal tak neia lehkha zir turin zirlaite a fuih.
Career Exhibition-a pakhatnate chu - Arts stream-ah Divine Intervention School, Science-ah Mount Carmel School, Commerce-ah Home Mission School leh Vocational-ah Zemabawk High School-te an ni a; Best Display atan Arts-ah Helen Lowry School, Science-ah Mizo High School, Commerce-ah Home Mission School, Vocational-ah JL High School-te thlan an ni.
Best Exhibitor atan Arts-ah Vanlalruatdika, Divine Intervention School, Science-ah Vanlalpekhlui, Chaltlang HSS, Commerce-ah Deborah R Lalhmingmawii, St. Joseph HSS leh Vocational-ah Caroline B Lalhmingliani, JL HS-te thlan an ni bawk.
Exhibition-ah hian Women’s Polytechnic-a lecturer Susan R Ralte leh Zirtiri Residential Science College-a assistant professor Lalhruaitluanga ten career talk hun hmangin thu an sawi a; judge aiawhin School Education deputy director Zoliani Hnamte-in thu a sawi bawk.
*College ṭha tehnaa an dinhmun PUC hotute'n lawmawm an ti*
13th August 2022
Pachhunga University College (PUC) hotute chuan nimin khan an college-ah thuthar thehdarhtute an kâwm a; tun hnaia India ram pum huap college ṭha tehna hrang hranga an dinhmunah an lawm thu an sawi.
PUC principal Prof. H Lalthanzara chuan, Pathian zarah tun hnaiah hlawhtlinna ropui tak an neih thu sawiin, "Mizo mipui tana hlawhtlinna leh méllung thar niin kan hria. Hmasawnna tur leh hmabak tam tak kan la neihte hlen chhuak a, dinhmun sang zawka kan inhlàn kai zel theih nan kan thlen chin leh kan dinhmun mipuia puanzar a pawimawh kan ti a ni," a ti.
Prof. H Lalthanzara chuan, India rama zirna endiktu National Assessment and Accreditation Council (NAAC)-in tun hnaiah A+ grade a pek thu sawiin, "Hmarchhak college zinga NAAC grade A+ college pahnih awmah a score sang zawk kan ni a, hmarchhaka college zingah NAAC-a score sang ber kan ni," a ti a; kum 2016-a A+ an hmuh ṭuma an point hmuh aiin tuna an hmuh chu a san zawk thu a sawi.
Ministry of Education hnuaia zirna sang endiktu, National Institutional Ranking Framework (NIRF)-in ranking a tihchhuah thar berah PUC chu India rama college ṭha zingah 45-na a nih thu sawiin H Lalthanzara chuan, "Hmarchhaka college zingah top 100-a lang awm chhun kan ni. NIRF endiknaah hian kum 2018 aṭangin kan tel a, rank band 100-150 leh 151-200 ahte kan awm hnuah 45-naah kan chho a ni," a ti.
Prof. H Lalthanzara chuan, India Today-in kum 2022-a college ṭha a thlannaah PUC chu arts-ah 141, science-ah 167 leh commerce-ah 183-na a nih thu sawiin, "Hmarchhak college aṭanga lang phak tlemtê zingah kan tel," a ti a, thil dangah mark hmu ṭha thawkhat mah se, state pawn aṭanga zirlai lut zat leh state dangin an hriat dan tehnaah mark an hmuh ṭhat tâwk loh avangin an dinhmun a san loh thu a sawi.
Ramngaw neih ṭhat leh humhalhah lawmman an dawn thu sawiin PUC Principal chuan, "Hetiang lam endiktu Green Mentors, Ahmedabad chuan kum 2021-2023 chhung atan dinhmun sang ber platinum rank min pe a ni," a ti.
Vanglaini palai zawhna chhangin PUC hotute chuan, NIRF-in college ṭha a thlannaah college zawng zawng tel tura sàwm an nih thu an sawi a, "Hmarchhak state aṭangin eng emaw zat an tel a, Mizoram aṭang pawhin pahnih kan tel," an ti a; NIRF chuan an duh khirh avangin thehluh leh buaipui ngai a tam thu an sawi.
PUC hian lawmman hrang hrang an dawnte hi August 15, 2022 hian an lawm dawn a, chief minister Zoramthanga leh MZU vice chancellor Prof. KRS Sambasiva Rao-ten an hmanpui dawn a ni.
PUC DINHMUN ṬHENKHAT
1) NAAC-in tun hnaiah A+ grade a pe a, hmarchhak bial college zinga mark hmu sang ber a ni.
2) Ministry of Education hnuaia NIRF-in en endikna leh tehnaah India rama college ṭha 45-na a ni.
3) India Today-in kum 2022-a college ṭha a thlannaah arts-ah 141-na, science-ah 167-na leh commerce-ah 183-na a ni.
4) Ramngaw neih ṭhat leh humhalhnaa tih ṭhat dan tehtu Green Mentors, Ahmedabad-in rank sang ber platinum rank a pe.
*Aizawlah Eat Right Mela buatsaih*
13th August 2022
Confederation of Indian Industry, Young Indians (Mizoram) leh HFW department-a Food & Drug Administration chuan nimin aṭang khan Aizawlah India ram zalenna kum 75-na lawm nan Eat Right Mela an buatsaih.
Eat Right Mela pual hian nimin zing karah khan Vanapa Hall kawt leh MINECO Outdoor Gym inkarah Eat Right Walkathon buatsaih a ni a, mi ṭhahnem tak telin, Health & Family Welfare Board vice chairman Dr ZR Thiamsanga, MLA-in a vailiam. Walkathon-ah hian ei leh in thianghlim pawimawhna leh ei leh in ṭha lo laka fimkhurna tur thute an aupui a ni.
Nimin chhun khan Millennium Centre Exhibition Hall-ah Eat Right Mela hawnna inkhawm buatsaih a ni a, Health secretary Esther Lalruatkimi'n a hmanpui. Ei leh in thianghlim pawimawhna zirho a ni a, sawiho nghal a ni.
Sikul naupang, pawl 3-8 inkar zirlaite tan lemziaka intihsiakna leh pawl 9-10 tan auhla phuah hmanga intihsiakna buatsaih a ni a; Mizo chawhmeh bai leh bàwl insiamsiakna buatsaih a ni bawk.
*MKHC-in an kum 40 tlin an lawm ; Páwn lam aṭanga min thlirtute chuan Entawn tlakah min hmu fo ṭhin - CM*
13th August 2022
Mizoram Kohhran Hruaitute Committee (MKHC) chuan nimin khan MKHC kum 40-na, ruby jubilee an lawm. An hun hmanpuitu chief minister Zoramthanga chuan, Mizoram chu páwn lam aṭanga thlirtute'n mawi leh entawn tlak takah an hmuh fo thu a sawi.
MKHC vice chairman Rev. Zionvarmawia Fanchun kaihhruai inkhawmah Chief Minister chuan, Mizoram chu tling lo leh ṭha lo nia inhriain, an insawisel fo ṭhin thu a sawi a, "Páwn lam aṭanga min rawn thlirtute chuan mawi leh entawn tlak takah min hmu fo ṭhin. Mahni tlin lohna chauh hmu lian lo a, kan ṭhatnate, kan theihnate ṭangkaia hmang zawk tur kan ni," a ti.
Zoramthanga chuan, mi ṭhahnemngai tak takte ṭang taka hmalakna zarah Mizoramin remna leh muanna tluantling a neih thu sawiin, "Mi dang tan, ram dang, hnam dang tana malsawmna kan nih leh chhâwnna tur zawk a ni. Kan bul velah ram buai eng emaw zat a la awm a, Mizoramin kan neih ang remna hi an duh ve a ni," a ti a; remna thu puang chhuak tura inbuatsaih a ṭul thu a sawi.
Mizoramin hun khirh tak a tawn laiin remna a awm theih nan leh mipui mangang thlabárte thlamuan turin Zoram Kohhran Hruaitute Committee (ZKHC) din a nih thu sawiin CM Zorama chuan, "Zirlai pawl, tlawmngai pawl, political party-te'n remna atan hma la hlawm mah se, ZKHC hruaitute hmalakna chu lamṭang nei lo, innghahna tlak ber nia kan hriat avangin kan innghahna lian tak a ni. India sorkar pawhin a ngai pawimawh," a ti.
MKHC kum 40 tlin lawmnaah hian MKHC chairman Rev.Dr Vanlalnghaka pawhin thu a sawi a; remna leh muanna Mizoramah a awm theihna tura ZKHC-in hma an lâkna leh thâ an thawh dante tarlan a ni bawk.
Mizoram Kohhran Hruaitute Committee hi August 13, 1982 khan Zoram Kohhran Hruaitute Committee tih hming vuahin din a ni a, April 2, 1998-ah Mizoram Kohhran Hruaitute Committee tia thlak a ni.
_ _ _ _ _ _ _ _ v _ _ _ _ _ _ _ _ _