🧱

രാമക്ഷേത്രത്തിന്റെ ഭൂമിപൂജ പ്രമാണിച്ചു സംഘ് പരിവാറിന്റെയല്ലാത്ത വീടുകളിൽ പോലും വിളക്കുകൾ കത്തിയതിൽ പരിഭവിച്ചു കൊണ്ട് ചില പോസ്റ്റുകൾ കണ്ടു. എനിക്ക് ഒരു അദ്‌ഭുതവും തോന്നിയില്ല. ഭാരതീയ ജനസംഘം കേരളത്തിൽ ഒരു ഈർക്കിൽ പാർട്ടി പോലും അല്ലാതിരുന്ന സ്‌കൂൾ കാലത്ത് തന്നെ അടിത്തട്ടിൽ നിലനിന്ന ഹിന്ദുത്വവികാരം ഭംഗിയായി തിരിച്ചറിയാൻ മാത്രം രാഷ്ട്രീയം എങ്ങനെയോ ഞാൻ പഠിച്ചിരുന്നു. കണക്കും സയൻസും കട്ട് ചെയ്ത് സിനിമക്ക് പോയിട്ടും പോപ്പൻ മാഷുടെ സാമൂഹ്യപാഠം ക്ലാസ്സ്‌ ഒന്ന് പോലും കട്ട് ചെയ്യാൻ തോന്നിയില്ലായിരുന്നു. തലശ്ശേരിയിൽ കലാപം നടന്ന 1970ൽ ഞാൻ നാലാം ക്ലാസ്സിൽ ആയിരുന്നു. നന്നായി രാഷ്ട്രീയം ചർച്ച ചെയ്യുന്ന കുടുംബം ആയത് കൊണ്ട് ജനസംഘത്തിനു ആയിരം അംഗങ്ങൾ തികച്ചില്ലാത്ത തലശ്ശേരിയിൽ കലാപത്തിൽ വലിയ തോതിൽ (നേതൃത്വത്തെ ധിക്കരിച്ചു കൊണ്ട് ) സി പി എം അനുഭാവികൾ പങ്കെടുത്തു എന്ന് പറയുന്നത് ഞാൻ മാറി നിന്ന് കേട്ടിരുന്നു. സ്‌കൂളിലും അടിയൊഴുക്കായി ഹിന്ദുത്വം ഉണ്ടായിരുന്നു. ഇപ്പോഴിതാ സംഘ് പരിവാർ വയസ്സറിയിച്ചപ്പോൾ അന്നത്തെ ക്ലാസ് മെയിറ്റുകളിൽ വലിയൊരു വിഭാഗം സംഘികളായിരിക്കുന്നു!

കോൺഗ്രെസ്സിനെയോ രാഹുൽ ഗാന്ധിയെയോ കുറ്റം പറയണ്ട. തീർച്ചയായും സ്വന്തം ചോര കൊടുത്തും ന്യൂനപക്ഷ സമുദായങ്ങളെ ആക്രമിക്കുന്നത് ചെറുക്കാൻ തയ്യാറുള്ള ഹിന്ദുക്കൾ ഇവിടെയുണ്ട്, എന്റെ സഹപ്രവർത്തകരിലും സുഹൃത്തുക്കളിലുമുണ്ട്. പക്ഷെ അവരുടെ എണ്ണം വളരെ ചെറുതാണ്. ഇനിയും ചെറുതായി കൊണ്ടിരിക്കുകയാണ്. ചരിത്രപരമായി ഒരുപാട് കാരണങ്ങളുണ്ട്. മുസ്ലിം വർഗ്ഗീയതക്ക് നല്ല പങ്കുമുണ്ട്. പക്ഷെ, ഹിന്ദുക്കൾക്ക് ഇന്ത്യയല്ലാതെ വേറെ ഏത് രാജ്യമുണ്ട്, ഒരമ്പലം ഉണ്ടാക്കാൻ പോലും ഹിന്ദുക്കൾക്ക് സ്വാതന്ത്ര്യമില്ലേ, ഹിന്ദുക്കളുടെ അഭിമാനം രക്ഷിക്കാൻ ബി ജെ പിക്കല്ലാതെ ആർക്ക് കഴിയും എന്ന് ചിന്തിക്കുന്ന സംഘ് പരിവാർകാരല്ലാത്ത ഒരു പാട് പേരുണ്ട്. മോദി പറഞ്ഞ 130 കോടിയിൽ അവരുണ്ട്. അവർ നിർണ്ണായക ഘട്ടങ്ങളിൽ എടുക്കുന്ന തീരുമാനങ്ങളാണ് ഇന്ത്യയുടെ ഭാവി തീരുമാനിക്കുക. സംഘികളെയല്ല, അവരെയാണ് പേടിക്കേണ്ടത്. ഇടതുപക്ഷത്തിന്റെ അടക്കം പ്രതിരോധം വെറും അധരസേവയിൽ ഒതുക്കാൻ അവർക്ക് കഴിയും. അവരുടെ മനസ്സ് മാറ്റാനുള്ള അടിത്തട്ടിൽ നിന്നുള്ള ഒരു മുന്നേറ്റവും ചക്രവാളത്തിൽ കാണാനില്ല. "130 കോടിയിൽ ഞാനില്ല" എന്നത് വനരോദനമാണ്.

ഇവിടെ ജുഡീഷ്യറി പോലും ഹിന്ദുത്വം കൊണ്ടാടുമ്പോൾ (പീഡിപ്പിച്ചയാൾ പീഡിപ്പിക്കപ്പെട്ട സ്ത്രീക്ക് രാഖി കെട്ടാൻ കോടതി വിധി വന്നത് കഴിഞ്ഞ ദിവസമാണ്) അതിർത്തിക്കപ്പുറത്ത് പ്രതീക്ഷക്ക് വകനൽകുന്ന ചിലത് നടക്കുന്നുണ്ട്. ഭീകരവാദത്തിന്റെ ഈറ്റില്ലമായി ലോകം എഴുതിത്തള്ളിയ പാകിസ്ഥാനിൽ അടുത്ത കാലത്ത് ന്യൂനപക്ഷ സമുദായങ്ങളുടെ അവകാശങ്ങൾ സംരക്ഷിക്കുന്ന ചില കോടതിവിധികൾ വന്നു. അപ്പുറത്ത് ബാംഗ്‌ളാദേശിൽ ഇടർച്ചകൾ ഉണ്ടെങ്കിലും മുജീബുർ റഹ്‌മാന്റെ മതനിരപേക്ഷ രാഷ്ട്രീയം മരിച്ചിട്ടില്ല. അവിടെ തൂക്കിലേറിയത് മുസ്ലിം തീവ്രവാദികളാണ് (അവർക്ക് വേണ്ടി മയ്യത്ത് നിസ്ക്കാരം നടത്തി കേരളത്തിൽ ജമാഅത്തെ ഇസ്‌ലാമി സംഘികൾക്ക് മോശമില്ലാത്ത. മൈലേജ് ഉണ്ടാക്കി കൊടുത്തു). അഫ്‌ഗാനിസ്ഥാനിൽ നിരന്തരമായി ഗറില്ലാ യുദ്ധം നടത്താൻ അല്ലാതെ (അമേരിക്കയുടെ സാന്നിധ്യം ഇല്ലെങ്കിൽ പോലും) അധികാരത്തിൽ വരാൻ ഇനി താലിബാന് കഴിയും എന്ന് തോന്നുന്നില്ല.