🤍

-متخليش خوفك يسيطر على قراراتك .. ممكن ؟

=قصدك إيه ؟

-إنتِ فاهمة قصدي كويس ، أنا همشي وإنتِ فكري كويس

*سابتني ومشيت من غير ما تستنى ردي حتى ، مش فاهمة أنا فين المشكلة لما أخاف ، طبيعي أخاف بعد ما اتسابت كتير وآخر خطوبة اتفشكلت واللي كان ترتيبها الرابع ، ده أنا لو بحقق إنجازات مش هعمل كده

~ يا حبيبتي هي مش قصدها حاجة ، هي بس خايفة عليكي تضيعي مازن من إيدك ، يا بنتي ده شاريكي وبيحبِك ، وبصراحة الواد فرصة ما تتعوضش

= وطبعاً مش هلاقي زيه ده زين الشبان وألف واحدة تتمناه

بصتلي بيأس عشان حفظت الإسطوانة المعتادة وقالت :

~طب يا بنتي فكري تاني

رديت بانفعال = وبعد ما افكر إيه هيتغير ، نتوكل على الله ونحضر نفسنا ونجهز البيت ونعزم الناس وأبين إني مبسوطة عشان أنا العروسة ، وهو يبين إنه فرحان عشان حقق غرضه ، ونبين للناس قد إيه إحنا مناسبين ومفيش شهور ويبعتلي بكل سخافة إنه مش قادر يكمل زي سليم العريس اللي فات ، أو يقرر يطلع فيا عيوب عشان يداري بيها النقص اللي عنده زي طارق العريس اللي قبله اللي قلتي مفيش منه اتنين في الكوكب

كملت بسخرية : طب واللهِ كويس إن مفيش منه في الكوكب .. ها تحبي أكمل ولا نقفل على كده

~ أنا مش لاقية مبرر لخوفك ، كل الناس بتتساب

= إلا أنا ، كل الناس تتساب إلا أنا ..ليه مش عايزة تفهمي إني تعبت من كل علاقة دخلتها وكل واحد فكر إنه يبقى موجود في حياتي ، كل حاجة بتحصل في حياتي كنت بعملها بكل شغف عشان ما أندمش عليها ، يا ماما أنا طاقتي خلصت ، صدقيني معنديش طاقة أدخل علاقة تاني

~ جربي مرة كمان ، مازن يستاهل تحاولي عشانه

=مازن يستاهل أحاول ، بس ميستاهلش يضيع وقته وطاقته ومشاعره على الفاضي

*سبتها ودخلت أوضتي ، ولا النقاش هيخلص ولا حد فينا هيقتنع

-ها عملتي إيه ؟

= تاني يا آية ، هو إنتِ مش بتزهقي أبداً

-بصراحة لأ

= طب ريحي نفسك وركزي في شغلك عشان في إيدينا مستقبل هيضيع

شغلتنا محتاجة تركيز ، مربيين أجيال ، مُؤدِبين ، مُلقنين .. طبعاً واضح إننا معلمات وتحت إيدنا طلبة ومستقبل واجب التركيز فيه

•آنسة غزال ، في حد بيسأل على حضرتك

*كنت قاعدة في مكتبي وقت ما دخل عم محمد الساعي وبلغني إن في حد عايز يقابلني ، أكيد ولي أمر في مشكلة مع إبنه أو بنته

=خليه يدخل يا عم محمد

" حضرتك ميس غزال مش كده ؟

= أيوه أتفضل ..

" أنا أخو حفصة ، طالبة عند حضرتك في الفصل

= أيوه مظبوط ، بس حفصة من الطلبة المجتهدين عندي ، خير في مشكلة أقدر أساعدك فيها

" صراحةً ، حفصة بقالها فترة متغيرة والتغيير للأفضل بس كنت محتاج أعرف سببه

= تغيير من ناحية إيه بالظبط ؟

" بصراحة حفصة قررت تتحجب وده قرار غريب منها ، نظراً لسنها الصغير وكمان بقى عندها وِرد ثابت

= أيوه أنا مش فاهمة فين المشكلة ، حفصة اتغيرت للأفضل وعرفت واجبها كمسلمة والأوامر اللي ربنا أمرها بيها

" بس دي حاجة جديدة

= بس كويسة !

" بس أنا محتاج أعرف سبب للتغيير ده

= تمام .. أنا فهمت حضرتك ، أكيد حضرتك اتكلمت مع حفصة وقالتلك بطريقة ما إن أنا السبب في التغيير ده ، مظبوط ؟

حط إيده في شعره دليل على الخجل " هو بصراحة كلامك مظبوط !

= تمام .. أنا فعلاً السبب بعد ربنا سبحانه وتعالى

" بس دي مش مدرسة أزهري وأعتقد إن حضرتك مُعلمة مادة علمية مش مواد شرعية

= معاك مصحف ؟!

" نعم ؟ هو أنا هشيل مصحف في الشارع ليه ؟

= لإنك مسلم ، اتفضل

فتحت شنطتي وطلعت مصحف منها وحطيته قدامه وطلبت منه يفتح سورة فصلت الآية (33) ويقرأها

" (وَمَنْ أَحْسَنُ قَوْلًا مِمَّنْ دَعَا إِلَى اللَّهِ وَعَمِلَ صَالِحًا وَقَالَ إِنَّنِي مِنَ الْمُسْلِمِينَ)

= صدق الله العظيم ، في نهاية الآية ربنا سبحانه وتعالى قال إنني من المسلمين مقالش أزهريين أو دارسين علوم شرعية ، ده بالنسبة للدعوة

أما بالنسبة لإني السبب في بداية إلتزامها ، ربنا سبحانه وتعالى مش بيعمل شئ من فراغ هي جواها الخير وكانت محتاجة مساعدة مش أكتر ، وربنا سخرني عشان أكون أنا المساعدة دي

" وبالنسبة للحجاب .. حفصة لسه صغيرة على الحجاب والكلام الكبير ده

= ممكن تفتح المصحف سورة النور الآية (31)

" (وَقُلْ لِلْمُؤْمِنَاتِ يَغْضُضْنَ مِنْ أَبْصَارِهِنَّ وَيَحْفَظْنَ فُرُوجَهُنَّ وَلَا يُبْدِينَ زِينَتَهُنَّ إِلَّا مَا ظَهَرَ مِنْهَا وَلْيَضْرِبْنَ بِخُمُرِهِنَّ عَلَى جُيُوبِهِنَّ وَلَا يُبْدِينَ زِينَتَهُنَّ إِلَّا لِبُعُولَتِهِنَّ… )

= طب ممكن تفتح سورة الأحزاب الآية (59)

" ( يَا أَيُّهَا النَّبِيُّ قُلْ لِأَزْوَاجِكَ وَبَنَاتِكَ وَنِسَاءِ الْمُؤْمِنِينَ يُدْنِينَ عَلَيْهِنَّ مِنْ جَلَابِيبِهِنَّ ذَلِكَ أَدْنَىٰ أَنْ يُعْرَفْنَ فَلَا يُؤْذَيْنَ وَكَانَ اللهُ غَفُورًا رَحِيمًا )

" تقدر تدور في تفسير الآيات وهتلاقي ربنا قال بنات المؤمنين ، مقالش الكبار بس ولا حدد سن معين ، ربنا سبحانه وتعالى أمرنا بالستر ومفيش أفضل من الحجاب ستر لينا في الدنيا ، حفصة كبيرة كفاية يا باشمهندس عشان تلبس الحجاب

أنا لازم استأذن عشان عندي حصة ومينفعش اتأخر ، عن اذنك

*يعني إيه مش عارف فرضية الحجاب؟ يعني إيه جاي يناقشني في حاجة بديهية ! إزاي ده بني آدم مسلم عايش معانا ع الكوكب.. يارب أنا قلت مستعدة أناقش الناس واقنعهم بس بشئ واجب الشرح مش بديهيات

-بتكلمي نفسك يا غزال ؟!

= بكلم نفسي آه ، إنتِ لو مكاني كنتِ رحتي السرايا الصفرا

-ليه يعني كل ده ؟

= مش مهم سلام عشان ورايا حصة

*خلصت يومي وروحت البيت ، ملجأي الوحيد بعد يوم طويل بين حصص وصداع وطلبة وأسئلة كتير ونقاشات ..نقاشات آه افتكرت الأخ اللي بيناقشني في فرضية الحجاب ودعيتله بالهدايا يمكن الدعوة تكون من نصيبه

= ماما هو ممكن حد كبير وعاقل وباين عليه مُتعلم يبقى مش عارف بديهيات الدين والأحكام الشرعية ؟

~ آه يا حبيبتي جايز ، بتختلف من حيث البيت اللي نشأ فيه والأسرة ودي كلها بتعتبر أرزاق

=أرزاق إزاي يا ماما أنا بتكلم عن البديهيات

~ يا حبيبتي في ناس رزقهم بيبقى بيت ملتزم ومهتم بالدين وناس تانية رزقهم في الفلوس وناس رزقهم صحة وكده .. فهمتيني ؟

= تمام فهماكي.. بس ليه الإنسان ميحاولش يدور على الصح والدين والحقيقة ؟

~ عشان متعودتش أو يمكن الحياة شغلته عن دينه ودول اللي ربنا قال عنهم في القرآن غافلون ، عارفة يا حبيبتي دايماً أحمدي ربنا على النعمة اللي ادهالك ومنعها عن غيرك ، اتعودي دايما تقولي اللهم لك الحمد أنت الرزاق الكريم، لك الحمد ما ذكرك الذاكرون، ولك الحمد ما غفل عن ذكرك الغافلون

=الحمد لله دائماً وأبداً ، أنا هقوم أنام عشان شغلي الصبح

*وجود أمي في حياتي نعمة من عند ربنا ، حقيقي معرفش من غيرها كان مين هيطمني ويفهمني ويسمع كلامي ويحل المشاكل والعقد ، أمي دي كائن ملائكي نزل من عند ربنا فعلاً الجنة تحت أقدام الأمهات

▪︎مر شهر كامل ومفيش وجود لـ حفصة في المدرسة ومش بتروح دروس ولا حتى المدرسة عارفة توصلها ، الموضوع كان مُقلق بالنسبة ليا لإن دي مش عادتها في الغياب المتكرر و كمان بدون أعذار

=بعد اذنك كنت عايزة ملف طالبة اسمها حفصة رياض

¤ في مشكلة أقدر أساعدك فيها

=لأ إطلاقاً هي بس متغيبة بقالها فترة وكنت عايزة أوصلها

*خدت عنوانها من الملف وقررت أروحلها ما هو مش معقول تغيب شهر من غير ما اسأل عنها ، يعني مش عشان أشوف أخوها تاني .. تؤ تؤ هتطمن عليها

وصلت البيت ووقفت ، حاجة جوايا منعتني أخبط لكن عقلي قاوم وأمر ايدي إنها تترفع وتخبط ، اللي فتحلي أخوها

شكله مختلف ، حزين وتحت عيونه أسود دليل إنه مكنش بينام ، هيئته تخوف وكأن فيه عِلة أصابته ، هيئته رعبت قلبي وكأن حد غالي عليا هو اللي مريض ، اتلخبطت المفروض إني أسال على أخته ولكن بدون مقدمات لقيتني بسأله عن حاله وسر حزنه وكأنه إبني مش مجرد أخ لطالبة عندي

عرفت سر الغياب الدائم ليها ، عرفت السر اللي استخبى عني شهر كامل مع إن من حقي أعرف

مشيت وأنا قلبي حزين على شكله وفرحان بإنه السبب في التغيير ، رحلة تفكير داهمتهم طول الشهر اللي فات ، بحث عن الحقايق من وقت ما مشي من مكتبي تدوير في التفسيرات والكتب والفيديوهات على المواقع

نقدر نقدر نقول إن المقابلة سر إلهي لتغيير شخص أو إحياؤه بمعنى أصح ، المقابلة كانت هي النور اللي أضاء ظلمته وأظهر له ما خفي عنه

طلب مساعدتي في إني أشد إيده للطريق المستقيم ، خفت .. أكيد دي لعبة الشيطان في إنه يغويني ويجرني للطريق الغلط ، يارب لأ إلهمني الصواب ودلني للطريق الصح ، ربنا قال في كتابه ( يَا بَنِي آدَمَ لَا يَفْتِنَنَّكُمُ الشَّيْطَانُ كَمَا أَخْرَجَ أَبَوَيْكُمْ مِنَ الْجَنَّةِ )

اعتذرت منه ودليته على الطريق الصح ، قلتله يفتح سورة النساء الآية (25) " ولا متخذات أخدان " ويفتح سورة المائدة الآية (5) " ولا متخذي أخدان "

مشيت .. بس المرة دي غير اللي فاتت في شيء اتحرك في قلبي بس لأ، مش ممكن يحصل حاجة كده ، مش ممكن إيه ده مستحيل

هو مجرد صعبان عليا حاله واللي وصله ، شكله يرعب مكنش في إيدي شيء غير إني أدعيله وبس

قال رسول الله ﷺ: « وَلَا يَرُدُّ الْقَدَرَ إِلَّا الدُّعَاءُ »

مسبتش لحظة إلا وكان مذكور في دعائي وبدون إرادتي قلبي طَب ، مع إني قفلت كل الطرق بس وقعت مكنش عندي حل غير إني أدعي بالصالح ليا وبس ، معنديش طاقة اتساب ومعنديش طاقة ادخل علاقة بس تأتي الرياح دايما بغير ما تشتهيه السفن

-طنط قالتلك على العريس

=تاني ؟! يا جماعة إنتو مش بتتعبوا ، طب والله أنا تعبتكلم سلف

-آه تاني وتالت ، المرة دي الولد كويس بجد وملتزم واكيد هيحافظ عليكِ وعلى قلبك ، متخليش خوفك يسيطر على قراراتك ، خدي الخطوة وتوكلي على ربنا

=كويس وملتزم ، جه في بالي أخو حفصة .. إيه ده أنا معرفش اسمه لغاية دلوقتي ومهتمتش ، حتى في دعوتي كنت بدعي بقلبي ونيتي رايحة ليه هو

" مش ناوية تبصيلي ؟

آه وافقت يتحدد معاد بعد ما صليت استخارة ، المرة دي إحساسي مختلف حاسة بشيء غريب ومختلف ، إحساس لطيف محستهوش قبل كده ، راحة بال .. اطمئنان .. آمان وده كفاية

=إنتَ ؟

"كنتِ مستنية حد غيري ؟

= لأ

" يعني كنتِ مستنياني ؟

= هاا لأ

" طب معندكيش فضول تعرفي اسمي !

=لأ

" هعتبر إنك طلبتي تعرفيني

إسمي مازن رياض مهندس ديكور ملتزم بفضلك بعد ربنا سبحانه وتعالى

=مازن ؟

اتصدمت .. ده نفس العريس اللي اتقدملى وانا رفضته بدل المرة كتير، غريب الإصرار مين فاهمه ؟

" آه مازن .. اللي اترفض 17 مرة وجايلك تاني ، بس المرة دي مختلف

المرة دي جاي وأنا استحقك واستحق قلبك ، في مقولة بتقول من القلب للقلب رسول واعتقد اللي في قلبي واصلك من غير ما اتكلم

= مش هكدب واقول متطمنتش ، لأ اتطمنت وأوي كمان

‏"دائمًا ما أقول بأن الإطمئنان هو المنشود الأول قبل الحب، لذلك يبقى من تطمئن معه عالقًا بك حتى الفناء ، لذا قررت إكمال ما تبقى من عمري مع من حاول من أجلي ، مع من أدخل الإطمئنان إلى قلبي وأعاننى على تغيير ما أثبته لي العالم ، كل الرجال ليسوا أسوياء "

الرجال أصناف .. لذا اختاري ما يناسبك وليس ما تريديه ♥️

#آلاء_أيمن