❤️
=ماما انا داخله البلكونه.
-لسه مجاش من الشغل، متحيريش نفسك.
=هوا مين دا يا ماما.
-الى انتى كل شويه تتدخلى البلكونه عشانه.
=انا مبدخلش عشان حد، بشم هوا بس.
-يا سلام بتشمى هوا كل ٥ دقايق مره... تعالى يا شروق اقعدى.
قعدت جمبها =نعم.
-متعشميش نفسك بحد مش موجود يا بنتى.. احمد اه مش وحش شاب محترم وفى كل المميزات بس مقدمش خطوه يا بنتى، متعلقيش روحك بسراب يا شروق.
حضنتها =انا بحبه يا ماما.. بحبه اووى والله هوا يجى بس وانا والله ما هزعله ابدا، هخليه دايما مبسوط بس هوا يجى،، انا مبقتش اقدر احب غيره يا امى معدش ينفع.
"٤ سنين، بقالى ٤ سنين بحبه.. احمد جارنا قضينا طفولتنا كلها مع بعض نلعب ونغنى لحد ما وصلنا ثانوى و وقتها كان لازم يسافر القاهره عشان شغل بابه، رجع بالظبط من ٤سنين ونصف لما بابه ساب شغله، رجع احسن من الاول بكتير، ولحسن حظى او سوءه معرفش مجموعه جاب نفس كليتى ودخلنا كليه واحده، من وقت ما رجع وانا حاسه بمشاعر مختلفه، نبره صوته اتغيرت بس احلوت ملامحه هديت كتير عن الاول، فى خلال لل٣ سنين الى غابهم منستهوش ولا لحظه بس مكنتش بفكر كتير كده، يمكن اكون كدبت اما قولت حبيته من ٤ سنين، يمكن اكون حبيته من وقت ما كنا أطفال معرفش، بس الى اعرفه انى حبيته، بقالى ٤ سنين مفيش صلاه صليتها من غير ما ادعى بيه، يمكن محصلش بينا مواقف كتير من يوم ما رجع هما كام مره صادفت نركب نفس العربيه مع بعض، او ورق بحتاجه منه بحكم اننا فى نفس الكليه ودى طبعا بتكون حجه عشان اشوفه.....
-انا رايحه عند طنط ليلى، هتيجى معايا؟
=هوا احمد هناك؟
-معرفش.
=طب روحي.. ولا اقولك استنى اجى معاكى ممكن يكون هناك.
-دا مبقاش حب دا جنان.
=يلا انا جاهزه.
-يلا يا اخره صبرى.
-بتدورى على حاجه يا شروق.
=لا يا طنط ابدآ هدور على ايه يعنى.
-عليا مثلا.
=احمد.. هوا انت هنا.
-اااه انا هنا.. عامله ايه؟
=الحمد لله.. وانت؟
-بقيت كويس... تعالى نشرب الشاى فى البلكونه
بقالنا كتير مقعدناش مع بعض.
=حاضر جايه.
"مش محتاجه اوصف وقتها قلبى كان بيعمل ازاى.. كنت حاسه انه هيطلع من جوايا بجد.. مجرد وجود احمد حواليا بيراضينى.. بيفرح قلبى بيخلينى طايره.. حتى لو مقالش حاجه.. حتى لو محبنيش كفايه انه فى حياتى.. وكفايه انى بحبه."
-احكيلى بتعملى ايه فى حياتك.
=عادى ولا حاجه.. بروح الكليه وارجع انام وخلاص على كده.
-حاسس فيكى حاجه متغيره.
=متغيره ازاى يعنى.
-يعنى كان روحك انطفت.
=من وقت غيابك.
-انا اسف.
=متعتذرش.. انت كنت مضطر.
-ودلوقتى رجعت يعنى روحك مينفعش تفضل مطفيه كده.
=هعمل اى يعنى؟
-اااا تعالى نحكى ال حصل ف خلال الكام سنه ال غبناهم عن بعض.
=قصدك ال انت غبتهم عنى.
-والله العظيم ما كان ف ايدى حاجه اعملها.. تعالى نصلح ال باظ ف الكام سنه دول.
=ماشى يا سيدى وانا موافقه.
-طيب احكيلى عنك عن صحابك عن حياتك اى ال حصل وانا مش موجود.
=عارف انا تقريبا مكنش عندى صحاب اصلا كل ال اتعاملت معاهم محدش فيهم كان بيعاملنى زيك كنت تقريبا بدور ع حنيتك ف كل حد اعرفه بس ملقتش فا كملت لوحدى لحد ما دخلت الكليه وقابلت آيه وبقينا صحاب اوى.
-وياترى آيه فهمتك زى؟
=لا بس آيه حبتنى بجد وانا حبيتها وبقينا صحاب جدا.. احكيلى انت عملت اى؟
-كان عندي صحاب كتير الحقيقه ولاد وبنات مش هكدب عليكى بس انتى كنتى غير.. معرفش اى السبب بس محستش انه ينفع يبقى فيه حد زيك اصلا.
=حبيت حد ف خلال الفتره دى؟
-لا يا بنتى حب اى وبتاع اى انا مركز ف تعليمى وبس ومش شاغلنى حوار الحب دا.
=يعنى انت حتى مش بتفكر تحب دلوقتى؟
-الحب مش بيجى بالتفكير يا شروق الحب بيجى كده لوحده من غير تفكير ومن غير حسابات ومن غير ما تكونى مقرره اى حاجه فجأه كده بتلاقى نفسك بتحبى.
=ماما بتنادى لازم امشى.
-كانت سهره لطيفه لازم نكررها.
=حاضر.. تصبح ع خير.
"كنت شبه العيل الصغير وقت ما رجعت كنت مبسوطه لدرجه انه قلبى كان هيخرج بره ضلوعى.. انا كنت قاعده معاه وبنحكى ونتكلم وكنت سامعه صوته كمان وكان بيتكلم معايا انا.. انا بس"
فات اسبوع من غير ما اشوفه كنت حاسه انه روحى هتتطلع منى ودا اقل وصف والله مكنش ينفع اروح اشوفه ولا ينفع اقول انه وحشنى.
=ماما اى رأيك نروح نقعد مع طنط ليلى شويه النهارده.
-لى يا حبيبتي؟
=عادى يا ماما نطمن عليهم بس.
-لا مش النهارده كده كده هنروح بعد بكره عشان أحمد.
=ليه ماله احمد؟
-هيخطب.
=هيخطب ازاى يعنى؟
-هيخطب زى الناس يا شروق.. انا حذرتك قبل كده يا بنتى قولت لك بلاش.. بلاش تعلقى قلبك بشخص مش مضمون.. احمد معلهوش لوم يا شروق.
=يعنى انا ال عليا اللوم يا ماما؟
-يا بنتى الحجات دى نصيب مش بأيدينا.
=وليه ميبقاش نصيبى هوا يعنى كتير عليا.. انا والله والله عمر ما حد هيحبه قدى انا متآكده.. انا كنت مستعده أضحى بحياتى عشانه والله مقابل انه يحبنى بس.
-لا بأيده ولا بأيدينا يا بنتى..والقلوب ال بتختار يا بنتى مش احنا.
"سبتها ودخلت اوضتى وانا مخضوضه.. لسه مش مستوعبه.. انا بحبه اوى والله وفكره انه يكون مع غيرى مش داخله عقلى هوا ازاى ممكن حد يحب حد كده وف الآخر يروح من ايده.. بس هوا مكنش ف ايدى اصلا عشان يروح.. مبقتش عارفه اقول ياريته ما رجع ولا كويس انه رجع وشوفته.. مش عارفه انا مبقتش عارفه حاجه "
-مختفيه فين كل دا؟
" كانت مسدج من أحمد ع الوتس اب "
=مش مختفيه ولا حاجه انا بس تعبانه شويه.
-تعبانه مالك.. انتى كويسه؟
=اه اه متقلقش... هتخطب؟
-انتى عرفتى؟
=اى مكنتش عايزنى اعرف؟
-لا مش كده والله بس انا لسه مش متأكد.
=اى مش بتحبها؟
-لا بحبها بس لسه مش عارف اى ال هيحصل.
"اجابته وجعت قلبى اوى لدرجة انى منمتش طول الليل وحتى باقى مسدجاته مردتش عليها.. بيحبها وهنا هتقف كل حاجه وهنا مفروض ابطل احبه ومفروض اخلي قلبى يبطل يدق عشانه مش كده بس الحب مفيهوش مفروض ف الحب دايما لازم نخالف القاعده.. مكنش ينفع افضل شيفاه قدامى وهوا بيخطب وبيتجوز خصوصا انه هيستقر هنا ف العماره فا كان لازم انا ال ابعد.. سافرت القاهره اسبوع عند خالتى عشان افصل شويه ومبقاش شيفاه قدامى طول الوقت "
-تفتكرى الهروب هوا الحل.
=انا عارفه انه مش حل.. بس انا مش قادره اشوفه قدامي وهوا بيخطب وبيتجوز ويخلف مش قادره اشوف دا.
-مش قادره يبقى تهربى ع طول مش كده.
=تفتكرى كان مفروض افضل.. هوا انا عمرى فى كام سنه عشان اضيعهم وانا بتفرج عليه وهوا بيعيش حياته مع حد غيرى.
-هترجعى امته؟
=لما احس اني بقيت احسن هرجع.
"بقالى هنا اسبوعين مسمعتش اخبار خالص عنه وحتى بتجنب انى اسأل ماما عليه ومع انه مش موجود ومع انى مش عارفه حاجه عنه الا انى لسه بعيط كل يوم.. لسه بفتكر تفاصيله بالأيام والليالى من قبل ما يسافر وحتى بعد ما رجع.. بقعد اسأل نفسي انا ليه مش عارفه انسى.. لى مش عارفه اتخطى واعيش.. لى واقفه مكانى من وقتها مش حرام نعمل كده ف نفسنا مش حرام نوجعها اوى كده عشان حد مش حاسس بينا وبوجعنا ومن هنا قررت ارجع اسكندريه.. قررت أوجه حتى لو هتوجع شويه بس كده كده هيبقى امر واقع"
-احكيلى عملتى اى عند خالتك.
=معملتش حاجه يا ماما.. منزلتش م البيت خالص تقريبا.
-للدرجه دى بتحبيه؟
=متجبيش سيرته تانى عشان خاطرى.
-طيب هوا مخطبش ع فكره.
=لى.
-محصلش نصيب مش اكتر.
" للحظه رجع لى الأمل تانى.. للحظه حسيت انه ممكن يبقى لى من تانى وابقى انا ف حياته.. بس ف اللحظه ال وراها مسيبتش الأمل دا يتمكن منى عشان مينفعش.. مينفعش نعيش ع امل لحاجه مش موجوده اصلا.. لحاجه مش هتحصل"
بدأت ارجع حياتى طبيعى كنت تقريبا حافظه مواعيد خروجه وروجوعه فا كنت بتجنب انزل فيهم يا انزل بعده يا قبله اما معاه فا انا مقدرش اعمل كده.
-ياااه اخيرا شوفتك.
=اذيك يا احمد.
-اذيك يا احمد بس كده مفيش حاجه تانيه عايزه تقوليها.
=هقول اى يعنى.. بعد اذنك عشان متأخره.
"كان أول مره اشوفه من ٤ شهور عدوا.. كنت بدأت ابقى كويسه وانساه او كنت بقول كده لحد ما شوفته وقلبى دق بنفس الطريقة وهنا عرفت انه احمد بالنسبه لى بقا المرض ال ممنهوش علاج وهكمل حياتى كلها مريضه بيه وبحبه"
رجعنا تانى صحاب ورجعنا تانى نشوف بعض كتير ورجعنا تانى نقرب من بعض.. كانت فتره الامتحنات جت وكنا بنذاكر سوا واسيبه ع وقت النوم ونصحى نبدأ تانى يوم مع بعض من أوله لحد ما نيجى ننام.. حسيت حياتى بدأت تظبط.. انا رجعت كويسه من تانى نورت من تانى.. وف كل يوم كان بيعدى كان حبه جوايا بيكبر اكتر من اليوم ال قبله.
-ها فهمتى؟
=لا مش فاهمه.
-يا بنتى دى ام مسئله مش عارفه تفهميها.. حرام عليكى بقالى ساعتين بشرح فيها.
=اعمل يا احمد يعنى هيا ال صعبه.
-ميمشيش معاكى انه انتى ال غبيه.
=انا غبيه يا احمد.
-اجمل غبيه ف العالم والله.
"كلامه بدأ يبقى لطيف.. كنا بنضحك كتير اوى ف خلال الوقت ال بنقضيه مع بعض.. كنت مبسوطه اووى.. كفايه انه هنا"
=ياه اخيرا هنذاكر ل اخر ماده مش مصدقه بجد.
-مبسوطه؟
=جدا.. انت مش مبسوط ولا اى؟
-بصراحه لا.
=ليه؟
-عشان مش هنقعد قعدتنا دى تانى.
=عادى يا احمد نقعد مش لازم عشان نذاكر يعنى.
-تفتكرى هيكون طول اليوم؟
=لا طبعا بس اكيد هنقعد مع بعض يعني.
-لا انا عايز نقعد مع بعض طول اليوم.
=ودى هنعملها ازاى بقا ان شاء الله؟
-اااا انا عندى فكره.
=اشجينى.
-نتجوز.
= قولت اى؟
-ناكل.. تحبى ناكل شكلك جعانه؟
=متستهبلش.. انت قولت اى؟
-كنت بسألك جعانه.
=لا انت قولت نتجوز.. قولت كده صح؟
-اه قولت كده.
=ويا ترى عايز نتجوز لى.
-عشان نقعد مع بعض طول اليوم زى دلوقتى.
=بس؟
-وعشان بحب اقعد معاكي.
=وبس؟
-وعشان مبعرفش اكل لوحدى وبحب اكل معاكى.
=واى كمان؟
-وعشان بحبك.
=قولت اى؟
-قولت بحبك.
=انا سمعت صح مش كده.. انت قولت بحبك؟
-اه قولت بحبك.. مخضوضه لى.. انا يا ستى بحبك من زمان هوا يعنى انا لسه مكتشف دا قريب بس اما اكتشفته عرفت انى بحبك من زمان اووى.. بس كنت مغفل للأسف.. ها مش هتقولى بتحبينى من امته.
=مين قال اني بحبك اصلا؟
-انا ال قولت.
=وانت تقول بصفتك اى؟
-ااا بصفتى اى.. بصفتى بحبك مثلا.
=مش صفه تخليك تقرر حاجه زى دى يعنى.
-تقصدى انك مش بتحبينى يعنى.
=مقولتش كده.
-اومال قولتى اى.
=مقولتش بس هقول.
-هتقولى اى.
=هقول انى بحبك.
رايكوا مهم ❤️ تمت