🖤

..(الفصل الرابع)..... 

بقلم (رقيه عبد الباسط) 

صليت العشاء بعد ماليوم خلص وقومت مسكت التليفون وفتحته.....

لاقيت ٢٥٠ رساله و١١٠ مكالمه فايته ده غير ال٧٥ رساله وتس اللى وصلولى اول مافتحت النت واللى هو كمان كان لسه بيبعت بردو...

اول مافتحت النت وصله أن الرسائل اتبعتتلى فبدأ يبعت ويقول:

_انا عارف انك فتحتى .. ردى بقى 

فتحت الوتس وفعلا رديت عليه:

_نعم!!!!!؟

_حرام عليكى طول اليوم قافله مش عارف اوصلك.....

_.......

_انا اسف يامريم .. انا اسف ع اللى قولته بس صدقيني انا مش بكدب 

_......

_انا مش من الشباب بتوع اليومين دول ولا ليا ف جو الشبابيك ده خالص 

_......

_انا بحبك بجد والله وربنا يشهد ع كلامى ليكى 

_.........

_مريم انا عمرى ماقولتلك اى كلمه وحشه وانتى عارفه كده كويس ..

_.......

_ممكن تردى عليا بقى !!!!!!!

_احمد...

_نعم يا مريم 

_انت عاوز اى دلوقت ؟!

_انا مش طالب غير الحلال 

_بمعنى!!!!!

_انا عاوز اعف نفسى 

_العفه دى بقى بأنك عاوز تقضيها معايا ع النت صح 

_ابدا والله ... انا عاوز اتقدملك إن شاء الله 

_والله!!!!!!!

_والله ... انا مستعد اجيلكم دلوقت واطلبك من ابوكى عشان تصدقى انى مش بلعب ولا بتسلا.....

عدى فتره ع الكلام ده وكنت كل يوم بتعلق بيه اكتر م اليوم اللى قبله...

كل يوم تعلقى بيه كان بيزيد ... أو تعلقى بكلامه عشان اكون صادقه...

كنت بعشق اهتمامه بيا وخوفه عليا.....

طريقه كلامه معايا عمرها ماتقول أنه مجرد واحد بيتسلى أو بيلعب ببنات الناس.....

حبيته وبقيت بنام كل يوم ع صوته وانا لابسه الهاند فرى وهو بيقرالى قرآن.....

كنت اسيب المكالمه مفتوحه وانام وهو لسه بيقرالى قرآن.....

كنت بحب اسمعه وهو بيقرأ السوره اللى كانت ع أسمى ف القران ...

سوره مريم.....

ف خلال الفتره دى صارحته انا كمان بحبى ليه وكان رده:

_انا حاسس انى بحلم 

كانت اجمل فتره عيشتها ف حياتى واحلى وقت كان وقت لما أكلمه.....

عدى شهر على ارتباطنا ببعض.....

وف يوم كنت بكلمه زى كل مره في التلفون فقام قالى:

_حبيبتى

_نعم ياحبيبى 

_ انا عاوز اشوفك 

_....نعم!!!!!

_عاوز اشوف حبيبتى 

_ازاى يعنى مش فاهمه 

_نفسى اشوفك يامريم 

_تشوفنى فين يعنى مش فاهمه 

_ابعتيلى صورتك..........

(يتبع)

...______---------

البارت الخامس

بقلم (رقيه عبد الباسط) 

_ابعتيلى صورتك.....

ابعت صورتى .. للدرجه دى هو شايفنى رخيصه وممكن ابعتله صورى .. هو شايفنى اى ؟!!!!!

_يابنتى!!!

_.....

_الو

_ايوه ياحمد 

_فى اى ياحبيبتى 

_مفيش حاجه .. انا هقفل دلوقت عشان هروح اعمل حاجه 

_حاجه اى دى .. وبعدين احنا بنتكلم !!!

_معلش 

_طب هتروحى تعملى اى ؟!

_هصلى.....

_هتصلى !

_ايوه هصلى 

_بس الساعه دلوقت ١ هتصلى اى 

_هصلى قيام الليل واجى 

_تمام .. انا كمان هصليه وادعيلنا ياحبيبتى.....

قفلت معاه السكه .. رميت التليفون ع السرير وقومت روحت الحمام عشان اتوضأ 

حسيت أن ربنا وحشنى ف الوقت ده ...

انا مش عوزه اعمل حاجه غلط تغضبه .. بس انا بحب احمد .. اكيد ربنا مش هيكسر خاطرى وهيجمعنى بيه ف حلاله .....

اتوضيت ولبست الاسدال بتاعى وفرشت سجادتى وصليت...

صليت قيام الليل.....

اخر مره احمد قالى اقوم اصلي قيام الليل فيها كانت قبل مايقولى إنه بيحبنى.....

صليت القيام وعيطت .. عيطت بعد ماخلصت صلاه .. عيطت وفضفضت لربنا وطلعت كل اللى ف قلبى 

وبعد ماهديت خلاص روحت طالعه مرميه ع السرير.....

..............................................

كنت واقفه ف قاعه كبيره من قاعات الافراح.....

كنت لابسه فستان ابيض جميل اوى .. شعرى لونه كان لون اشعه الشمس .. رائحه عطره كانت ماليه المكان من حوليا .. القاعه كانت مليانه ناس كتير اعرفهم .. ابويا وامى واخواتى واهلى كلهم وكانت الناحيه التانيه من القاعه .. كان فيها ناس لكن عمرى ماشوفتهم قبل كده .. بأستثناء واحد بس هو اللى كان اعرفه فيهم .. 

كان احمد.....

كان لابس بدله سودا شيك جدا .. شكله كان وسيم اوى .. كان باصصلى وبيبتسملى .....

بدأ يمشى ناحيتى .. جاه ووقف قودامى .. وهو لسه بيبتسملى .. قرب منى عشان يقولى حاجه ف ودنى.....

وصحيت ع صوت ماما وهى بتصحينى.....

_يامريم .. انتى يابنتى .. اصحى بقى 

_ امممم

_قومى فى حد عوزك برا

_حد مين ياماما 

_م الناس بتوع خدمه التوصيل للمنازل دول يابنتى بيقول ان الاستاذه مريم كلمتنا واشترت حاجات 

_حاجات اى بس .. طب حاضر انا هقوم اشوف فى اى 

خرجت ماما وانا قومت ظبطت نفسى وخرجت عشان اشوف فى اى 

روحت ناحيه الباب اللى كان متوارب .. 

فتحت الباب...

ولاقيته....

#يتبع

-----------__________----------_______---

. الفصل السادس

فتحت الباب...

ولاقيته.....

احمد.....

كان واقف قوصادى .. ماسك علبه ملفوفه .. بيبتسملى .. وبيقول

_اتفضلى يافندم .. اسفين ع التأخير

كنت واقفه مخشبه ..

ازاى اصحى م النوم وانا لسه حالماه الاقيه ف وشى ..

ازاى جالى البيت ..

ازاى احمد واقف قوصادى دلوقت وشايفنى وانا شايفاه وجها لوجهه من غير وتس ورسايل ولا مكالمات ولاشات ولا اى حاجه

مدلى ايده بالعلبه اللى كان ماسكها

_اتفضلى يافندم .. حضرتك انسه مريم صح كده يافندم

_......

_حضرتك سامعانى يافندم

_هاا!!!!!!!

_اتفضلى

اخدت منه العلبه وانا حاسه انى ف عالم تانى ..

احمد اللى كل كلامى معاه واللى حدود علاقتى بيه كانت سوشيال وبس .. بقى دلوقت واقف قودامى وبيتكلم معايا

بعد ماادانى العلبه راح مشى .. سرحت فيه وهو نازل م ع السلم وانا اعصابى كلها حساها باظت

معقوله ده احمد

ولا ده حد شبهه وانا اللى بخرف

اكيد هو يعنى ماهى مش محتاجه

يالهوى ياانى ياامه مش معقوله يكون هو

فوقت ع صوت ماما

_بت يامريم

_هااا ن نعم نعم ياماما

_اى يابت انتى اتلبستى ولااى

_لا لا انا كويسه اهو

_اى العلبه دى وحاجات اى دى بقى اللى كنتى طالباها

_حاجات ياماما

قولت الكلمتين دول ودخلت بسرعه ع اوضتى وقفلت الباب قبل ما ماما تشك ف حاجه.....

قعدت ع السرير وحطيت العلبه قودامى

مسكت تليفونى لاقيته فاصل شحن

حطيته ع الشحن

ومديت ايدى للعلبه عشان افتحها

ايدى كانت بتترعش معرفش ليه

فكيت اللفه اللى حولين العلبه

العلبه كانت متوسطه الحجم

فكيت اللفه خالص وفتحت العلبه

لاقيت فيها تليفون ايفون .. كان جديد بعلبته زى ماهو

انصدمت .. معقوله اشترالى تليفون ليا انا

خدت التليفون م جوا العلبه .. لاقيت ورقه كانت تحتيه .. حطيت التليفون ع السرير .. وفتحت الورقه وبدأت أقرأ

_مريم حبيبتى .. انا اسف يانور عيونى .. اسف انى انبارح قولتلك ابعتى صورتك .. وعد مش هقولك كده تانى ولا هحسسك انك وحشه ابدا .. انا عارف انك لما قفلتى بحجه الصلاه فده كان لأنك مكنتيش عاوزه تبعتيلى حاجه .. انتى بالحركه دى عليتى ف نظرى .. انا طالب منك حاجه واحده بس .. لا صور ولا فيديوهات .. انا عاوز اشوفك النهارده بس ونقعد نتكلم مع بعض شويه .. هستناكى ف الكافيه ال(.....) الساعه (......)

اوعى تتأخرى عليا

بحبك ❤️

قفلت الورقه وانا مشاعرى متلخبطه

فرح ع خوف ع قلق ع انبساط

مبقتش عارفه انا اى بالظبط

الحاجه الوحيده اللى كنت عارفاها

هى انى هقابله النهارده.....

#يتبع