...

Фарғона вилояти ҳокимлигининг инвестициялар ва ташқи савдо комплекси Жанубий Кореянинг “Daedong” компанияси билан вилоятда дастлабки босқичда культиватор (моторблок) ва кейинчалик трактор, комбайнлар ишлаб чиқаришни йўлга қўйиш бўйича музокаралар олиб бормоқда.

Ҳозирда мазкур компания ўзи ишлаб чиқарган DT100N культиватори ва икки нафар мутахассисини вилоят салоҳиятини ўрганиш ҳамда ушбу лойиҳанинг аҳамияти борасида ички талабни ўрганиш учун Фарғонага юборган.

Учкўприк туманида карантин қоидаларига амал қилинган ҳолда ташкил этилган учрашувда кореяликлар Бешариқ, Бағдод, Фурқат, Учкўприк туманларидан ташриф буюрган фермер хўжалиги раҳбарлари, қишлоқ хўжалиги техникаси савдоси билан фаолият юритадиган тадбиркорлик субъектлари билан суҳбат олиб борди. Музокара мобайнида “Daedong” компанияси фаолияти ва DT100N культиватори борасида қисқача маълумот берилиб, ушбу техника амалда ишлатиб кўрсатилди.

Ушбу турдаги культиватор, ер ҳайдаш, пушта олиш, дала ва боғ майдонларини суғориш, дорилаш ҳамда юк (одам ва буюмлар) ташишга мўлжалланган. 

Кўп функцияли культиватор йиғилганларда қизиқиш уйғотди. Компания томонидан йиғилганлар фикрини билиш мақсадида тарқатилган сўровномалар тўлдирилди. Риштон ҳамда Фарғона туманларида ҳудди шундай тақдимотлар ўтказиш режалаштирилган.

М.Сулаймонов, ЎзА

AGROBLOGER канали