...
-خدامة،بتشتغلى خدامة فى البيوت..بتشحتى عليا،بتذلى نفسك للناس ليه؟
-ياماما اسمعينى
-مش عاوزة اشوف وشك تانى
-ماما بصى انا جبت اعلى درجة على الفصل كله،طلعت اشطر واحدة
-انا بنتى طول عمرها شاطرة وهتطلع احسن دكتورة تعالج الناس وتخفف عنهم مش كدة!
-كدة ياماما انا اصلا عاوزة اطلع دكتورة علشان يبقى معايا فلوس كتيرة واجبلك كل اللى نفسك فيه ده احنا ياماما معانا واحدة ابوها دكتور وبتلبس لبس جميل اوى والمدرسين بيعاملوها كويس
-بصى ياحبيبتى انتى مش صغيرة كلية الطب صعبة ومشوارها اصعب بس اهم حاجة النية ،ابو صاحبتك دى تعب كتير علشان يبقى اسمه دكتور وحقه يقدر تعبه بإنه يغلى الكشف طالما هو متعلم وقادر يفيد الناس فعلا ..بس ده ميمنعش ان الانسان اما بيكون بيعامل ربنا فى حياته وكل حاجة البركة بتحل فى الحاجة دى
-يعنى ايه يعنى هيكشف ببلاش
-لا يقدر ظروف الناس فى ناس ظروفها وحشة وبيبان عليها فمش هيخسر حاجة لو سابلهم الكشف او قلل من ثمنه شوية
-طيب وهما ليه معملوش كدة مع بابا ..ليه سابوه يموت علشان احنا مش معانا فلوس
-مين قالك الكلام ده يا آمنة
-انا سمعت عمتى اما كانت بتكلمك ،ذنبه ايه بابا انه كان بيشتغل عامل ووقع وهو بيشتغل ،ذنبه ايه انه مكانش معاه انه يدفع للمستشفى علشان يقبلوا يدخلواه اصلا وسابوه يموت ،فاكرة بابا ياماما ..فاكراه كان سايح فى دمه ازاى اما جرينا نلحقه ومات قدامنا
-علشان كدة ياضنايا مش عاوزة همك يبقى الفلوس ،خلى كل همك انك تساعدى الناس وتخففى عنهم وابوكى هيبقى مرتاح فى تربته
دخلت اوضتى وانا هموم الدنيا فوق قلبى ،ذنبى ايه انى اعيش كل ده وانا واحدة صغيرة ،بس انا لازم اذاكر علشان خاطر اساعد الناس
عديت اولى ثانوى وتانية مكنتش باخد دروس كنت بوفر فلوس معاش بابا علشان نكفى طلبات البيت ودخلت 3ثانوى
وفى يوم كنت طالعة على سلالم بيتنا المتكسرة وانا ببص للسقف اللى مبنى من الخشب واللى خلاص قرب يقع علينا وسمعت خالتى بتقول لماما
-سرطان يالهوى يالهوى سرطان يا اختى ده انتى لسا صغيرة ،ده انتى فى عز شبابك ااااه ياحسرة قلبى عليكى
-بس بس ياعبير كفاية زمان البنت راجعة من المدرسة مش عاوزاها تحس بحاجة ولا تعرف بالله عليكى
-طب وهتعملى ايه هتجيبى مصاريف علاجك منين ووشك اللى لونه اتخطف ده وبان عليكى المرض هتعملى ايه وتقولى لبنتك ايه
-ربنا هيدبرها انا واثقة ان ربنا مش هيسيبنا
نزلت جرى ع السلالم حتى رجلى اتلوت وانا نازلة بس كملت جرى وجع قلبى على امى وعلى ابويا اللى راح منى كان اكبر ..يااارب حلها من عندك يارب دى امى يارب ماليش غيرها من بعدك الحمل زاد عليا يارب ..اعمل ايه ياارب
لقيت حد بيحطلى فلوس فى ايدى ببص لقيتها بنت جميلة ولابسة لبس كويس
-اتفضلى فلوسك انا مش شحاتة
-انا آسفة انا افتكرتك محتاجة فلوس مكنتش اقصد حاجة
-حصل خير
-طب ممكن تحكيلى مالك كنتى بتعيطى ليه على الاقل اساعدك
عياطى زاد وحكيتلها على كل حاجة
-ربنا بيدبرها متقلقيش وسبحان الله شوفى انا برده فى سنة 3 ثانوى زيك وهساعدك بإذن الله وهجبلك ملخصات المدرسين ولو حاجة مش فاهمها اقولهالك ونساعد بعض
-ايوة بس هنتقابل فين
-بصى كدة كدة الاستفادة من المدرسة مش كبيرة اوى لان المعظم مش بيحضر ف ممكن فى وقت المدرسة تجيلى واذاكرلك ومتقلقيش مفيش فى البيت غيرى انا وماما واختى الصغيرة
-ماشى حاضر بإذن الله
مكنتش مصدقة نفسى ده انا كنت لسا رافعة ايدى ليك وبدعيك الحمدلله يارب على كرمك ،الحمدلله ان ربنا هو ربنا.
رجعت البيت ولقيت ماما بتجرى عليا
-كنتى فين، ايه اللى اخرك كدة ،حصلك ايه ؟
-متقاقيش ياماما انا كويسة ده فى واحدة بعد المدرسة كانت بتسألنى على حاجة وقعدت اشرحهالها
-ماشى يابنتى بس بعد كدة متتأخريش عليا تانى
حضنتها وبوست راسها وايديها مش متخيلة انى لقدر الله ممكن ارجع فى يوم ملاقيهاش فى البيت واتحرم من صوتها
من تانى يوم روحت عند سلمى وقعدنا نذاكر ووالدتها ست طيبة اوى زى ماما بس برده مفيش فى حنية امى
بعد ما خلصنا مذاكرة لقيت سلمى طلعت ووالدتها قعدت معايا
-بصى ياحبيبتى سلمى حكيتلى على كل حاجة وانا زى والدتك فاقبلى منى الفلوس دى تساعدى بيها فى علاج والدتك وكل شهر ان شاء الله ليكى زيهم
صعبت عليا نفسى اوى احنا عمرنا ما خدنا مليم من حد جه الوقت اللى انا اذل فى نفسى واذل امى
-بصى ياطنط حضرتك لسا قايلة انك فى مقام والدتى بس انا مش هقدر اقبل الفلوس وانا مش تعبانة فيها وجيالى كدة وخلاص
-طب يابنتى اعمل ايه يرضيكى
-انا ممكن اشتغل هنا اساعد حضرتك فى التنضيف والطبيخ وغيره
-لا يابنتى انا مقبلش بكدة
-الشغل مش عيب ياطنط وانا متأكدة انك هتعاملينى احسن معاملة ،ده غير انى زى سلمى فمفيش فرق غير كدة انا مش هقدر اقبل الفلوس
-خلاص يابنتى اللى يريحك بس برده اعملى حسابك انك هتعملى حاجات قليلة علشان تذاكرى برده وتعدى السنة دى على خير
-حاضر بإذن الله
كانت الدنيا ماشية تمام بذاكر وبشتغل وبحوش فى الفلوس لعلاج ماما لحد ما فى يوم كنت عند سلمى والجرس رن وطنط فتحت وبعدين الباب اتقفل افتكرت ان اللى جه مشى
-اتفضلى ياطنط عملتلك الشاى لحد ما انشر ال...ماما
-خدامة،بتشتغلى خدامة فى البيوت..بتشحتى عليا،بتذلى نفسك للناس ليه؟
-ياماما اسمعينى
-مش عاوزة اشوف وشك تانى
لقيتها وقعت من طولها ،جسمى اتصنم ومقدرتش اتحرك وسلمى اتصلت بالاسعاف وجرينا على المستشفى
-ماما ،ماما حصلها ايه
-هى بخير الضغط وطى عندها فحصلها الاغماء هى بتعانى من اى امراض
-كانسر ..عندها كانسر
-طب ياريت تبدأ فى العلاج بأسرع وقت علشان نلحقه من البداية قبل ماينتشر والف سلامة عليها
-ينفع ندخلها ؟
-اه اتفضلوا.
-ماما
لقيتها لفت وشها الناحية التانية مسكت ايديها وبوستها
-كنتى عاوزة تسبينى وتخضينى عليكى كدة كنتى عاوزة تحسرينى عليكى واشوفك بتحاربى المرض وما اتصرفش
لقيتها بصتلى وعيونها مدمعين
-فاكرانى ما اعرفش ..انا عارفة من زمان ومش هسيبك ابدا تعانى لوحدك كفاية يا أمى ،مش نفسك تخفى وتشوفينى وانا دكتورة وتفرحى بيا ونفرح بابا مش ده كان حلمك ،انا اشتغلت علشان مذلش نفسى وامد ايدى يا امى مش كنتى دايما تقولى الشغل مش عيب انا جمعت مبلغ كويس وكل ده من فضل ربنا ثم طنط ام سلمى وقفوا جمبى وساعدونى هنروح بإذن الله نكشف ونبدأ فى العلاج وانا هكمل السنة دى وبإذن الله ربنا هيحققلنا حلمنا
فضلت طول السنة مكملة فى الشغل وبذاكر مع سلمى وطنط ام سلمى طلبت من ماما تقعد معاها فى الشقة ونقعد مع بعض علشان ناخد بالنا من بعض كلنا..بحمد ربنا ان حط فى طريقة ناس كويسة ومش هنسى جميلهم العمر كله
جه وقت النتيجة والحمدلله ربنا كرمنى انا وسلمى ودخلنا طب سوا فرحة ماما ووشها اللى رجع نور كان بالدنيا ومافيها وتحسنها اللى بقى واضح نتيجة الدعاء ثم العلاج كان كفيل يخلينى اكمل واعافر تانى لحد ما اتخرجت واتعينت فى المستشفى وفى يوم..
-حرام عليكم ياناس الراجل بيموت طب دخلوه وهنتصرف فى الفلوس بس بالله عليكم دخلوه
-ايه الدوشة دى
-يادكتور المريض مش هنقدر نستقبله الا اما يدفع التأمين دى قواعد المستشفى وحضرتك عارفة
-بالله عليكى يابنتى تدخلوه وانا هتصرف فى الفلوس ان شاء الله حتى اشحت بس دخلوه بالله عليكم قالوا محدش هيعرف يعالجه غير هنا
-دخلوا الحالة على مسؤليتى بسرعة
-الله يسترك يابنتى يارب ويبارك فى اللى ربوكى
نفس المستشفى بنفس التوقيت وقت ما كانت امى بتترجى حد ينقذ ابويا وانا واقفة مش بعمل حاجة
وحاليا قدرت اساعد كأنى بساعد بابا بالظبط .