...

Контрабандачилар Қозоғистонга гилос ўрнига ўрик олиб киришга уринган. Шунингдек, наъматак, майиз, гуруч ва бошқа товарлар ҳам контрабанда йўли билан олиб ўтилган. Ушбу далилларни Давлат даромадлари қўмитаси аниқлади, деб хабар бермоқда «АПК Новости«.

Мазкур идоранинг матбуот хизмати хабарига кўра, 1 июнь куни Туркистон вилоятидаги “Қоплонбек” божхона постида божхона кўриги ўтказилаётган маҳал юқори солиқ тўланадиган товарлар (сархил гилос)нинг оғирлигини 9,7 тоннага камайтириш ва нотўғри декларациялаш факти аниқланган.

“Илова қилинган ҳужжатларда сархил гилос ўрнига “ўрик” кўрсатилган, маълумки, ушбу маҳсулот гилосдан бир неча баробар арзон”, дейилади матбуот хизмати хабарида.

Жорий йилнинг 29 май куни “Сариоғаш бекати” божхона постида декларациядан ўтказилмаган умумий оғирлиги 58 тонналик товарлар: гуруч – 30 тонна, наъматак меваси – 5,7 тонна, қуритилган майиз – 4 тонна ва бошқа озиқ-овқат маҳсулотлари олиб кирилган.

Ҳужжатларда қайд этилишича, товарлар «ассортиментдаги қуритилган мевалар» эди.

Одатда, ёз фаслида Қозоғистонга кўплаб сархил ва қуритилган мева-сабзавотлар импорт қилинади, шу муносабат билан Давлат даромадлари қўмитаси назорат-текширув тизимларини муваффақиятли қўлламоқда.

Йил бошидан буён Қозоғистон Республикаси ҳудудига кириб келаётган автотранспорт воситаларини божхона кўригидан ўтказиш натижаларига кўра, 1000 тоннадан зиёд товарларни декларациядан ўтказмаслик фактлари аниқланди.

Ушбу қонунбузарликлар учун ташқи иқтисодий фаолият иштирокчилари жавобгарликка тортилди.

EastFruit

AGROBLOGER канали