😍
_أنت ليه عملت كدة!
_أسف معلش!
_اسف ايه بس خربتلي الفستان!
_ما قولت أسف بقا الله!
ومشي وسابني يعني يغرقلي هدومي مايه وكمان يزعقلي!
عيط جامد وفضلت طول مانا ماشية أعيط لغاية ماوصلت للترابيزة ال قاعدة عليها العيلة وأنا بعيط زي الهبلة بردو اول ماوصل دبدبت برجلي واتكلمت بعياط_ماما انا عايزة امشي
اتخضت_ايه ده ليه اهدي بس! مالك حصل ايه؟!
بعياط_مليش دعوة انا عايزة امشي!
_في ايه طيب قوليلي؟
شهد قامت حضنتني وماما تطبطب عليا والباقي مستغرب وبيهديني وانا بعيط وماسكة في عايزة أمشي
ماما قالت لشهد تاخدني الحمام تهديني
_لا عايزة أمشي!
_معلش هتمسحلك دموعك ونروح ماشي يلا
فضلت أشهق واعيط وانا ماشية معاها دخلنا الحمام قلعتني النقاب وفضلت تهديني وهي مستغربة حالتي المنهارة لغاية ماهديت جابتلي عصير وشربتهولي وظبتطلي النقاب
_مالك بقا عملتي المناحة دي كلها ليه؟
كنت هعيط واتكلمت بنبرة عياط_اصل..
_لأ وحياتك اهدي كدة بعدين قولي!
أتشحتفت_ماشي.. بصي.. هو واحد دلق عليا مايه وزعقلي ومشي
_ايه!
_ايه؟
_كل ده علشان مايه
_وزعقلي!
_تعرفي يا ياسمين لو حد عرف السبب كان هيديكِ على وشك
_حبيبي تسلم!
_يلا ياختي الله يسامحك!
في الحقيقة أنا اصلا كنت راحة التويلت ومدايقة من كذا حاجة الضغط ال عليا كله طلع بسبب البتاع ده فعيط، وماكنتش طايقة القعدة العائلية دي وعايزة أروح فدا زاد عياطي ومجاش على بالي غير عايزة أعيط الهو نينيني بجد!
اول ماوصلنا عندهم ماما سألتها مالها شهد ماتتوصاش قالتلهم وضحكو عليا كلهم وماما طبطبت عليا وهي بتضحك وقالتلي_معلش ياحبيبتي تعيشي وتاخدي غيرها!
عمو وقف وهو فطسان ضحك_ تعالي أما اعرفك على يوسف بقا وعمتك رفيدة
وشاور عليهم
_دي عمتك رفيدة الكانت في فرنسا وده يوسف ابنها سلمت على عمتو وطلعت ودودة خالص وببص ليوسف لقيته هو! الدلق عليا المايه الدموع أتجمعت في عنيا وصوتي أتحشرج ووقفت مصدومة وهو ماسك ضحكه وبمنتهى التلقائية من الحسرة_ أنت هنا من اد أيه؟
فلتت منه ضحكة بعدين مسك نفسه_ من ساعة مادبدبتي برجلك!
أتصدمت تلت دقايق بالعدد بعدها دبدبت في الأرض تاني وعيط وزعقتلهم_أنا عايزة أمشي!
___
وحاليًا قاعدة بكل هدوء ومؤدبة ماسكة الموبايل باصة فيه ومش قادرة ارفع عيني فيهم بعد العملته ماما فضلت تهدي فيا وهي فطسانة ضحك والعيلة كلها كانت هتقع من على الكراسي من الضحك على منظري حقيقي أنا بعد ماخلصت الوصلة دي كان نفسي اضحك أوي بجد ماما قعدتني بينها وبابا علشان اهدى وحقيقي يارتها قعدتني على رصيف سخن ولا القاعدة دي! هو في وشي بالظبط الهو لو رفعت عيوني هيبقى شكلي مسخرة!
فضلنا قاعدين وانا مارفعتش عيني من الموبايل لغاية المغرب ما أذنت اكلنا وقومنا صلينا وأخيرًا هنروح!
خرجنا أنا والستات كلهم للبوابة والرجالة برا
_إلا بقولك ياشهد انتو جبتو سيرتي بعد العملته؟
ضحكت_ أحنا كل مانتكلم في موضوع نسكت شوية ونضحك! وأنتِ الحمدلله انك كنتِ باصة في الموبايل كنتِ ممكن يغم عليكِ من الكسوف!
_على فكرة بقا نينينيني!
ضحكت عليا بعدها بصتلي بتعاطف_معلش يايويو أكيد كان عليكِ ضغط الفترة دي علشان كدة!
اتنهدت بتعب وقولتلها_ادعيلي
في الحقيقة أنا ممتنة لشهد بنت عمتو كتير أنها صديقة مقربة وبتحس بيا كدة والحقيقة اكثر اني مش عارفة أنا كنت بعيط ليه! ولا ورايا ضغط أيه! بس أكيد ضغط الشغل عليا هو السبب وأني مش باخد هدنة فقررت هاخد اجازة كدة واريح نفسي شوية الفترة الجاية!
_العربية مش مكفية ياياسمين معلش اركبي أنتِ وشهد مع عمتك رفيدة
طبعًا كنت هزعق وأقول لأ ركبُه اي حد غيري بس أتكلم أبن ال.. ده أستغفر الله!
_اه طبعًا ياعمي أتفضلو!
ياسخف! أبتسامة سوسن حناكة ياخي والله! خلينا نغتاب خلينا نغتاب أستغفرت ربنا لي وله مع أني مش طايقاه وفضلت طول الطريق ساكتة وباصة من الشباك ومن جوايا نفسي أصرخ _حسبي الله!
اول لما وقف العربية عند البيت نزلت جري طلعت على العمارة حتى من غير ما أسلم على عمتو رفيدة وطلعت حتى ماقعدتش مع اهلي، اهلي جدًا بسم الله ماشاء الله ماما من ساعة ماشافتني طالعة وهي بتضحك عليا!
_______♡
_ياسمين ياسمين حاجة أنتي يابت!
فتحت عيني بتعب_خير؟!
_الساعة ١٢ الضهر ياختي بصحيكِ من ٨ قولت عندك شغل
_لأ معنديش خدت اجازة انهاردة بالتليفون
_طب يلا ياحبيبتي قومي أفطري وصلي
_طيب
فتحت الستاير لأ بتفتحي الستاير ليه!! يييي كدة صحينا بجد! طبعًا الشمس اقتحمت وجهي بكل قلة أحترام لعيناي الناعستان! وصحيت! صحيت وانا عايزة انام شكرًا ياماما شكرًا على الراحة البتديهالي في الدنيا، الدنيا! ااه الدنيا جاية عليكِ ياياسمين ياغالبانة حتى في اجازتك مش مرتاحة ياا غالبانة ياعيني عليكِ يامسكينة اا..
_بس ياصيوحة بطلي صياح خرمتي ودننا!
ودي كانت امي يااا الأمهات ياا
_بس يابت!
طب تمام شكرًا كفاية!
صياح ١٢ الضهر ده غريب جدًا!
خرجت فطرت وخير اللهم اجعله خير كانو بيبصولي بأبتسامة كدة ربنا يستر فطرت معاهم في جو عائلي شرير علشان هما شريرين ومش بيضحكو على نكتي يرضيكو أقولهم بناسبة الحلاوة مرة واحد راح حلق رجع غويشة يبصولي بقرف! أهل مش جادعين على فكرة!
قعدت عملت أيه بقا؟ ضفيرة وقعدت ادام التلفيزيون أتفرج على سيمبا واكل فشار والبت هاجر اختي جمبي وكل شوية تدايقني فأجبها من شعرها عادي وقعدنا نعيط عادي جدًا أما أبو سيمبا مات! ونسِح!
_بت ياياسمين ايه يابت مش هتنزلي تروحي المكتبة؟
بصتلها بستغراب_لأ ليه؟
_ولا تجيبي عصير؟
_لأ
_ولا ماندولين وكتكات
_لأ ياماما عندي!
ضيقت عيني بشك_ أنتِ عايزاني أنزل ليه ياحاجة؟
_لأ عادي مستغرباكِ علشان مانزلتيش أنهاردة
_مش عارفة ياماما ضغط الشغل خلاني زي ماشوفتي كدة أمبارح فعايزة اخد اجازة كام يوم هقدم بكرة على أجازة وأشوف هتتقبل ولا لأ.
طبطبت عليا بحنية_ماشي ياحبيبتي ربنا يريح قلبك
ابتسمتلها بمتنان نابع من قلبي بجد يمكن اكتر حاجة ممكن تحسسني بالأمان شعور الأخرين وفهمهم ليا، بتعبي، حزني، حتى فرحي البفرحه بصمت من غير صويت كتير وأڤورة بفرح لما حد يفهمه يفهم لمعة عيوني وأبتسامتي، بحس بالراحة والأمان العميق لما أستشعر الشعور ده من حد بذات لو مقربين زي ماما، صحابي، قرايبي البحبهم، أختي المهزءة دي وكدة يعني!
_الله حنان أنا قايمة اكلمها
دخلت عملت قهوة وأنا بكلمها فون ودخلت البلكونة وأحنا بنرغي سوا فضلنا نتكلم كتير كلامها دافي وعسلية شوف ياخي بنشوف بعض كل يوم في الشغل وقلبي قلبي قلبي بردو!
_اااه صح نسيت اقولك بت ياياسمين المدير قال أنه في رحلة تبع الشغل في أسكندرية كاترفيه يعني لمدة تلت ايام وهنقعد في فندق وكدة هتروحي ولا ايه هو قال الموظفين الحابين يروحو بس يقولو
_أصدقي اه كنت بفكر أروح حلو جدًا هروح بأذن الله هي امتى؟
_بعد يومين
_طب حلو نروح سوا بقا
_تمام جدًا
_____
جهزت شنطتي ولبست فستان أبيض وخمار ونقاب وردي ونزلت حقيقي كنت مبسوطة أخيرًا هرتاح كدة وهاخد بريك من التعب ده قابلت حنان عند المحطة وجبنا حلويات كتير لزوم التسالي والتخن! وكانت رحلة جميلة خالص معاها وكلها ضحك وهزار وفرفشة وصور مجنونة من احلى ايام حياتي حقيقي!
ووصلنا أخيرًا إلى الأسكندرية وجمالها!
_بت يا ياسمين تاخدي بيجامة من عندي ونلبس زي بعض
_أنتِ عندك بيجامتين زي بعض؟
_اه واحدة ليا وواحدة لأختي وخدتها منها علشانا لو حابة يعني؟
ابتسمت لخجلها وخطفتها منها وأنا بضحك_طبعًا ياعبيطة انتِ ده انا ليا الشرف!
لبست البيجامة ورجعت لبست الفستان عليها والخمار بصتلي بستغراب_ايه ده
_هنزل أجيب أيس كريم وفريسكا لينا تيجي معايا؟
أترمت على السرير-لأ ياحبيبتي على الله حكايتك انا مش قادرة خلاص!
_أحلى حاجة أني لقيت حد فرهود أكتر مني يلا سلام
_سلام
___♡
اشتريت العايزاه وماشية بكل فرحة بقا في شوارع أسكندرية طبعًا أول مانزلت من العمارة صورت الشوارع بالتليفون فيديو علشان متوهش علشان انا وذاكرتي خايبين أيتس أوكيه!
الشوارع قمر والعمارات قمر يا ياخي ده أحنا مش عايشين، لمحت حد في الشارع بتاعنا ثانية ده يوسف خبوني زملوني اغيثوني! لأ ومامته معاه ياحظك الملون يايويو ياحظك!
دخلت الشارع بمنتهى الثقة المزيفة طبعًا!
لأ لأ زيف أيه أيس كريمك في ايدك فريسكتك في شنطتك واليقطعني يفرجني!
_ياسمين! ازيك؟
ابتسامة متوترة _أنا الحمدلله كويسة جدًا أنتِ بخير ياطنط قصدي ياعمتو
ضحكتلي وطبطبت عليا_الحمدلله ياحبيبتي بس جاية أسكندرية لوحدك تعملي ايه؟
_بجيب أيس كريم!
يا على الغباء يا شابو يابنتي شابو أعطيكِ نجمة!
_قصدي يعني.. رحلة.. رحلة تبع الشغل وحضرتك؟
_احنا ساكنين هنا ياحبيبتي.
_بجد؟
_هيا مامتك مقالتلكيش خالص؟
_لأ مجاتش فرصة والله!
_بس أيه رحلة تبع الشغل الله أيه الشغل الجميل ده شغليني معاكِ لحسن بدور!
كان اللط.. قصدي الأستاذ، أبتسمت برخامة بعيني
_في القاهرة تيجي القاهرة؟
_أجي
ياسخف!
_شركة وأنا أخصائية نفسية بعمل اختبارات نفسية للبيقدمو للشغل
_ااه حلو والله
عمتو أبتسمتلي_خدي ياحبيبتي رقمي وابعتيلي تفاصيل الشركة يوسف مترجم وبيدور على شغل
_طب ممكن حضرتك تاخدي رقمي علشان الأيس كريم
_اه طبعًا
_تمام ٠١٠٩٤
_عن اذنكو
طلعت اجري وكالعادة بندب حظي على الأيس كريم الساح والمقابلة السخيفة!
طلعت جري حطيته في الفريزر شوية، لقيت حنون نامت فاستغليت ده وبعدها صحيتها واكلناه وبالهناء والشفاء لقلوبنا!
حقيقي كانت كل ايامي في أسكندرية ممتعة زورت البحر كتير قرأت ادامه كتبت سجلت بصوتي كلام بحب اقوله لوحدي كلام يعبر عن سعادتي كل أيامي مرت لطيفة ليا ولحنان والحمدلله مقابلتش سي الأستاذ البيزعق ده تاني ولا مامته ولا كلموني احسن شكلهم صرفو نظرهم!
_يااا هنروح خلاص انا عايزة أقيم في أسكندرية!
_وأنا والله مين سمعك، هترجعي الشغل؟
_اكيد يابنتي أنتو من غيري تعرفو تعيشو اصلًا
_طب تمام تمام!
ضحكت على الميمز المش وراها حاجة غير تقولهم ليا دي!
واحنا في القطر اتبعت ليا رسالة سمعت صوتها وطنشت فضل يبعت تلت مرات تقريبًا في المرة الأخيرة فتحت
_استاذة ياسمين قولت اكلمك بنفسي أعرف تفاصيل الشغل.
_أنتِ بخير؟
_ممكن تردي أسرع؟
_مستعجل نفسي أعرف تفاصيل الشغل!
هكسر التليفون فوق دماغه على الرخامة دي بجد!
بعت _تمام ثواني.
_تمام بس؟
طنشته روحت جبت بيانات الشغل وبعتهاله وعملتله بلوك! هاهاها أومال انت فاكرنا أيه لُقمة سائغة!
______
رجعت القاهرة وبدات أمارس حياتي العملية بشكل مريح لأنه روحي أرتاحت
_أزي حضرتك أستاذة ياسمين؟
كنت قاعدة على مكتبي ببص في أختبارات المتقدمين للعمل وده نط فجأة قرب بدراعه شوية
_اهلًا بالعملالي بلوك
رغم توتري إلا أني ابتسمت بغلاسة_اهلًا أستاذ يوسف خير عملت الأنترڤيو؟
رفع ياقة قميصه بغرور_واتقبلت كمان!
أبتسمت بثقة وبصتله بنفس الثقة المش عارفة اكتسبتها منين_كويس جدًا بس كدة فاضل اهم حد.
_مين؟!
_أنا. لو أختباراتك طلعت مش ولابُد هتترفض!
بصلي بثقة_هنجرب
فضلت على وضعيتي في ثقتي، شغلي اكتر حاجة بتميز فيها وبعملها بمنتهى الثقة والأحترافية فضلت أسأله أسألة الأختبارات والحقيقة كانت كل اجابته ممتازة جميل سوي نفسيًا ويقدر ينجح في شغله كمان!
_ممتاز هقيم اختبارك مرة اخيرة والشركة هتبلغ حضرتك بالرفض او القبول غدًا بأذن الله
أبتسم بعملية_تمام خير، شكرًا جدًا عن أذنك
_اتفضل
ومن هنا بدأ أنجذاب غريب يحصلي لشخص مستفز كل مقابلتنا في طرقات الشركة ازيك؟ الله يسلمك. وخلصت بس أحترمته لأنه جاد مش ملاوع مش بيهزر معايا ولا مع بنات ولا بيقعد يبص للبنات ويدقق فيهم نظرته للضرورة بس غير كدة عينه في الأرض و.. هو انا مركزة معاه كدة ليه؟ أنجذبت؟ أنجذبت. بس ده مش معناه أني بتأمل جماله يعني لأ بس بتلفتني أفعاله
_ياسمين تعالي بسرعة المدير طلبك
_خير يارب ثواني وجاية
_بسرعة بس!
جريت طبعًا مش بالمعنى الحرفي بس كنت اتمنى اطير المدير يبقا في مصيبة أو سفرية خلصت!
دخلت لقيت يوسف موجود ألقيت السلام وقعدت لما المدير شاورلي
_دلوقتي حابب أبلغ الموظفين ال معايا رايحين اجتماع مع شركة أخرى في شرم الشيخ بكرا هحتاج المترجم والمحاسب والمهندس وهحتاجك أنتِ كمان ياياسمين لأنه في عمال من هناك كمان حابين ينضمو لشركتنا في فرع غير ده بسبب العقد الهنمضيه معاهم وحابين نربط الشركتين ببعض فهتعملي اختباراتك.
هزيت راسي بعملية_تمام يافندم
_الأجتماع هيكون الساعة تسعة مساء مواعيد المدير كدة! يعني توصلوا شرم تمانية بالكتير.
الكل وافق وانا وافقت مضطرة لأنه المعاد متأخر وهكون لوحدي ومسئولة عن مرواحي لوحدي يعني قطر وحوارات!
_أستاذة ياسمين أستني!
_أيوة خير
لفيتله لأني كنت في طريقي لمكتبي و وقفني في النص
_بما انك بنت عمي هوصلك بكرة هستناكِ قدام العمارة خمسة بالظبط علشان الطريق
قال كدة وسابني ومشي هو ايه التحكم ده طب مش راحة!
______
لبست رسمي جدًا زي العادة وخلصت قبل مايجي بنص ساعة فكيت البلوك علشان يرن اول مارن قفلت عليه ونزلت احنا لسة هنرغي!
اول ماوصلت كان ساند على العربية وواقف شافني تنح هو احنا نلبس سوارية يتنحو! رسمي وواسع يتنحو ده أيه ده ياربي!
بزهق_خير؟
_كنت بحسبك هتلبسي سواريه علشان برا وكدة!
_خير يعني انا منتقبة العتب على النظر!
اتحرج_مش قصدي قصدي سوارية محتشم
قولت وانا بفتح باب العربية وبركب ورا_ده شغل مش حنة شيماء!
فضل متنح ثواني بعدها أستسلم للأمر الواقع وركب وساق وروحنا عادي ورجعنا عادي ايوة مفيش مغامرات ولا جديد كفاية احلام بقا وشغل روايات الله!
____
_ياسمين
_امم
_سيبي الكتاب وركزي معايا
سبته وبصتلها_خير ياماما؟
_في عريس جاي بكرة الساعة تسعة يتقدم عجبك عجبك معجبكيش ارفضي.
ضميت حواجبي بتعجب_دا خير يعني مين؟
ضحكت_هتعرفي بكرة
ومشيت وسابتني دا ايه الالغاز دي جريت وراها
_لأ مانا هعرف ياحاجة وهتقولي
رقصت حواجبها وضحكت _دا بُعدك!
_عادي خالص كدة كدة لو ماعجبنيش هرفض!
_نينيني
_ماما ميم لورد عادي خالص!
_حبيبي تسلم!
_____
لبست فستان عادي وخمار وخرجت وأنا مدايقة وقرفانة مش خجولة لأ!
قعدت ببرود وماهتمتش ابصله مش كسوف برده بس قلت اهتمام مبحبش الحوارات دي انا! لغاية ماسابونا لوحدنا رفعت عيوني أشوفه
بصدمة_يوسف!
أبتسم_بصي بقا يابنت الناس تتجوزيني؟
_ايه حمري جمري كدة؟
_اه بسرعة يلا تتجوزيني
قولت بنفعال بسيط_لسة في أسئلة واختبارات هو ايه البسرعة!
_تتجوزيني؟
صوته المرادي كان دافي وهادي وفي أمان اتنهدت وابتسمت له لأول مرة_صدقني هفكر!
___
فكرت يومين وارتاحت ووافقت ومن هنا أترسمت خطوط حكاية جديدة لقلبي وقلبه لقلب بنت مخطوبة كل يوم خطيبها بيعلى في نظرها وبيزيد حبه في قلبها من رحمته اخلاقه حتى مشاغبته، وأنهاردة هي أول بداية للحكاية كتب كتابي، اول لمسة أيد أول بوسة في الكف وحضن دافي يعطي لقلبك أمان أول خطوات الرحلة وأجملها وأول ضحكة صافية من القلب وأول كلام للحب_بحبك!
______
_ياسمين
_اممم
_أنا قولتلك النهاردة بحبك؟
أبتسمت_لأ
_طب بحبك
أبتسمت بحنان ونسيت زعلي منه_وأنا كمان
باس باطن ايدي_أنا أسف لقلبك!
ودايمًا الحكاية الجميلة بيكون البطل فيها حنون لسة بيرسم الأبتسامة على وجهي علشان ميرضالهوش الحزن، ولسة بيقدر يفتح قلبي بمفتاح معاه هو بس مفتاح الحب والرحمة!
"ولكن النهاية لم تأتي بعد"
#ياسمين_عراقي
لو عجبكم أعملو مُتابعة علشان يظهرلكم كل جديد ياحلوين ❤️🫂