...
تخيل معايا لو أنت شايف شخص قُدامك، بتحبه وهو مش بيحبك، بيبقى احساسك ايه؟ ما بالك لو اللي بيحبك ده مش شخص! لا ده جن!!
خليني أنا أجاوبك وأقولك انك وقتها هتبقى في أضعف حالاتك، هتكون عايش في جحيم!
موضوعنا انهارده عن "الجن العاشق"
في بداية كلامي خليني أعرفك على الجن بشكل عام.
الجن هو عالم منفصل يختلف عن عالم الإنس، بس اللي بيتشابه فيه الإنس والجن معًا، هو انهم عندهم عقل زيهم زينا، يقدروا يميزوا بين الخير والشر، يقدروا يختاروا ديانتهم، ولكن اللي بيخليهم يختلفوا عننا هي أشكالهم، اننا مبنقدرش نشوفهم، لذلك اتسموا بالجن، ومعنى كلمة الجن "هو الإجتنان، ودي معناها الاستتار عن العيون" لذلك يُسمى الطفل في بطن أمه بالجنين.
خلينا بقى دلوقت أعرفكم يعني ايه جن عاشق.
الجن العاشق مش نوع من أنواع الجن، كلنا عارفين ان الجن أنواع في منهم الضوئي والناري والترابي و و و، ومنهم اللي شغلانته انه يغوي الناس ومنهم أنواع كتير، لكن الجن العاشق نفسه مش نوع من انواعهم، الجن العاشق هو اي نوع من أنواع الجن، ممكن اي جن يتقال عليه انه جن عاشق لمُجرد بس انه يحب حد من بني البشر، سواء كان بيحب بنت فَ يُسمى جن عاشق، أو كان بيحب رجل فَ تُسمى جنية عاشقة.
عايزك بقى تسرح معايا بخيالك وتجاوب في سرك وتقولي، لو أنت بتحب شخص، ايه ممكن يكون شعورك تجاهه؟
أكيد بتبقى غيران عليه، مبتحبش حد يقرب منه ولا يلمسه، بتبقى نفسك ان الشخص ده يكون مِلكك لوحدك، بتاعك أنت وبس! صح؟
أهو الجن العاشق كده، متخيل ان لو جن عشق شخص ممكن يخلي الجميع ينفر منه وهو كمان يخليه ينفر من الكل، حتى لو كان الشخص ده متزوج!
ومن ضمن خططه في انه يخليك بتاعه لوحده، هو انه بيخليك تكرهه الناس، بيخليك تبعد عنهم وتفضل العُزلة بعيد عن الناس خالص!! ودي تعُتبر أهم أعراض المس الشيطاني ووجود جن عاشق!
وما دام ذكرنا أعراض وجود جن عاشق، فَ لازم نذكرها كلها.
من أعراض وجود جن عاشق هو حُب العُزلة، ان الإنسان يكون قاعد لوحده، مبيحبش يشوف حد، وانه بيكون كارهه لأي حد يقرب منه!!
كمان كره الجنس الأخر، بمعنى ان البنت بتكون بتكره الراجل، والعكس، وانه في كل محاولات الزواج بينفر منها، لا وكمان بيكون رافض الزواج رفض تام، ولو كان متزوج فَ وقتها بيكون بيكره شريك حياته، وبيحاول يبعد عنه بكل الطرق لأنه بيكون شايفه وقتها عبارة عن مسخ شيطاني!! بيحاول الجن يصورله انه كدا عشان يبعد عنه وميقربش منه!
ومن ضمن أعراضه هو البُعد عن الصلاة والدين بشكل عام، ولما بيسمع صوت قرآن أو اي حاجة ليها علاقة بالدين، ممكن وقتها يثور ويكسر اي حاجة حواليه!
وكمان بيحس انه مكتئب طول الوقت، وبيحس دايمًا ان في حاجة تقيلة موجودة على صدره، زيها زي أعراض الجاثوم بالظبط لكن الفرق ان الاحساس ده بيكون طول الوقت، بيحس انه مش قادر يتنفس!
النوم الكتير، من شدة تعب المُصاب بمس هو ان الشخص ده بيكون عنده احساس بالخمول والكسل، لذلك بينام، وده مش بسبب حبه للنوم، لا ده بيبقى بسبب الجن! لأنه وقتها بيكون قادر يسيطر عليه أكتر! وده من خلال الأحلام اللي بيحلمها واللي مُعظمها بتكون أحلام بيتشكل فيها الجن على هيئة شخص للممسوس!!
بيحس طول الوقت بحاجة بتتجول حواليه، بيحس بأنفاسه سواء كانت في ضهره أو في وشه، بتحس ان في حد وراك دايمًا سواء كنت قاعد لوحدك او في الحمام، المُهم ان احساس ان في حد وراك بيبقى ملازمك دايمًا، وحابب أطمنك ان ده مش احساس، لا دي حقيقة، أنت بيبقى في حد في ضهرك، زي غالبًا ما أنت حاسس دلوقت!!
طب هل الجن العاشق ممكن انه يجي كدا لوحده من غير أسباب؟
خليني أجاوبك
نادرًا لما الجن العاشق بيجي للشخص لوحده من غير سبب، وده بيكون انه شايفه ومُعجب بيه، ووقتها بينجذب له وبيحاول بكل الطرق يسيطر عليه والحالة دي بتبقى اسمها عشق الجن للإنس ونفوره من الجن بشكل عام.
انما بقى ايه الأسباب اللي بتخلي الجن ينتظر الفرصة لدخوله جسم الإنسان؟ تعالى أقولك:
أهم سبب لوجود جن عاشق هو البُعد عن الصلاة والدين، والمشي في طريق الشهوات!
السحر!! السحر من أهم اسباب وجود مس شيطاني او جن عاشق، وده بيكون عبارة عن جن موجه للشخص عن طريق شخص تاني عايز يآذيه، ووقتها بيكون الجن ده اسمه "خادم السحر" وفي بعض الحالات بيخالف الجن ده التعاليم اللي جي ليها وبيعشق الشخص ده!
العين والحسد! متخيل ان لما شخص يحسد حد وقتها بيفتح منافذ للشيطان انه يدخل ويتلبس الشخص ده! وفي الحالة دي بيكون اسمه شيطان العين أو شيطان الحسد.
استعراض الانسان جسمه قُدام المراية وانه يقف قدام المراية من غير ملابس او بملابس شفافه لفترة طويلة، ده وقتها بيفتح الباب للجن انه يبص للشخص ده بنظرة اعجاب!
دخولك الحمام بدون ما تقول دُعاء الدخول، لأنك وقتها بتكون عاري قُدام الجن ومن الممكن انه ينظر ليك بنظرة شهوة!
انك تقرأ في كُتب السحر والدجل وأنت جاهل فيها، لأنك في الوقت ده ممكن تحضر جن وأنت مش واخد بالك، ووقتها ممكن يتلبسك!
انك تبكي في الحمام، أهو ده من أهم أسباب وجود جن عاشق، لأنك لما بتعيط في الحمام وقتها انت بتصعب عليه، وصدقني من أسوأ الحاجات انك تصعب عليه! لأنك وقتها هتحس ان في حد جنبك! هتحس بنفس جنبك، متخيل انك تبقى في الحمام وتحس بنفس حد جنبك! هتحس ب إيه؟ بروده بتسري في جسمك رغم ان الجو حر حواليك! هتحس ان حد بيمسكك! هتحس انك مش لوحدك!
طب ايه اللي ممكن يحصل لو كان الانسان مُصاب بجن عاشق؟
ممكن في الحالة دي تشوف قطط بتقرب منك في احلامك، مش بس كدا، أنت ممكن تشوف قطط حواليك في كل مكان ولكنها بتختفي بمجرد ما بتحس أنت بوجودها!
كمان الجن بيقدر يتشكل للمرآة على هيئة وشكل الشخص اللي هي بتحبه، واذا كانت متزوجة بيبقى قادر يتشكلها على شكل زوجها!
كمان بتشوف في أحلامك شخص أنت تعرفه وبيبقى في الوقت ده عايز يتجوزك!
أو انك بتشوف نفسك بتتزوج في الحلم!
تعرف كمان ان ممكن جني ذكر يعشق راجل وممكن جنيه تعشق امرأة؟
وفي الوقت ده بيحس الشخص الممسوس بحالة غريبة وهي عدم الإنجذاب للجنس الأخر وانه بينجذب لنفس جنسه!
ومن ضمن أخطر الأشياء اللي ممكن تحصل هو ان الشخص ممكن ينام في الحمام من شده شروده ومن سرحانه!
وأخر حاجة معانا في الحالات دي هي ان ممكن البنت تحمل من جني! وده بيحصل لما البنت بتبدأ تحس بأعراض الحمل وان بطنها بتبدأ تكبر حتى لو كانت البنت دي مش متزوجة!!
بس في وقت الفحوصات والتحاليل مبيبقاش باين الجنين في بطنها، وعند فترة الولادة بتحس بكل أعراض الولادة لكن ما بتولد بتكتشف انه كان حمل كاذب! لكن يا عزيزي حابب اقولك ان في كلام يُقال ان البنت دي بتكون ولدت جن وان محدش وقتها بيكون شايفه!!
وطبعًا منقدرش ننسى اننا نحكي التجارب اللي حصلت مع بعض الناس مع الجن العاشق!
أول حكاية معانا انهارده هي حكاية لبنت بدأ الموضوع معاها من وهي عندها ١٢ سنة، بتحكي البنت وبتقول انها كانت بتقف قُدام المراية كتير بغرض استعراض جسمها وانها تعجب بنفسها، ولكن بعد فترة بدأت تحس في المراية ان شكلها مش كويس، وانها بتشوف نفسها بمنظر مُرعب جدًا، وبالتزامن مع الوقت ده بدأت تشوف في أحلامها كائنات مرعبة جايه تخطفها، وكانت دايمًا بتحس ان في حد نايم جنبها، لدرجة انها في مرة وهي نايمة صحيت على ايد باردة جدًا موجودة على ضهرها، ولما بصت وراها شافت أبشع منظر ممكن حد يشوفه، كائن شكله بشع وعيونه مشقوقة ولونها أحمر!
ولما حكت لأهلها، خدوها لشيخ يعالجها بالقرآن وطول فترة العلاج كانت بتحس ان في حاجة بتعذبها طول الوقت، وكانت بتصحى دايمًا تلاقي على جسمها كدمات غريبة، وانها في البداية كانت بتشوف الشيخ اللي بيعالجها على انه شخص جي يقتلها، ومرة تانية كانت بتشوفه على هيئة مسخ بيحاول ينتقم منها، لحد ما في أخر جلسة ليها حست بإن حد جي يخطفها وبيعذبها لحد ما أغمى عليها، ولما صحت الشيخ نصحها تقرب من ربنا، ومن وقتها بقت احسن ومبقتش بتشوف حاجة نهائي.
تاني حكاية معانا هي لست كانت متجوزة لكنها مكنتش بتخلف برغم انها كانت سليمة هي وجوزها، وبعد فترة من جوازها صاحبتها نصحتها وقالتلها تروح لواحد هو اللي هيخليها تحمل، وبالفعل راحت ولما دخلت بيته بتقول انها كانت حاسه انها في كهف، والبيت كانت ريحته وحشة جدًا لكن حُبها للخلفة هي اللي كانت مصبراها، ولما دخلت وحكت للراجل ده طلع ورقة وبدأ يكتب عليها حاجات غريبة ورموز أغرب، وبعدها بدأ يقرأ عليها ويتمم بكلام غريب، وقالها تاخد الورقة دي تحطها في مياه وتسيبها يومين وخلال اليومين متاكلش توم ولا تولع بخور، وبعد اليومين تستحمى بالمياه دي، ولما عملت كدا، بتقول انها بدأت تحس بعدم الانجذاب لزوجها، وكمان بتقول انها بقت بتشوف حاجات غريبة، ومن ضمن الحاجات دي انها بتشوف كائن طويل شكله مرعب ومليان شعر، بيحاول يقرب منها وبيجيلها على طول في الحلم، وانها طول الوقت حاسه ب ان حد بيتنفس في وشها، وفي مرة وهي بتستحمى بتقول ان الكهربا قطعت ووقتها حست بصوت في ودنها بيقول "انتي بتاعتي" بدأت وقتها تصرخ لحد ما الكهربا رجعت لكن لما رجعت بتقول انها لقت علامات غريبة على مناطق حساسة في جسمها، وكانت دايمًا بتشوف الكائن ده في الفترة اللي بتصحى فيها من النوم لكنها بتحس انها مقيدة ومش قادرة تصرخ! وحكاية البنت وقفت لحد كدا لانها مكملتش.
قصة تانية لبنت بتحكي ان اختها كانت من النوع اللي بتعيط في الحمام كتير وانها كانت دايمًا بتحب العُزلة، فَ في مرة كانت رايحة الحمام في وقت متأخر، بتقول انها فتحت غرفة أختها لكنها حست بإن في كائن يُشبه الغوريلا قاعد جنبها على السرير وبيعيط وانها لما شافته اختفى فجأة، وبتكمل وبتقول ان اختها كان في الوقت ده متقدملها عريس وكان جي تاني يوم يشوفها، ولما البنت دي حكت لأختها بدأت تعيط وورتها أماكن كتير في جسمها مليانة كدمات وقالتلها انه كان بيعيط عشان متقدملي عريس، لكن بعد فترة راحوا لشيخ وهي حاليًا اتحسنت ومبقتش تشوف حاجة.
أخر حكاية هحكيها انهارده هي حكاية أنا حضرتها لشخص جنبنا في البلد، الشخص ده من صُغره وهو مُحب للعزلة، مكنش بيحب يقعد مع حد ودايمًا بيكره اي بنت بتحاول تقرب منه، لحد ما في يوم أهله لقوه اختفى ومكنش موجود له اي آثر نهائي، لكن بعد فترة لقوه وحكى ليهم وقالهم انه متجوز من تحت الأرض، وبقى كل فترة أهله يلاقوه اختفى ولكن بيرجع تاني بعدها، وبدأ وقتها يحكيلهم انه مبسوط من الجوازة دي وقالهم انه خلف منها، وبقى كل شوية يختفى ويرجع تاني، الشخص ده مش مجنون وانه شخص عاقل جدًا، ولحد دلوقت بيختفى ومحدش بيعرف هو بيروح فين، ولكنهم بيتفاجئوا بيه في اي وقت انه موجود في اوضته!!