❤️
#اسكريبت
كنت قاعده لواحدى بالليل فى الصاله بسمع فيلم رعب .. والبيت كله كان نايم .. وفجأه سمعت صوت خبط على الباب .. أنا الصراحه اترعبت أوى وخفت .. رحت علشان أشوف مين اللى بيخبط .. بصيت من العين السحريه ما لقيتش حد .. بس لقيت حاجه قدام الباب .. فتحت لقيت علبه كبيره قدام الباب .. فتحتها وكانت المفاجأة .. لقيت طفل
.. بيبى صغنون .. ونايم .. يمكن ما كملش 4 شهور .. مش عارفه أوصف شعورى .. فرحانه وزعلانه فى نفس الوقت .. فرحانه لإنى لقيت بيبى قمر وصغنون وكيوت أوى .. وزعلانه علشان مش عارفه مين أهله ومين سابه هنا فى البرد دا .. أخدته جوا بسرعه .. حطيته على سريرى و بدأت أتأمل فى ملامحه .. كان أبيض وخدوده حمرا و شفايفه بلون الكرز ..
- يا روحى .. مين اللى سابك كدا ومشى .. يا ترى فين أهلك وهل هما بيدوروا عليك ولا لا .. زمان مامتك هتموت نفسها علشانك ..
وفجأة لقيته صحى .. بصلى كدا بخضه وبدأ يعيط ..
- لا يا روحى بس بس .. طيب إنتَ جعان .. استنى أما أشوف لك حاجه ..
شيلته ورحت المطبخ علشان أشوف له حاجه ياكلها .. بما إنه لسه بيبى صغير فهو أكيد بيشرب لبن بس .. الحمد لله لقيت لبن .. سخنته و بدأت أشربه شويه بشويه لحد ما هدى ونام و أنا نمت جنبه ..
الصبح صحيت على صوت ماما وهى بتزعق جامد أوى كأن مقتولها قتيل ..
- إيه يا ماما .. فيه إيه على الصبح ..؟!
= مين دا يا دعاء ..؟!
- مين .. قصدك على مين ..؟!
= على اللى جنبك دا ياختى ..؟!
بصيت جنبى لقيت البيبى افتكرت كل حاجه حصلت امبارح ..
- آه .. طاب وطى صوتك علشان ما يصحاش و أنا هفهمك كل حاجه ..
= عشر دقائق و ألاقيكِ ورايا ..
- حاضر ..
قمت غسلت وشى و أتطمنت على البيبى ورحت ل ماما ..
- نعم ..
= مين دا ..؟!
- مش عارفه ..
= يعنى إيه مش عارفه ؟!
- كنت قاعده بالليل سمعت الباب بيخبط روحت ما لقيتش حد بس لقيت البيبى دا .. فأخدته ..
= وبعدين .. هنقول إيه ل أبوكِ ..؟!
- ما تقلقيش .. أنا هتصرف مع بابا ..
= طاب هيفضل معانا لحد امتى ..؟!
- مش عارفه .. لما نلاقى أهله .. بس أنا لا يمكن أفرط فيه و أسيبه ..
= ماشى يا بنتى ربنا يصلح الحال ويلاقى أهله ..
- يا رب يا ماما .. دا صعبان عليا أوى .. دا حتى ما كملش 4 شهور ..!
= يا حبيبى .. يا ترى مين اللى سابك كدا ورماك الرميه دى ..؟!
- مش مشكله مين بقى .. المهم أن البيبى بخير .. عايزه أشتري له شوية لبس و حاجات خاصه بالأطفال .. لإنه مش هينفع يفضل كدا .. هيتعب ..
= طيب يا بنتى ابقى روحى هاتيله كل حاجه ..
- يديمك ليا يا ست الكل ..
= حبيبتى ويديمك ليا يا رب ..
أخدت النونو ونزلت اشتريت له لبس .. وألعاب .. وحاجات كتيره أوى .. وبعدها روحت البيت ..
غيرت للنونو هدومه وكان قمر أوى فى اللبس الجديد .. كان مبسوط أوى وبيضحك جامد .. ضحكته كانت بتخلى قلبى طاير من الفرح ..
- ها هنسميك إيه بقى يا كتكوت يا صغنن .. اممم ممكن .......
= ياسين مثلًا ..
- صح .. بالظبط كدا .. هو دا .. ح ........ ياسين !!
= إيه رأيك فى المفاجأة القمر دى ..؟!
دا ياسين جوزى .. كاتبين الكتاب بس لسه ما عملناش الفرح ..
- وحشتنى أوى على فكره ..
= طاب فين الحضن بتاعى بقى ..؟!
- لا يا حبيبي ما ينفعش ..
= أنا نفسى تفهمى انى جوزك .. احنا كاتبين الكتاب يا ست ..
- لما أبقى فى بيتك ابقى أعمل اللى إنتَ عايزه .. لكن حاليا نوووو ..
= طيب يا ختى .. احكيلى بقى مين القمر دا ..؟!
حكيتله على كل حاجه ..
- طاب ومحدش سأل عليه خالص ..؟!
= لا ..
- يلا مش مشكله .. ايه رأيك نربيه سوا ..؟!
= بجد يا ياسو ..
- آه بجد يا قلب ياسو ..
بوست النونو وحضنته .. وقلتله ..
= دا أصلا حبيبى .. وحبيته أوى ..
- حيلك حيلك .. وأنا نصيبى فين ..؟!
= ضحكت .. نصيبك فى قلبى ..
- ماشى أما أشوف أخرتها معاكِ يا ست دعاء ..
= أخرتها موز بالأناناس ..
ضحكنا سوا .. ولعبنا مع البيبى و أكلته ونام ..
بيعدى يوم ورا يوم و أنا بتعلق بيه أكتر من الأول .. بحسه جزء من قلبى .. بقيت بعتبره ابنى .. بعتبره ايه بس دا هو خلاص كدا بقى ابنى .. آه صحيح احنا اتفقنا نسميه ياسين .. حلو الإسم صح ..
و ياسو القمر لازم يصحينى كل يوم بالليل علشان بيعيط .. لازم أقعد ألف بيه علشان يسكت .. شغل الأمهات دا متعب أوى ..
- شوف بيضحكلى ازاى ..؟! حبيب مامى يا ولاد ..
= والله إنتِ اتهبلتى ب سى ياسين دا وسايبه ياسين التانى مش بتعبريه بكلمه حلوه حتى ..
- طاب بحبك ..
= إيه .. قلتى إيه ..؟!
- بحباااااااك ..
= قلبى يا ناس والله .. أخيراً حنيتى عليا بكلمه حلوه .. يا شيخه دا أنا جالى جفاف ...
ضحكت عليه جامد أوى ..
- يا عينى يا ابنى .. للدرجه دى ..!
حط أيده على خده ..
= آه والله ياختى ..
- معلش يا حبيبى استحملنى بس شويه .. و أوعدك إنى هخليك أسعد إنسان فى الكون ..
= يا روحى إحنا اتعاهدنا نكون جنب بعض على الحلوه والمره .. و أنا لو ما استحملتكيش و وقفت جنبك مين اللى هيعمل كدا يعنى .. مش كدا ولا إيه يا سي ياسين ..
مسكت إيده وبوستها ..
- يديمك ليا يا رب .. خليك جنبى وما تسيبنيش أنا محتاجاك أوى الفتره دى ..
باسنى من راسى وقالى ..
- جنبك دائمًا و لآخر لحظه فى حياتى ..
= أنا مبسوطه أوى إن ربنا اختارك تكون ليا السند والضهر .. الأب و الأخ والصاحب والزوج .. يديمك ليا يا ياسو قلبى ..
- ويديمك ليا يا ملاكي ..
عدى 6 شهور وياسين كبر وبقى عنده سنه ..
- مين القمر اللى كبر وبقى عنده سنه ..
كنا قاعدين فى الصاله أنا وماما وبابا و ياسين زوجى وقرة عينى .. و ياسين ابنى حبيبى روحى وكل ما ليا .. كنا عاملين له عيد ميلاد ..
- سنه حلوه يا جميل .. سنه حلوه يا ياسو سنه حلوه يا جميل .. يلا قول هوف وطف الشمع ..
قعد يطلع لعاب من بوقه ومش عارف يطفيهم ..
- خلاص هطفيهم أنا .. ما أنا ياسين بردوا ..
= خلاص يبقى نطفيهم سوا ..
- خلاصانه .. اشطات ..
= اشطات عسلات ..
ضحكنا سوا وطفينا الشمع .. ياسين قعد مع بابا علشان يحددوا معاد فرحنا أنا وياسين ..
* خلاص يبقى آخر الأسبوع اللى جاى ..
= وأنا ماعنديش مانع .. عندك اعتراض يا دودو ..
اتكسف أوى واتحولت لطماطم حرفيا ..
- لا .. موافقه ..
* يبقى على خيرة الله ..
ياسين ميل عند ودنى وهمس ..
= حبيبى بيتكسف يا ولاد ..
- ياسين اتلم ..
= ياسين طالعه منك قمر .. طاب والله بموت فى الطاطم دى ..
- هقوم أشوف ياسين علشان بيعيط ..
= ماشى يا اختى .. مش بناخد حاجه من سي ياسين غير أنه بيعيط ..
قمت ورحت ل ياسين أكلته ونيمته .. وشويه ولقيت ماما جايه عليا ومخضوضه ..
- فيه إيه يا ماما .. مالك لونك مخطوف كدا ليه ..؟!
= فيه .. فيه ناس برا بيسألوا عليكِ ..
- ناس مين ..؟!
= مش عارفه ..!
- طيب هنيم ياسين على السرير وهاجى ..
ماما طلعت و أنا طلعت وراها ..
- أهلا وسهلا .. أنا دعاء .. مين حضراتكم ..؟!
* فين ابنى .. أنا عايزه ابنى ..
= أهدى يا سلمى .. أنا آسف جدا .. احم أنا خالد ودى مراتى سلمى .. من 6 شهور فيه واحد جه وحط علبه كبيره قدام بيتكم وكان فيها طفل ..
- و بعدين ..
= الطفل دا بيكون ابنى ..
- ياسين ..! لا لا .. ياسين ابنى أنا مش ابن حد تانى ..
* ابنك مين يا ست إنتِ دا ابنى أنا ..
= أهدى يا سلمى قلت ..!
* انتَ مش سامعها بتقول إيه ..؟!
- لما هو ابنك ومنشحكه أوى كدا .. كنتِ فين لما كان مرمى قدام بابى فى البرد .. كنتِ فين لما كان بيتعب وبسهر جنبه طول الليل .. كنتِ فين لما كمل سنه من حياته .. كنتِ فين .. تقدرى تجاوبينى .. لا مش هتقدرى .. دا ابنى أنا .. أنا بس اللى أستحق أكون أمه مش إنتِ ..!
عيطت جامد أوى وقالت ..
* أرجوكِ .. أرجوكِ خلينى أشوفه ولو لمره واحده .. هو كان مخطوف والله ..
- إيييه ..؟! مخطوف ..؟!
* آه كان مخطوف .. خالد رجل أعمال وليه اسمه و مكانته .. وطبعا كان ليه أعداء كتير .. فحاولوا إنهم يقتلوا ابنى فخطفوه .. وأما الشرطه وصلت للمكان اللى موجود فيه الخاطف هرب وسابه عند بابك ..
- طيب ما جاتوش من 6 شهور ليه .. جاين ليه دلوقت ..؟!
= علشان الشرطه مسكت الخاطف وقالنا أنه ساب ابنى هنا .. علشان خاطرى خلينى آخده .. أنا هموت عليه ..
حطيت ايدى على وشى وعيطت جامد أوى .. لدرجه كبيره ..
- دا ابنى وحته من روحى ازاى عايزين تاخدوه منى بالسهولة دى .. ازاى عايزين تبعدوه عنى ..؟!
جه ياسين وقعد جنبى وأخدنى فى حضنه و قعد يهدى فيا ..
= شششش بس يا روحى ما تعيطيش ..
- ازاى يا ياسين دول عايزين ياخدوه منى ..
= دا ابنهم يا دعاء ومن حقهم هما ..
- أنا اللى ربيته يا ياسين .. أنا اللى سهرت جنبه أنا اللى كان بيضحكلها ويلعب معاها .. أنا مامته ..
بعدت عن ياسين وجريت على أوضتى و أخدت ياسين فى حضنى وقعدت أعيط ..
- عايزين ياخدوك منى يا حبيبى .. هيبعدوك عنى .. بس مستحيل .. مستحيل أخلى حد يقرب منك .. مستحيل ياخدوك منى .. إنتَ ابنى أنا وبس ..
لقيت ياسين داخل وبيقول ...
= مش ابنك يا دعاء ..
- لا ابنى .. ابنى غصب عن أى حد ..
= لازم يروح ل أهله الحقيقيين يا دعاء ..
- علشان خاطرى ما تخليهومش ياخدوه منى .. أنا روحى فيه يا ياسين .. فاهم يعنى إيه روحى فيه ..
= حرام عليكِ يا دعاء .. أنتِ كدا بتحرميه من أمه وأبوه الحقيقيين ..
- مش قادره .. مش قادره أسيبه يا ياسين .. أنا هموت من غيره ..
= اديهولهم يا دعاء .. دول ناس واصله ولو ما أخدهوش بالذوق هياخدوه بالقانون .. وهيبهدلوا أهلك معاهم .. و أهلك مش حمل البهدله دى .. اديهولهم وابقى روحى زوريه ..
مسحت دموعى و أخدت قرارى و أنا قلبى بيتقطع ..
- طيب ..
= بجد يا دعاء ..
- أيوا ..
طلعت بياسين .. و أول ما مامته شافته جرت عليا وأخدته منى .. أخدت روحى .. روحى انسحبت منى .. وهو أول ما أخدته منى قعد يعيط و أنا قلبى بيعيط دم بدل الدموع .. أخدته و لسه هتمشى لقيته بيمد أيده ليا وبيقولى .. ماما .. كان اول مره يقولها .. وقالها لى ..
- دا بيقولى ماما .. سمعت يا ياسين .. بيقولى ماما ..
روحت مسكت أيده اللى ممدوده ليا ..
- يا روحى أنا ماما جنبك .. أنا جنبك يا روحى ..
= خلاص يا دعاء هما لازم يمشوا دلوقت ..
- علشان خاطرى لا ..
= مش هينفع يا دعاء ..
ياسين مشى .. أخدوه منى ..أخدوه وهو كان بيعيط جامد وبيمد أيده ليا وبيقولى ماما .. قالى ماما .. هموت من بعده ..
ياسين مشى من هنا و أنا تعبت من هنا وأخدونا على المستشفى ..
عدى أسبوع على بعد ياسين عنى .. و أنا مش برضى آكل غير أكل يخلينى عايشه .. ومعاد فرحنا أنا وياسين اتأجل .. و أنا عامله زى الميتيين فى المستشفى .. لا بتكلم ولا بتحرك .. لحد ما فى يوم لقيتها داخله عليا ب ياسين .. وهو بيعيط جامد أوى .. بصيتله .. روحى ردتلى تانى أول ما شيلته فى إيدى .. وأول ما شيلته بطل عياط و بصلى بصة عتاب كلها براءه وقالى .. ماما .. أول ما قالى الكلمه دى أخدته فى حضنى وعيطت ودى كانت اول مره أعيط فيها من ساعة ما سابنى ..
- يا روحى أنا .. وحشتنى أوى .. أنا كنت شبه ميته من بعدك ..
* من ساعة ما أخدته من عندك وهو مش بيبطل عياط .. ومش بيقول غير كلمة ماما .. فقلت لازم اجيبهولك .. أنتِ أحق بيه منى يا دعاء .. بس دا ما يمنعش انى هاجى أزوره كل يوم ..
- تعالى فى اى وقت تحبيه .. المهم إنه يكون معايا وجنبى ..
= مش تبطلى الدلع دا بقى يا حجه دعاء وتقومى نعمل الفرح علشان أنا خللت ..
- حاضر من عيونى ..
= ادخلى برجلك اليمين يا عروسه ..
- ألف مبروك يا حبيبى ..
= الله يبارك لى فيكِ يا ملاكي .. مش مصدق أننا خلاص بقينا فى بيت واحد .. دا أنتِ طلعتى عينى يا شيخه ..
- لازم يا حبيبى تستحمل مش أنا مراتك بردوا .. وإنتَ زوجى قرة عينى ..
= صح .. والبعدين خدى يا بت هنا .. أنتِ كنتِ عايزه تجيبى ياسين معانا ..
- أيوا وفيها إيه ..؟!
= يا رب صبرنى يا رب .. دودو حبيبتى أنتِ مش عارفه إن النهارده ليلة فرحنا ..؟!
- أيوا عارفه ..
= طاب إيه ..؟!
- إيه ..؟!
= إيه ..؟!
- حاسه ان ياسين بيعيط مش عارفه ليه ..
= .............
- ياسين مالك تنحت كدا ليه ..؟!
= ............
- خد ياض رايح فين .. تعالى هنا ..؟!
= ...........
الله يرحم ياسين .. 😂
" مهما مر من الوقت سيظل قلبى ينتظرك .. حتى تبلغ روحى الحلقوم .." ❤️
ما تنسوش رأيكم يا حلوين فى كومنت لطيف 👌🏻❤