😍
: أخييرًا خلصنا ... دنا هنام 100 سنة ضوئية قدام .
ورد بضحك : طب واللهِ حصل ... المهم طمنيني عملتي اي ؟
: جيبتها فشوال أكيد، دي اكتر مادة كنت بذاكرها يست .
ورد : طول عُمرك شاطرة يصاحبتي ... عقبال ما أشوفك مُعيدة قد الدنيا كدهو .
: مع بعض بإذن اللّٰه يا صديقي .
ورد بضحك : يلا نروَّح بقا عشان عايزه ألحق السرير من أول اليوم .
: ينهار اسوحح ده فات خمس دقايق اجري بسرعهه .
_________________________
" أنا قدر عندي 21 سنة في تالته كلية طب وبحب الرسم قد عينيا، عندي أخت واحدة ومتجوزة برا ومش بنشوفها كتير بسبب مشاكل الطيران، عايشه مع بابا وماما أكبر داعمين ليا ومثلي الأعلىٰ في كل حاجه ".
" ورد تبقىٰ صاحبتي أعرفها من أولىٰ إعدادي ودخلنا ثانوي سوا والحمدللّٰه دخلنا نفس الكلية ... معايا فكل حاجة وحقيقي هي بختي الحلو في الدنيا ".
_______________________
روحت البيت وفتحت الباب وفتحت الأوض كلها ولاقيتها ضلمة وفاضيه.
قدر : ايدا هو مفيش حد ولا ايه ... أما ادخل اخد شاور عقبال ما ييجوا ... أكيد الحج أخدها وراحوا قعدوا علىٰ الكورنيش زي كل مره ومش بيراعوا إن في قرمط وحيد هنا ساكن معاهم .
دخلت خدت شاور وخلصت وخرجت اتفرج علىٰ التليفزيون مستنياهم، عدىٰ ساعة واتنين وتلاته وبرضوا محدش لسه رجع، قلقت عليهم وخرجت أسأل عمو سلامة جارنا يمكن عارف مكانهم ... وصلت وقبل ما اخبط كان الباب اتفتح وخرج منه عمو سلامة و كان باين علىٰ وشه الخضة كإن شيء حصل .
عمو سلامة بتعجب : ايدا قدر بنتي انتِ هنا بتعملي اي انتوا رجعتوا !
قدر بدهشة : رجعنا منين يعم سلامة هو في اي .
عمو سلامه : من عند مامتك فالمستشفىٰ .
قدر بصدمة : ماما في المستشفىٰ !!
عمو سلامة بزعل : آه يبنتي ... مامتك أُغمىٰ عليها الصبح وباباكي خدها المستشفىٰ وانا كنت رايحلهم .
قدر بدموع : طب يلا بسرعه نروحلهم .
_________________
وصلنا المستشفىٰ ونزلت بجري وأنا مش حاسة بأي حاجه حواليا ولا حتىٰ سامعه صوت عمو سلامه وهو بينادي عليا، مش في دماغي أي شيء غير ماما ... ماما وبس .
وصلت ولاقيت بابا مُنهار قدام اوضه ماما جريت عليه وضميته .
قدر بعياط : بابا أنا أسفه مكنتش اعرف ... فكرت إنكوا قاعدين علىٰ الكورنيش سوا وجايين ... ماما كويسه صح؟
بابا : مش عارف ... مش عارف يا بنتي لسه محدش خرج وطمنني ... حبيبتي وشريكة حياتي جوا بقالها 4 ساعات ومش بإيدي حاجه اعملهالها ... اول مره احس بالعجز في حياتي .
قدر بعياط : بابا ماما هتبقىٰ كويسه صدقني ... ماما مستحيل تسيبنا .
باب العمليات اتفتح وخرج منه الدكتور وطلعت جريت عليه .
قدر بعياط : دكتور طمنني علىٰ ماما .
الدكتور بصدمة : قدر !!
قدر بدهشة : د/نوح !!
نوح برسمية : احم اطمنني والدتك حاليًا خرجت من مرحلة الخطر واوعدك هتكون احسن بكتير قريب .
قدر بتقدير : شكرًا بجد ... شكرًا ليك .
نوح : الشُكر للّٰه ... ربنا يطمنك عليها، عن إذنك .
_________________
عدىٰ 3 شهور وماما حالتها كانت بتتحسن كل يوم، ورد كانت بتيجي وتقعد معايا لآخر اليوم وتروح حقيقي للمره الالف فوق المليون يبختي بيها، انهارده كان يوم خروج ماما وروحنا البيت.
قدر بضحك : ها قد عادت أحسن واحده تنشن شبشب زنوبة ف وشي .
بابا وماما ضحكوا وسمعت ماما بتقولي : جهزي نفسك عشان في عريس جايلك بليل راحت غمزلتي وضحكت هي وبابا ودخلوا الأوضه .
___________________
دخلت اوضتي وكلمت ورد وانا قلقانه وبحكيلها .
ورد : يبنتي ليه محسساني انها اول مره يتقدملك فيها عريس ... متتوتريش بس وفكي كده وانا ساعة وجيالك وهلبسك الجزمه زي كل مره .
قدر بدموع : ربنا يديمك ليا بجد .
ورد : ويديمك يصديقي ... يلا سلام عشان ألحق ألبس .
____________________
جهزت ومستنية العريس المجهول اللي ماما مش راضيه تقولي اسمه حتىٰ اومال لو كان حد من كراشاتي الأتراك كانت عملت اي؟ غريب أمرك أيتها الوالده.
عدىٰ عشر دقايق وجه وطلعتله وقعدت وبدون أي مقدمات ومن حيث لا ادري اسمع صوته بيقولي بحبك !!
بصيتله بصدمه وانا حاسة إني عارفه الصوت ده : د/نوح !!
نوح : مقدرتش استنىٰ اكتر من 3 سنين وكان لازم اجي ... اعذريني لو قولتها كده بس شوفتك نسيت أنا كنت جاي ليه .
قدر بصدمه : 3 سنين !!
نوح بحُب : 3 سنين و 6 شهور و 21 يوم يا مُفتريه .
" كنت مُعيد في الجامعه بقالي 4 سنين وقتها وانتِ كنتي لسه اولىٰ، شوفتك وانتي داخله من باب الجامعه وماسكه لبسك عشان الهوا ميطيرهوش وحاجه تبان، وقتها حبيتك اوي، لإنك كنتي غير اي بنت شوفتها كلهم ماشيين حسب الموضه وخلاص ونسيوا إن في حاجه اسمها دين، وأنا قبل أي حاجه بختار ام لولادي مش اي واحده والسلام، كنت مقرر إني محبش واتجوز البنت اللي أمي تختارها بس جت قدر واقتحمتني ... اديتكوا 4 محاضرات و الـ 4 دول كانوا كفاية عشان يوضحولي حاجات كتيره أولهم وأهمهم إني وقعت! الدكتور نوح وقع!
رفضت إني أدخل اديكوا تاني لإن حُبك خلاص كان فاض بالـ اوي جوا مني وكنت خايف اخد خطوة واكلمك، كنت خايف يكون حد سبقني واخدك مني، اضطريت ابعد واسيب حلمي بإني اكون دكتور فالجامعه وبقيت دكتور في المستشفىٰ اللي شوفتيني فيها ".
قدر بتأثر ودموع : طب وايه خلاك تيجي دلوقتي .. اشمعنا انهارده بالذات .
نوح بضحك : خدت قرصة ودن من والدتك ظبطتني .
قدر بضحك : ازاي .
نوح :
"بعد ما عدىٰ شهرين ونص من وجود مامتك في المستشفىٰ كنتي بتلعبي معاها هي وباباكي وكنت واقف بعيد عنك بس قريب من مامتك ".
Flash back ,
"كان ساند علىٰ الباب و واقف باصصلها بكل حب و في عيون بتراقبه وهو ولا هنا "
نوح بعيون مليانه حب : معاليها تلهو مبتسمه وقلبي يضطرب .
مامت قدر : ما دام بتحبها كده ساكت ليه .
نوح بتلعثم : اا هي مين دي ؟.
مامت قدر بغمزة : انت عارف أنا أقصد مين ... بيجيلها عرسان كتير خلي بالك وكلهم احلىٰ من بعض ألحق نفسك قبل ما تتخطف منك وتقعد تندب وتقول كاني وماني .
Back ,
نوح بضحك : وبس يستي مهانش علىٰ قلبي إنك تتخطفي مني ... راح قالي اجري يواد ينوح الحق قدرك لتتخطف منك .
قدر بضحك : هو قالك كده .
نوح بضحك : قدامك أهو اسأليه .
قدر بزعل مصطنع : بس أنا مليانه عيوب ونكديه ومش هتستحملني .
نوح بحُب وغمزه : علىٰ قلبي أخف من الريشه ... ها مش هتوافقي بقا وتفرحي قلبي الدعيييف .
ضحكت برقة وهزيت راسي ... ما هو مستحيل أرفض يعني يجماعه بعد علىٰ قلبي اخف من الريشه دي مشمعقول يعني .
______________
" بعد 6 سنين ".
قدر بزعيق : يوووونسسسس خد هنا يا آخرة صبري طالع لأبوك في كل حاجه .
نوح بزعل مصطنع : مال أبوه يا هانم ... هو أنا كنت بمشي من غير بنطلون زيه عشان يبقىٰ طالعلي .
قدر : احم، مقصدش أكيد يـ نُوحي .
نوح :
قدر : مش هترد علىٰ قدرك حبيبتك .
نوح :
قدر بزعل : قولتلك مش هتستحملني وإني نكديه .
نوح بغمزة : وأنا قولتلك علىٰ قلبي أخف من الريشه .
ف الخلفيه بيتردد ورانا صوت الست وهي بتقول " سنين ومرت زي الثواني فحُبك انتَ، وإن كنت أقدر أحب تاني هحبك انتَ♥️🌚 ".
تمت ♥️
#حنين_طلعت.