...

有件事我仲有印象，12月頭你已經嫌棄緊我，但因為你忙，於是叫我幫你叮完飯攞比你。我搵唔到你飯盒，又諗唔到方法唔阻你做嘢又話到你知，於是兩個雪櫃打開曬，逐個飯盒拎出嚟睇。我嗰陣其實好唔開心，覺得連呢樣野都幫唔到你、唔可以令你開心。

結果你因為我令你遲左食飯，成個中午都冇理過我，我嗰陣真係好委屈。之後你有道歉嘅，不過你係對你冇同我講清楚而道歉。

2月嗰陣我同其他人講起我哋所有嘅事，我話唔知點面對你，我真係好想修補番個關係。但佢哋話見到你份人好自我中心，淨係喺自己角度諗野，我點做都唔會有用。嗰陣我唔信佢哋，我覺得係我令你傷心，你先會咁對我。不過我諗番呢件事，唔知點解我覺得佢哋講得有啲岩。

明明對我有意見，但你知你點對我，我都一定會對你好，所以就搵我幫你，然後因為一個唔完全係我嘅錯，就對我冷暴力。我仲同你道歉，因為我怕你覺得我有心咁對你。

之後有一排你都唔係好理我，因為你好容易唔開心，我好擔心你係咪出左咩事，你話你係忙，但我再忙都唔會對重要嘅人咁冷淡。我亦都因為你對我嘅態度，令我開始懷疑自己對你係咪真係咁重要，比一個自己重視嘅人咁對待，我真係好受傷，呢種傷我到今日都未平服到。

我啲焦慮同對你嘅chur就係嗰陣開始，之後仲因為咁要見心理治療。我唔明點解喺你面前自尊咁低，但無論點放低自尊，都換唔番你諒解同好感。係咪我越低姿態，越想去珍惜呢段關係，你就越唔會珍惜。呢半年嚟我諗左好多次，當初你對我嘅好，我後來加倍還番曬，至於我對你唔好嗰啲，我都有嘗試去補償，我已經冇欠你啦。