ᲛᲡᲝᲤᲚᲘᲝ ᲥᲐᲝᲡᲨᲘᲐ

ᲠᲐᲢᲝᲛ ᲐᲠᲘᲡ ᲛᲜᲘᲨᲕᲜᲔᲚᲝᲕᲐᲜᲘ:

•ბევრი ლუკმაპურის საშოვნელად მძიმედ შრომობს. დღევანდელი გაუსაძლისი მდგომარეობა კიდევ უფრო ართულებს თავის გატანას. რა არის ამის მიზეზი?

• შექმნილი კრიზისი უმუშევრობას ან ხელფასების შემცირებას იწვევს.

• სტიქიამ შეიძლება ეკონომიკურად დაგვაზარალოს და ზიანი მიაყენოს როგორც ბიზნესს, ისე უძრავ-მოძრავ ქონებას. ზოგმა შეიძლება ყველაფერი დაკარგოს და შემოსავლის გარეშე დარჩეს.

რა უნდა იცოდეთ:

• თუ ფულს გონივრულად გაანაწილებთ, უფრო გაგიადვილდებათ კრიზისული პერიოდის გადატანა.

• ფინანსური არასტაბილურობის გამო შეიძლება ჩვენი ქონება გაუფასურდეს და დანაზოგი თუ შემოსავალი აღარაფერში გვყოფნიდეს.

• ყველაფერს ფულით ვერ იყიდით, მაგალითად ბედნიერებას და ოჯახურ იდილიას.

რა უნდა გააკეთოთ:

ბიბლიაში ნათქვამია: „თუ გვაქვს საჭმელი, ტანსაცმელი და თავშესაფარი, ამით დავკმაყოფილდეთ“ (1 ტიმოთე 6:8).

ვიყოთ კმაყოფილი, ნიშნავს, უარი ვთქვათ ზოგიერთ სურვილზე და აუცილებელ საჭიროებებს დავჯერდეთ. ასეთი დამოკიდებულება განსაკუთრებით მაშინ არის კარგი, როცა იმდენი შემოსავალი აღარ გვაქვს, რამდენიც უწინ.

კმაყოფილება რომ იგრძნოთ, კარგი იქნება, თუ ფულის ყაირათიანად ხარჯვას ისწავლით. თუ იმაზე მეტს ხარჯავთ, ვიდრე შოულობთ, ბუნებრივია, თქვენი ფინანსური მდგომარეობა გაუარესდება.

პრაქტიკული რჩევები

ᲨᲔᲐᲛᲪᲘᲠᲔᲗ ᲮᲐᲠᲯᲔᲑᲘ

• სამომავლოდ გადადეთ ელექტრონული მოწყობილობებისა თუ გარდერობის განახლება. ჰკითხეთ საკუთარ თავს: ნამდვილად მჭირდება ავტომობილი? შემიძლია თავად მოვიყვანო ხილი თუ ბოსტნეული?

• სანამ რამეს იყიდით, დაფიქრდით, გჭირდებათ თუ არა და გაქვთ თუ არა მისი შეძენის საშუალება.

• თუ შესაძლებელია, დახმარებისთვის მიმართეთ სახელმწიფოს ან ჰუმანიტარულ ორგანიზაციებს.

ᲨᲔᲐᲓᲒᲘᲜᲔᲗ ᲑᲘᲣᲯᲔᲢᲘ

ბიბლიაში ნათქვამია: „მუყაითის გეგმები უსათუოდ შესრულდება, მოჩქარე კი გაღარიბდება“ (იგავები 21:5). ბიუჯეტის შედგენა დაგეხმარებათ, რომ ხარჯმა შემოსავალს არ გადააჭარბოს.

• გამოთვალეთ, დაახლოებით რამდენი გაქვთ შემოსავალი ყოველთვიურად.

• ჩამოწერეთ, რაში გეხარჯებათ ფული და რაში შეგიძლიათ ეკონომიის გაკეთება.

• შეადარეთ შემოსავალი გასავალს. თუ აღმოაჩენთ, რომ ხარჯები შემოსავალს აღემატება, დაფიქრდით, როგორ შეგიძლიათ ფულის დაზოგვა.

ᲜᲣ ᲓᲐᲘᲓᲔᲑᲗ ᲕᲐᲚᲔᲑᲡ / ᲒᲐᲐᲙᲔᲗᲔᲗ ᲓᲐᲜᲐᲖᲝᲒᲘ

• შეადგინეთ გეგმა, რათა შეამციროთ ვალები. თუ შესაძლებელია, საერთოდ ნუ აიღებთ ვალს. უმჯობესია, მოაგროვოთ თანხა რაიმეს შესაძენად.

• ყოველთვიურად გადადეთ გარკვეული თანხა დაგეგმილი ან გაუთვალისწინებელი ხარჯებისთვის.

ᲛᲣᲧᲐᲘᲗᲐᲓ ᲘᲨᲠᲝᲛᲔᲗ / ᲨᲔᲘᲜᲐᲠᲩᲣᲜᲔᲗ ᲡᲐᲛᲣᲨᲐᲝ

ბიბლიაში ნათქვამია: „ყოველგვარი შრომა სასარგებლოა“ (იგავები 14:23).

• შეინარჩუნეთ სწორი განწყობა სამუშაოს მიმართ. შეიძლება თქვენი საოცნებო სამსახური არ არის, მაგრამ გახსოვდეთ, რომ ის შემოსავლის წყაროა.

• იყავით შრომისმოყვარე და საიმედო ადამიანი. ეს თვისებები დაგეხმარებათ, შეინარჩუნოთ ან ადვილად იშოვოთ სამსახური.

თუ სამუშაოს ეძებთ . . .

• გამოავლინეთ ინიციატივა. დაუკავშირდით დამსაქმებლებს მაშინაც კი, თუ ვაკანსია არ აქვთ გამოცხადებული. ახლობლები და მეგობრებიც ჩააყენეთ საქმის კურსში, რომ სამუშაოს ეძებთ.

• მოერგეთ სიტუაციას. როგორც წესი, რთულია ისეთი სამუშაოს პოვნა, რომელიც ჩვენს ყველა მოთხოვნას აკმაყოფილებს.