...

Аввал хабар берганимиздек, Наманганда 60-Халқаро гуллар фестивали қизғин давом этмоқда. Маълумотларга қараганда, Бобур номли маданият ва истироҳат боғига ташриф буюраётганлар сони кунига 100 минг кишига яқинлашмоқда. Бу, дунё гўзаллиги, ҳайрат ва мўъжиза шу ерга жамланганидан. Айниқса, гулчилар намойиш этаётган турфа гулу чечакларга қараб тўймайди киши. Олдингилардан фарқли равишда бу йил профессионал ва ҳаваскор гулчиларга шаҳарнинг Тинчлик майдонида кўргазма ва савдо расталари учун алоҳида жой ажратилди.

76 ёшли Жўрахон ота Мўминов бутун умрини гулчилик равнақига бағишлаган инсонлардан. Унинг кактусчиликни кенг йўлга қўйиш борасидаги саъй-ҳаракатларига бутун шаҳар аҳли тан берган.Икки фарзанди ва неваралари ҳам ота изидан бориб, ўзи тиканли, бироқ, ажойиб кўринишга эга бу гулларни ардоқлаб келмоқда. Мўминовларнинг 25 сотихли гулхонасида 120 турдаги 10 мингдан ортиқ кактуслар бор. Отанинг кенжа ўғли Баҳромжон бу галги байрамга 61 ёшли кактусни олиб келди. Айтишига қараганда, Жўрахон ота уни Украинанинг Херсон шаҳридан олиб келиб, парваришлаган. Қанча ёзу қишни бошидан ўтказган тиканли гул ҳамон тетик.

Андижон туманининг Хакан қишлоғидан келган уста гулчи Исломбек Турдивалиев ташкил этган кўргазма ҳам ихлосмандлар билан гавжум. У тавсия этаётган атиргул, хризантема, мучмулла, қора шаҳзода сингари 20 дан ортиқ турдаги кўчатларни одамлар иштиёқ билан сотиб олишяпти. Айниқса, йил бўйи очилиб турадиган мучмулланинг харидори чаққон. «Қора шаҳзода» ҳам ўзига хос кўриниши билан дилни мафтун этади. Кўпчилик бўйи 3 метрга етадиган бу гулнинг ёнида эсдаликка суратга тушиш учун навбатда тургани ҳам шундан.

«Дунё гуллари» фирма дўкони тўрақўрғонлик Набижон ота Деҳқоновлар хонадонига қарашли. Бу сулола парваришлаётган гулу чечаклар тури мингдан ошади.

— Оддий ҳавасдан бошланган гулчилик оиламизнинг яхшигина бизнесига айланди, — дейди кенжа ўғил Аҳмаджон. — Одамлар ноёб гул кўчатларини уйимиздан олиб кетишади. Тўғри, уларнинг нархи анчагина юқори. Масалан, Голландиядан олиб келиб кўпайтирилган антириумнинг бир тупи 200 минг сўмгача боради. «Фикус Бенжамин» деган бутасимон гулнинг нархи эса бир миллион сўмдан юқори. Билсангиз, ҳақиқий ишқибоз гулнинг баҳосига эмас, унинг қадрига қарайди.

Оилавий гулчилар кўргазмага инновацион усулда ўстирилган антириумниолиб келишибди. У тупроқсиз шароитда, фақат сув билан тўлдирилган шиша идишда парваришланаётган экан. Кўриб ҳайрон қоласиз.

Кўрган кўзни қувонтирадиган бу сингари гуллардан фақатгина завқ-шавқ оласиз, кўнглингиз ажиб бир ҳисдан яйраб кетади. Уни яқиндан туймоқчи бўлсангиз, Наманганга келинг, ҳали байрам давом этади.

Қудратилла НАЖМИДДИНОВ, xs.uz

AGROBLOGER канали