❤️

كنت قاعدة في مكتبي ولقيت بنوته جميلة داخلة وباين عليها انها صغيرة ف متوترة، فحبيت اخفف من حدة الموقف وبدأت بالكلام... 

- ازيك يا جميل عامله إيه!؟ 

- بخير الحمدلله

- اسمك جميل جدا يا لينا

ابتسمت ابتسامه باهته بس مردتش.. 

- طيب يست البنات تحبي اعرفك عن نفسي ولا تبدأي أنتِ

- اتفضلِ

- اشطا، أنا كنز، استشارية نفسية، عندي 28 سنه ومتزوجة وعندي بنوته اسمها روح

وأنتِ بقا

- انا لينا عندي 19 سنه، بيقولو عليا معقدة وضعيفة ودايما حاسة بوحدة حتى لو حواليا اهلى وصحاب كتير

- بصي اتكلمي براحتك، انا هنا صديقة ليكِ، عشان اسمعك بس.. 

- انا بنت متفوقة من صغري بسعى دايما للقمه، وبوصل بفضل الله، لكن لما بعمل اي انجاز سواء كبير او صغير مش بلاقي تشجيع من اي حد حواليا، اهلى بقوا متعودين اني دايما في القمه، وصحابي في اللي بيغير، وفيه اللي مش فارقة معاه اصلا... 

بحاول اتجنب معظم صحابي لاني مش بلاقي نفسي معاهم وكمان دايما يقللوا مني، واهلى مش بقعد معاهم غير قليل جدا وباقي وقتي في اوضتي وسط كتبي سواء مذاكرة او قرءاة... 

- طب بس متقوليش صحاب!!

ابتسمت ومردتش

- اللي يقلل منك ميستحقش كلمه صاحب اصلا، سيبك منهم، واعملي صداقات جديدة.. 

- مش بعرف للاسف، لاني اضعف من اني اتعامل مع بشر، انا بخاف من الناس اصلا، انا لما بخرج لفترة طويلة برة بيتي برجع مستنزفة نفسيا... 

- ومين قالك انه ده ضعف، انتِ شخصية انطوائيه او نقول عندك حالة قلق اجتماعي مش أكتر، ولازم تعرفي انه الشخصية دي ليها مميزات زي ما ليها عيوب... 

- بس انا مش شايفة اي مميزات... 

-وده عيبك لانك مش بتدي لنفسك قيمتك... 

الشخصية الانطوائية، اه صعب انك تتتعاملي مع الناس وتعملي صداقات جديدة، لكن لما بتدخلي في علاقة سواء صداقة أو حب، بتدي كل الحلو اللي عندك، انتي بس لسه ملقتيش الشخص المناسب ليكي، ف مش بناءا على ده انتي شخصية معقدة، بالعكس انتي بس لسه مستنيه وهتلاقي نفسك بتطلعي كل الحلو اللي جواكي دوري وهتلاقي الشخص اللي يناسبك وحاولي تتعاملي مع ناس جديدة عادي ولكن بحذر،لانه برده كتر الصداقات مش حلو،لانه احيانا كتير بيرجع بالسلب... 

أما أهلك ف حاولي تقربي منهم، هتلاقيهم بيحبوكي جدا، بس للاسف انتي اللي قافلة على نفسك، ورافضة فكرة انك تشوفيهم من الجهه الصح، صدقيني مفيش اهل مش بيحبو ولادهم... 

جربي مش هتخسري... 

-حاضر هحاول إن شاء الله

خرَجت وانا روحت البيت، وأول ما دخلت لقيت روح بتجري تقول 

- ماما ماما

اخدتها في حضني

- روح ماما يا ناس

عامله ايه ي صغنن

- الحمدلله يا ماما

لقيت أحمد خارج من المطبخ 

- كل ده تأخير يا هانم!!؟ 

- معلش والله، كان عندي حالات كتير 

روح ارتاح انت وانا هغير واجيب الاكل هوااا

- لما نشوف... 

ابتسمت وسبتهم

أحمد ألطف حاجة حصلتلي في حياتي، هو ااه جواز صالونات، ولكن احنا عايشين حياة سوية وبنفهم بعض وفيه مودة بينا واعتقد دول اكتر حاجة ممكن يخلو أي علاقة تكمل... 

- ها أكلي انا ولا أكل ماما يا روح

- أكل ماما طبعا يا بابا هي دي محتاجه!! 

ضحكنا وقولتلته

- نينينيني

خلصنا اكل وروح نامت وانا احمد قعدنا ف البلكونة كالعادة مع القهوة الجميلة بتاعتنا... 

إحساس انك تتعب وتتبهدل طول اليوم في الشغل وترجع تلاقي حد مستنيك، وكمان بكل حب يشاركك تفاصيل يومه البسيطه وانت كمان تشاركه، احساس لا يُقدَّر بدهب والله... 

كنت سرحانه في حالة لينا واد هي بتعاني ومحتاجة شخص يطمنها بس انه معاها، وفوقت على صوت أحمد... 

- مالِك يا كنزي!؟ 

شكلك بيقول انك تعبانه

فيه حاجة؟ 

- مفيش يا حبيبي، مرهقه مش أكتر

ولانه عارف إني صعب ياخد مني كلام، ففضل أنه يحضني... 

ومن هنا أقدر اقول انه الحضن هو اعظم حاجة يقدمها شخص للتاني... 

______________

- نورتيني يا جميلة الجميلات

ابتسمت.. 

- عامله إيه يست البنات

- الحمدلله... 

- اممم، طب نبدأ يا لينا؟ 

- نبدأ

شاورتلها ف بدأت تتكلم 

- حاولت اعمل زي ما قولتي، لكن منجحتش بشكل كبير، بالنسبة للصحاب الموضوع اصبح عادي بالنسبالي، وفعلا بقيت أعرف اتكلم الى حد ما افضل من الاول مع الناس الغريبة، مبقتش اشوفهم من منظور انه كل الناس مؤذية، وكمان مبقاش يفرق معايا انتقادات اللي حواليا اللي هو طالما أنا صح ف ميهمنيش رأي حد...

- وده المطلوب، اننا لازم نتعامل ب ليونه اكتر مع الناس، بحيث اخد اللي ينفعني، واللي فيه ضرر ليا ارميه ورا ضهري

- ايوة فعلا

أما اهلى انا مش لاقية منهم اي حاجة تدل زي ما قولتي انهم بيحبوني... 

- ليه شوفتي منهم ايه؟ 

- مشفتش حاجة وده اللي مزعلني وخانقني، هم دايما بعاد عني، مش بيحسو بيا، هم مفكرين إني قوية ومفيش حاجة تهزني، وده غصب عنهم، لاني فعلا دايما بظهر قوتي بس، واني اد المسئولية ومش محتاجة حد، بس انا ضعيفه، ضعيفه جداا...

- لو سألتك إيه أكتر حاجه نفسك فيها دلوقت هتكون ايه هي؟ 

- حضن. 

عيوني دمعت، اد إيه الانسان مننا ضعيف وبيحتاج شخص دايما وراه يدعمه مهما بان عليه انه قوي، كل ما عليه أنه يقوله عاش يا بطل كمل... 

اخدتها في حضني بدون كلام، معملتش حاجة غير انها كانت بتبكي وبس... 

- أحسن دلوقت؟

- اه، شكرا جدا ليكي. 

- اشكريني بعدين، ودلوقت هتعملي اللي هقولك عليه

- حاضر

- النهاردة اقعدي مع اهلك وقوليلهم انك واقعة في مشكلة، وهي انك وحيدة ومش معاكي صحاب خالص، وانك تعبانه نفسيا... 

وحاجة كمان عيطي كتير في حضن ماما... 

- مش هيعملوا حاجة، ولا هيفرق معاهم

- بس جربي

- ماشي

الاهل هم السند الوحيد في الدنيا دي، فلما يكونو الاهل بعاد عن اولادهم، صدقوني الاولاد هيعانو جدا، وهيطلع جيل غير سويّ نفسيا... 

__________

- أمي يا أمي

سبت الكتاب اللي كنت بقرأ فيها وقولتلها

- نعم يا روحي

- الميس سألتنا النهارده إيه أكتر حاجة ممكن تخلي الإنسان يلجأ للافعال الوحشة زي الأنتحار مثلا

وانا قولتلها البعد عن ربنا هو السبب في كل مشاكلنا والميس خلت الكل يسقفلي... 

- شطووورة يا كوكو

دايما بقول أنه البعد عن ربنا هو سبب لكل اللي احنا فيه، سبب أننا بنقع في معظم الفتن، وكمان سبب في معظم حالات الانتحار اللي بتحصل، سبب في كل حاجة وحشة بتحصل لينا زي ما روح قالت... 

أصل ليه شخص يلجأ للانتحار وهو مؤمن أنه فيه آخرة، وأنه ليه رب رحيم رؤوف!! 

بقاا عندنا خلل في العقيدة للاسف الشديد!! 

__________

كنت قاعدة في مكتبي ولينا دخلت بهدوئها كالعادة ولكنها كانت مبتسمه ابتسامه نورت وشها...

- شكرا جدا لحضرتك

- مفيش شكر بينا، احنا اتفقنا نكون صحاب

يلا احكيلي ايه اللي حصل، مع أنه واضح جدا من تعابير وشك...

- روحت وحكيت لماما وبابا زي ما قولتي، ولقيت رد فعل اول مرة اشوفها، امي حضتني وبكت، وبابا كان بيحاول يهديني وقال كلام كتير حلو فيا، رفع من معنوياتي جدا، مش عارفة ليه كانوا مخبين كل ده بس انا فرحت جدا، واول مرة محسش اني وحيدة

شكرا مرة تانية

ابتسمت وودعتها

للاسف معظم اهالينا مبيعرفوش يعبروا عن مشاعرهم ناحيتنا، لكن اول ما يشوفوا اولادهم في أزمة بيكونوا اول الناس في ضهرهم، بلاش نرمي اللوم دايما على الأهل، هم بس ظروف الحياة اللي اجبرتهم على كده، بلاش نخلي الشيطان يضحك علينا ويرسم لينا صورة وحشة عن اهالينا... 

نصيحه برده للاهل حاولوا بقدر الإمكان تقربوا من ولادكم وتشجعوهم وتفرحوا دايما بإنجازاتهم البسيطه... 

وبالنسبة للصحاب بالله اللي عندها كلمه حلوة ومحفزة تقول، غير كده ممكن تلزم الصمت فضلا!! 

قربوا من ربنا أكتر وأكتر، قربوا من اهاليكم واعذروهم، حبوا نفسكم وعظموها... 

وأخيرا أحب أقول 

اد إيه الإنسان فينا محتاج وقت طويل عشان بس يوصف فيه إنه إزاي كلمة بتطفي وإزاي كلمة بتنوّر، وإن الإنسان مهما كان شخصيته قوية بس بدون قصد بيتأثر بكلام اللي حواليه...

تمت

#فاطمهه_قرني