♥️
#ســڪࢪيبـت🤍
^ومايبقاش مكتوبلي ليه وانا محتاجاه أكتر منها^
=خلاص يا آية دا مسلسل يعني مش كده
"هو في حد بيحب كدا؟ "
=ااه فيه بس البعيدة جبلة ومابتحسش
"عاااااا"
=ياستي خلاص بقي
"قطايف اللي هناك دي! "
=ااه
"طب هات قطوفة"
=قطوفة!... اتفضلي
"سلمت"
=وبالنسبة للمسلسل والعياط
"دي قطايف بالكريمة يعني تقول للاكتئاب قوم وانا اقعد مكانك... ممكن واحدة كمان"
=خدي يا ستي الطبق كله اهوه بالهنا
"مش هتقولي هتتخني والشغل ده! "
=لا طبعا كلي بالهنا والشفا... انتِ دايما جميلة
"شايف الكنافة اللي هناك دي! "
=اه.. اجيبهالك
"لا انا اللي عملاها كلها بقي عشان انت مش بتحبها بايتة"
=عقبال ما تعملي في بيت جوزك ان شاءالله
"ااا انا.. انا هقوم امشي بقي"
شاور بإيده وقام وقف
=لا خليكِ انا ماشي ورايا مشوار مهم... السلام عليكم
"وعليكم السلام ورحمة الله وبركاته"
فضلت قاعدة شوية... بيصعب عليا كل ما اقفله من موضوع الجواز ده... بس هيا حاجة جوايا بتخليني اقفل الكلام معاه في الموضوع ده انا عارفه انه بيحبني بس هو مايعرفش اني بحبه ومش عاوزاه يعرف... فوقت على صوت ماما
_يالا يا آية ولا هتتسحري عند عمك كمان
-طب والله تقعد انتِ عارفة انا بحب آية ازاي
"ربنا يكرمك يا مرات عمي وانا كمان بحبك والله"
خرجنا م الشقة ومشينا مشوار طويل على مانوصل للشقة اللي قدامهم.... دخلت أوضتي وفضلت مستنياه في البلكونة دخلت اشرب وسمعت صوت صفير فخرجت بسرعة
"اتأخرت ليه! "
مد إيده بكتاب
=اتفضلي
"ادا! "
=كتاب قصص الأنبياء اللي كنتِ عوزاه... هو نفس الكاتب صح ولا حد تاني!
"الله... لا هو شكرا بجد يا مراد"
=لا يا ستي لا شكر على واجب... ثم أنتِ مش استنتيني ليه؟
"والله كنت مستنياك بس عطشت فدخلت اشرب"
=طيب يالا ادخلي
"هخلص الكتاب واجيبهولك"
=هقولك كام مرة إني بقرأ الكتاب قبل ما أجيبهولك
ابتسمت بفرحة زي العبيطة
=ادخلي يالا يا بنتي
"اه تمام سلام"
=ماتنسيش تقرأي وِردك قبل ما تنامي
"حاضر تصبح على خير"
دخلت وقفلت ووقفت اتنصت عليه
=وانتِ من أهلي
انا مش عارفه انا بعمل ايه بس انا مبسوطة كل ما احس انه بيحبني برغم اني بمثل دور العبيطة ده.. تاني يوم روحت اجيب طبق قطايف من عندهم عشان مامته بتعمله حلو اوي اوي يعني
=انتِ هتفضلي طول رمضان تاخدي قطايف من عندنا
"هو عمي اشتكالك ولا حاجه! ثم إني مش باخد غير 8 واحدات بس عشان الرجيم"
=لا بتحافظي لا صحتك اوي
"جدا على فكرة... سلام عشان الحق اعمل العصير"
خرجت م الشقة ولقيته ورايا
=استني
"نعم! "
=انا عاوز كوكتيل م اللي بتعمليه عشان بيبقي طعمه حلو اوي اوي يعني
"حاضر يا سيدي ونبقي خالصين ماشي! كمان كنت عايزه اسألك على حاجة"
=تتجوزيني
شهقت م الخضة ورجعت خطوة ورا
=ها!!
خدت نفس طويل وطلعت بهدوء
"السؤال اللي كنت عاوزه اسألهولك هو المد المتصل كام حركة! "
اتنهد وخد نفسه وبص قدامه
=يمد 4 او 5..ولو كانت الهمزة متطرفة يمد ل 6
"طب هرد عليك لما أخلص الخاتمة ال 3 سلام"
مشيت بسرعة من قدامه ودخلت شقتنا... عدي 5 ايام وفضلي يوم واخلص الخاتمة ال 3...المفروض هرد اقوله ايه بقي! اوافق! اه طبعا ايه العبط ده.. لا هرفض ايوا هرفض... ياربي.
تاني يوم كان معزوم عندنا هو وعمي و والدته وجايبة القطايف معاها... طب انا لو رفضت دلوقت هاكل قطايف حلوة زي دي منين! لا اثبتي وارفضي طالما مترددة كدا يبقي أرفضي.... خلصنا اكل وبابا وعمي نزلوا وماما ووالدته قاعدين قدامنا يشربوا الشاي واحنا قعدنا نتكلم شوية
"يعني كلمة 'السماء' تمد 6 حركات صح! "
=ايوا لأن الهمزة متطرفة
"هو ايه الحكم إني عارفة التجويد وماقرأش بيه؟ "
=اولا انتِ عارفة ايه غاية التجويد؟
"لا"
=غايته هي صون اللسان من اللحن في كتاب الله لكي ينال رضا ربه... يعني انتِ لو ماقرأتيش بالتجويد هيبقي في لحن اي خطأ
"تمام"
سكت شوية ومش عارفه ارد عليه بقراري ازاي!
=ختمتي ال 3 ولا لسه؟
"الحمدلله"
=وقولتي ايه؟
"الأول انت تعرف ايه غاية الزواج؟ "
ضحك وبصلي
=أحب اعرف تاني
"هي إتمام نص الدين"
=بجد!
"اه والله"
=طب والقرار فين برضه مااعرفتش
"انا قايمة ألحق العشا سلام عليكم"
دخلت صليت وفضلت في أوضتي... تاني يوم لقيته عندنا
"مراد! عامل ايه؟ "
=مش كويس خالص... ومش هيحصل طيب ابدا
"في ايه بس اهدي"
=فين يا هانم الكوكتيل اللي قولتلك عليه
بصتله وبحاول استوعب ان كل ده عشان الكوكتيل
"انت بتستهبل صح! "
=اه بستهبل
"على فكرة كنت هصلي العصر واجيبهولك"
=على فكرة في حل أسهل من إنك كل يوم تعمليه وتجيبهولي
ضحكت وسيبته ودخلت جيبت الكوكتيل
"اتفضل"
=سلمتِ... مش هتقولي برضه رأيك؟
"تعرف ان للزواج غاية آخري غير اللي قولتهالك! "
=ايه هيا بقي إن شاءالله
غمزت بعيني "هتعرف بعدين"
بعد يومين كانا قعدين في بيتنا وبنقرا الفاتحة... ماتفهمونيش غلط يا جماعه انا وفقت عشان القطايف بالكريمة
=حمد الله على السلامة
"هههههه الله يسلمك"
=امسكِ ده
"ايه ده؟ "
=دا مصحفي اللي بقرأ منه دايما... ليكِ فيه رسالة ماتقرأهاش الا لما تختمي مرة م المصحف
"طب ما ينفعش اشوفها دلوقت ووالله هختم صدقني"
=لا يمكن
"مراااد"
=انا نقطة ضعفي مراد دي... خلاص افتحي المصحف واقريها
فتحت المصحف وخدت الرسالة
^أتمني أن أكون لكِ طوق يوسف الذي يُنجيكِ من الحزن، وأن أكون عالمكِ الذي تنطوي به عند شعورك بالغربة بين هؤلاء البشر... كُل أمانيّ ألا يُلوثكِ عالم البشر وتظلِ تلك الطفلة البريئة التي لطالما أحببتها، ألا تنطفئ تلك اللمعة التي بعينيكِ، أن أكون دائمًا وأبدًا مرادك التي تردين الوصول إليه، و أدعوا الله أن يجعلني لكِ نورًا يُزين طريق خُطاك^
ابتسمت على حبه وأول مرة ماندمش على قرار خدته بقلبي
=ايه بقي الغاية التانية من الزواج!
"هما غايتين"
=طب قولي
"اول حاجه هلاقي مين يصححلي وانا بقرأ ويعلمني التجويد"
=والثانية!
"استني في البلكونة الساعة 11 اتفقنا"
=اتفقنا
الساعة 11 الا خمسة دخلت البلكونة وحدفت مرسال في بلكونتهم ودخلت.. شوية وسمعت صوت صفير بس وقف.. قربت م البلكونة وسمعته وهو بيقرأ
"والغاية الثانية كانت" أنتَ" تَگمُن فيگ وبِقلبِگ،،أنتَ مَلاذي وغايتي لا يُوجد بِرَوحي سِواگ ،،ولا يُوجد أحدٌ بِالعَالم ابتسامَتهُ تُعيدُ لِي شَغفْ الحياةِ مِثلگ،،أَدعُوا اللَّه أَن يَجعَلِني آيتگ التي تُنيرُ خُطي دُرُوبِگ وألا تَضِل أبدآ "