...

Боғдорчилик ва деҳқончилик маҳсулотларидан сифатли, мўл ҳосил олишда зараркунандаларга қарши ўз вақтида курашиш катта аҳамиятга эга. Ҳозирги кунда ўсимликларга зарар келтирувчи зараркунандаларнинг тури ва уларга қарши курашувчи препаратларнинг сони ортиб бормоқда. Касалликларга қарши ўз вақтида ва самарали курашишда пуркагич аппаратларнинг ўрни муҳим.

Пуркагичларнинг бир неча турлари мавжуд. Масалан бир киши учун ихчам қилиб ишлаб чиқарилган ҳамда тракторларга ўрнатиладиган катта ҳажмдаги турлари ҳам мавжуд. Тракторларга бириктирилган пуркагичлар ёрдамида катта-катта экин майдонларига ўз вақтида зарур дорини пуркаш мумкин. Лекин боғларга ва боғ ораларидаги экинларга, томорқа хўжаликларидаги экин майдонларига ҳамда кичик дала майдонларига махсус ишлаб чиқарилган моторли ва моторсиз аппаратлар жуда қўл келади.

1-расм. Ҳаво орқали ишлайдиган пуркагич

Моторсиз ҳаво дамлаш орқали ишлайдиган пуркагичлар (1-расм) анча арзон, ихчам ва енгил бўлади. Бу турдаги пуркагичлардан бир киши мустақил фойдаланиши мумкин. Бу унинг афзаллиги бўлса, камчилиги шуки ушбу турдаги пуркагичлар тез ишдан чиқади, узоқ масофага пуркамайди. Бундай пуркагичлар ўсимликни барги орқали озиқлантиришда қўл келади ва асосан деҳқончиликда ишлатилади.

Моторли пуркагичлар (2-расм) эса анча қиммат туради. Шунга қарамасдан уларга бўлган талаб анча юқори. Чунки бундай пуркагичлар узоқ масофага 8-10 м ва ундан ҳам узоқроққа пуркай олади, вақтни тежайди. Лекин фойдаланишда 2 кишини ҳамкорликда ишлашини талаб этади.

2-расм. Моторли пуркагич

Моторли пуркагичнинг тузилиши қуйидагича бўлади: 1-2 Л ҳажмга эга бензин бакига, 10-15 Л ҳажмга эга сув бакига ҳамда моторга эга. Бензин ва сув баки моторнинг юқори қисмида жойлашади. Моторли пуркагичларнинг тезлигини бир неча хилда ошириб ёки камайтириб ишлатиш мумкин. Юқори тезлик ва босим дорини узоқ-яқинга бир хилда пуркалишини таъминлайди.

Агар сиз моторли пуркагичдан биринчи марта фойдаланаётган бўлсангиз дастлаб унинг бензин бакига мотор мойи аралашган бензин қўйинг. Сўнгра сув бакига тоза сув қўйиб, пуркагични ишлашини текшириб кўришингиз мумкин.

AGROBLOGER канали

mirishkor.uz

agronet.uz