...

Жаҳонда энг ноёб лолалар Нидерландияда етиштирилади. Наманганнинг Косонсой туманида ҳам ўтган йилдан бошлаб машҳур ҳолланд лолалари етиштириш йўлга қўйилди.

Лола плантацияси «Гулчиликни ривожлантириш маркази» томонидан барпо этилди ва Нидерландиядан лола гулининг қатор навлари олиб келиб экилди.

Лолалар одатда тоғли ҳудудларда ўсади. Салқинсевар бу гуллар парвариши учун ўзига хос табиати ва иқлим шароитга эга бўлган Косонсой тумани танлангани ҳам бежизга эмас. Ҳозир 5 гектар ер майдонини эгаллаган ушбу плантацияда 30 дан ортиқ аҳоли меҳнат қиляпти.

«1981 йилда Германияга борганимда, йўлнинг четига экиб қўйилган лолаларни кўриб ҳавас қилгандим. Мана ўзимиз ҳам ўтган йил кузда Нидерландиядан лола гулининг 32 хил рангдаги 16 нави пиёзидан 2 миллион 250 минг дона келтирилиб, замонавий техника ёрдамида экдик. Мақсадимиз — шу лола гуллари билан ўзимизда ҳам кўча-хиёбонларни безашга ҳисса қўшиш. Бу йил 18 хил лоланинг 9 тонна уруғини қададик. Ҳар биридан 6 тагача уруғлик олиш мумкин», — дейди фермер Зоҳиджон Баҳромов.

Ҳолланд лолалари оддий тоғ лоласига нисбатан анча чидамли ҳисобланади, очилгач гулини 1-2 ойгача яхши сақлаб туради. Ҳатто узиб олинганида ҳам, 25 кунгача ҳолатини йўқотмайди.

«Лолалар кечки пайтда ўзига хос ифор таратади, ҳар бирининг ифори ўзгача. Бу ердан чиқиб кетгингиз келмайди. Кўрган одамнинг баҳридили очилади. Одамлар бутун республика бўйлаб кўргани келишяпти, Ҳолландияни шу ерга олиб келиб қўйибсизлар дея раҳмат айтиб кетишяпи. Бу гапларни эшитиб янаям қувониб кетаман, шунинг ўзидан роҳатланиб, кундан кун ёшаряпман, назаримда», — дейди Дилфуза Раҳмонбердиева.

Лола гули қимматбаҳо саноат хомашёси ҳисобланади. Фермернинг сўзларига кўра, лола гули фармацевтикада ҳам кенг қўлланилади. Бундан ташқари, ранг-бўёқ олиш ва парфюмерия маҳсулотларини ишлаб чиқаришда ҳам фойдаланилади. Келажакда Ҳолландия билан ҳамкорликда мана шундай истиқболли лойиҳалар амалга ошириш режалаштириляпти.

AGROBLOGER канали

kun.uz