...

Франция давлатидан импорт қилинган 12 минг 300 туп турли мевали дарахт кўчатлари “Хоразм ТИФ” ЎКЧМ инспекторлари томонидан карантин кўригидан ўтказилиб, Ўсимликлар карантини давлат инспекциясининг марказий карантин лабораториясига экспертиза учун юборилди. Натижаларга кўра, 850 туп шафтоли (жумладан, нектарин) кўчатида “Бўртма нематодаси” ва “Жануб бўртма нематодаси” каби зарарли организмлар мавжудлиги аниқланди.

Бу ҳақда “Ўздавкарантин” ахборот хизмати ЎзАга маълум қилди. 

Ушбу зараркунанда турли ўсимликларнинг ер остки қисмида паразитлик қилиб, шиш (бўртма) ҳосил қилади. Айниқса, помидор, бодринг, сабзи, пиёз, ғўза экинлари, гилос, ўрик ва бошқа турдаги мевали дарахтларни кучли зарарлайди. Айни пайтгача дунё бўйича бўртма нематодалар билан 2 минг турга яқин турли оилага мансуб маданий ва ёввойи ўсимликлар зарарланиши аниқланган бўлиб, бу ҳолат йил сайин ортиб бормоқда. Шунингдек, мавжуд ҳосилни нобуд қилиш билан бирга, суғориш, техника ва тупроқ орқали бошқа далаларга ҳам тарқалади.

Белгиланган қонун талаблари асосида касаллик аниқланган шафтоли кўчатлари “Хоразм ТИФ” Ўсимликлар карантини чегара маскани инспекторлари ҳамда тегишли ташкилотларнинг масъул ходимлари иштирокида ёқиш йўли билан йўқ қилинди.

Шу ўринда айтиш лозимки, тадбиркорлар карантин остидаги ҳар бир маҳсулотни Ўзбекистонга олиб кириши учун карантин рухсатномаси ҳамда экспорт қилувчи мамлакатнинг ўсимликлар карантини бўйича давлат органлари томонидан бериладиган фитосанитария сертификати ёки гувоҳномасини олиши шарт. Зеро, фитосанитар қоидаларга қатъий амал қилинсагина, мамлакатимиз экинзорлари, боғ-роғлари ҳамда дала майдонлари зарарланишининг олди олинади.

uza.uz

@AGROBLOGER канали