*/

സുന്നരികളെ പബ്ലിക് നുയിസൻസുകളായി പ്രഖ്യാപിക്കണം,

നിങ്ങൾ (നമ്മൾ പെണ്ണുങ്ങൾ )കാമുകനൊപ്പം ബീച്ചിൽ കൊഞ്ചിയിരിക്കുകയായിരിക്കും, "ചേർന്നിരിക്കീ... മാസ്ക്കില്ലായിരുന്നെങ്കിൽ എന്ത് നന്നായേനെയല്ലേ കണ്ണേ.. " എന്നെല്ലാം ചിങ്കരിക്കുമ്പോ ഒരു തടിമ്മൻ പുസ്തകവും കൊണ്ട് മുതൽമുടക്ക് ഏതുമില്ലാതെ സുന്നരിയായ ഒരെണ്ണം വരും, ഈ ബീച്ചിൽ ഈ ചെയര് മാത്രമല്ലെ ഉള്ളൂ എനിക്കീ തടിമ്മൻ പുസ്തകം വായിച്ചു പഠിക്കാൻ എന്ന മട്ടിൽ അവന് നോക്കാൻ ഒരു പ്രയാസവും ഇല്ലാത്ത ദിക്കിൽ വന്ന് ഒരു ഇരിപ്പിരിരുന്ന് വായന തുടങ്ങും,പരീക്ഷ ആയിരിക്കും അല്ല്യോ? ബീച്ചിലല്ലേ സാധാരണ ആള്ക്കാര് പരീക്ഷതലേന്ന് വന്ന് പഠിക്കാനിരിക്കുക, എനിക്കെല്ലാം മനസിലാവുന്നുണ്ട് സുന്നരീ, ഇമ്മാതിരി പഠിച്ച്ചാൽ പരീക്ഷയിൽ തോറ്റു ഒരു പണീം കിട്ടാതെ നടന്നു സൗന്ദര്യം എല്ലാം പോവത്തെയുള്ളൂ...

പെറ്റു വീണപ്പോ മുതൽ ഒരു മുതൽമുടക്കുമില്ലാതെ സുന്നരിയായ അലസസുന്നരി എന്റെ മനസമാധാനം കളയും, (എന്തോന്നിന് ഇത്രേം വിഷാദം മുഖത്ത്..? )

എന്നാ സിസ്റ്റമാറ്റിക്കാ അല്ല്യോ എന്ന് അവൻ അതിശയിക്കും, എനിക്ക് മനസിലാവുന്നുണ്ട് ഇളക്കം..

ഇടക്ക് അവനേ നോക്കുമ്പോളാണ് ഇത്രേം സുന്നരൻ എങ്ങനെ എന്നോട് പ്രേമത്തിലായെന്ന് തോന്നുക, ഇവനും ഉണ്ട് മുതൽ മുടക്കില്ലാതെ കിട്ടിയ സൗന്ദര്യം! (ഞാനിതു വരെ ശ്രദ്ധിച്ചില്ലല്ലോ ) ഇവന് ആബ്സ് ഉണ്ട് (ഞാൻ നോക്കാൻ വിട്ടുപോയതാവും ) ഇവന് നീണ്ട ചുരുളൻ മുടിയുണ്ട് (വേണ്ടവിധം പരിഗണിച്ചിട്ടില്ല, ദുഃഖിക്കുന്നു) ഇവന്റെ കണ്ണിനു തിളക്കം( ആർക്ക് വേണ്ടി? ) ഇവനിത്രേം യൗവനം യെന്തിനു? വയോധിക്കരെന്ന പതിവ് പരിപാടി നിർത്തേണ്ടിയിരുന്നില്ല... ശോകം

യെന്റെ രാഷ്ട്രീയ സൂക്ഷ്മത തല്ക്കാലം എവിടെ വെക്കും? പോവുമ്പോ എടുക്കാൻ മറന്നു പോവുമോ? താഴെ
വെക്കേണ്ട, വീണ്ടുമെടുക്കാൻ പാടാണ്, വേറെന്തെലും ഐഡിയ നോക്കാം..

നിങ്ങളവനോട് ചോദിക്കും.. . "വല്ലാതെ വിശക്കുന്നു, നമുക്ക് കഴിച്ചാലോ? ", അവൻ പറയും "ഇവിടെന്താ തണൽ അല്ലെ.. നമുക്കിവിടെ ഇത്തിരി നേരം കൂടെ ഇരുന്നൂടെ... " എനിക്കെല്ലാം മനസിലാവുന്നുണ്ട്, നമുക്ക് വേണേൽ ആ തടിമ്മൻ പുസ്തകം തിന്നാം....എന്തേ?

നിങ്ങൾ ബിരിയാണി ഓർഡർ ചെയ്യും, നിങ്ങടെ വയറ്റിലെ രാവിലെ കഴിച്ച ദഹിക്കാത്ത കോഴിക്കറിയും പത്തിരിയും പാടില്ലെന്ന് ആംബുലൻസ് സൈറനിടും.. പ്രിയപ്പെട്ട കോഴിക്കറിപ്പത്തിരീ ഇത് വേറൊരു കാര്യത്തിനാണ്,, നിങ്ങൾക്കിപ്പോ മനസിലാവില്ല, നിങ്ങൾ വേറെ ഡയമെൻഷനിലാണ്...

ആശ്വാസം...തടിമ്മൻ പുസ്തകതീറ്റക്കാരി പോയികിട്ടി..

ചിരിയോടെ പ്രേമത്തോടെ വലത്തോട്ട് തല നാൽപത്തഞ്ചു ഡിഗ്രിയിൽ ചലിക്കുമ്പോ ബിരിയാണി എത്തുന്നതും നിങ്ങളത് കാണുന്നതും ഒരുമിച്ചാവും..

ജന്മനാമുതൽമുടക്കില്ലാതെ സുന്നരിയായ മറ്റൊരു....

അവൻ പറയും നല്ല ബിരിയാണി നല്ല സ്ഥലം നമുക്കിവിടിരിക്കാം...എനിക്ക് നിന്റെ കുളിർമ മനസിലാവുന്നുണ്ട് കുഞ്ഞേ.. എന്റെ നീയല്ലേ.. മുന്നിലെ കടലിൽ ഒഴുക്കിക്കളയാനൊക്കുമോ...

സാർ, എനിക്ക് വഴിനടക്കണം, ജീവിക്കണം, സുന്നരികളെ പബ്ലിക് നുയ്സൻസുകളായി പ്രഖ്യാപിക്കണം.. അവരെ കാണുന്ന മാത്രയിൽ പിടിച്ചു കൊണ്ടുപോയി ആൾപാർപ്പില്ലാത്ത സ്ഥലങ്ങളിൽ കൂട്ടമായി പാർപ്പിക്കണം...

അവരുടെ അലസവിഷാദ സൗന്ദര്യവും താങ്ങിയുള്ള ഏകാന്തനടപ്പ് അവസാനിപ്പിക്കണം