🌐🌐🌐🌐
*ALL INDIA RADIO AIZAWL*
*REGIONAL NEWS UNIT*
REGIONAL NEWS BULLETIN
HEADLINES (MORNING) - 18.3.2021
1. Ni 23 chhung awh Mizoram Legislative Assembly Budget Session chu nizan khan tiamchin awm lova tihtawp a ni.
2. Mizoramah COVID-19 hri kai pathum hmuhchhuah a ni a, 1 in a thihpui.
3. Prime Minister Narendra Modi-a chuan khawvel pumah thil thar ngaihtuah chhuahna ti hmasawn zelin nungcha leh thilnungte humhalhna kawngah hmalak a tul thu a sawi.
4. France ramin COVID-19 hrileng vawi thumna an tuar mek.
<><><>
SESSION ADJOURNED SINE DIE
Ni 23 chhung awh Mizoram Legislative Assembly Budget Session chu nizan khan tiamchin awm lova tihtawp a ni.
Speaker Pu Lalrinliana Sailo chuan session neih chhunga tih tur te tluang taka tih zawh theih a ni chu lawmawm a tih thu a sawi a, Lok Sabha leh Rajya Sabha ah te, state dang tamtakah te an tih theih loh Mizoram ah erawh tluang taka zawh a ni chu a lawmawm hle a ni a ti.
Session neih chhung hian Chief Minister Pu Zoramthanga, Finance changtu chuan kum 2021-22 chhung atana Mizoram sum ruahman cheng vbc 11148 leh nuai 89 a pharh a, sawiho a nih hnuah a hman theihna tur Appropriation Bill 2021 pass nghal a ni.
Budget ah hian chhiah thar lakna tur a awm lo a, amaherawhchu chhiah hmu hnem thei turin theihtawpa hmalak a ni ang tih Chief Minister chuan a sawi a, Budget ah hian sorkar ngaih pawimawh lian ber SEDP atan cheng vbc 400 ruahman a ni a, hei hi ‘a chi tur’ ni a sawiin Chief Minister chuan SEDP chu project siama kalpui tur anih avangin cheng vbc 400 let tam tak sorkar laipui atanga haichhuah theih beisei a ni a ti.
Session neih chhung hian House a chhan chi starred question 387 lut zinga 60 chhan hman a ni a, unstarred question 193 a lut a ni.
Lehkha pawimawh 19 pharh a ni a, bill 5 pass a ni bawk a ni.
Tun tum sessionah hian Private Members Resolution pahnih, infiamna lama hmalakna chhunzawm tur thu leh Covid19 hripui dona kawnga nasa lehzuala tan ho ni se tih chu pass a ni bawk.
(DESK)
<><><>
BUDGET
Nimin khan Assembly Budget Sessionah Chief Minister Pu Zoramthanga leh Minister Pu TJ Lalnuntluanga te hna chanpuala sum mamawh house-ah sawiho a pass a ni a, A sawihonaah hian Eptu lam, Congress Party erawh an tel ve lo a ni.
Chief Minister Pu Zoramthanga hna chanpual Legislative Assembly, Governor, Council of Ministers, Vigilance Department, Finance Department, Secretariat Administration, Planning&Programme Implementation, General Administration Department, Horticulture Department leh Public Works Department - a sum mamawh cheng vaibelchhe 3132 nuaih 81 sang 8 leh Pu TJ Lalnuntluanga hna chanpual – Law & Judicial Department, Parliamentary Affairs Department, Environment, Forest and Climate Change Department leh Transport Department – a sum mamawh cheng vaibelchhe 305, nuaih 22, sing 9 sang 7 a ni.
(DESK)
<><><>
COVID
Nizan khan COVID-19 hri kai 1 a thi a, case thar 2 dang hmuhchhuah a ni bawk.
Covid19 avanga thi hi Aizawl Venghlui-a Hmeichhia kum 54 mi a ni a, Tun thla ni 11 khan Silchar atanga lo hawin, ni 6-a Silchar a RAgT hmanga sample test tawh Negative result nei a ni.
Aizawl a lo thlen hnuah Covid natna in a ken a taksaah a lanchhuah avangin damdawi in pakhatah inentir turin an kal a, sample test leh niin Positive tih hmuchhuah a ni a. ZMC ah dah luh nghal niin, nizan Dar 11:40 khan a thi a ni.
Nimin khan ZMC RT-PCR laboratory-ah COVID-19 positive hmuhchhuah thar 1 awmin, RAgT hmangin COVID-19 positive hmuhchhuah thar 1 hmuhchhuah a nib awk a, ZMC RT-PCR Laboratory-a positive hi Aizawl Zonuam veng: Mipa kum 26 mi a ni a. Positive contact neih vanga home quarantine lai mek, tunhnaiah a chhungte zing ami positive hmuhchhuah a ni a. Symptom a nei lo a ni.
Ani bakah hian Govt. Complex-a cheng: Mipa kum 20 a upa, gym kal thin a ni a, sports competition a tel tum, covid free certificate a ngaih vanga Private Hospital pakhat a sample test a ni a. Symptom nei lo niin, hri a kaina chhui mek a ni.
Tihian, Mizorama Covid19 avanga thi zat chu mi 11 an ni a, a kai tawh zawng zawng zat hi 4445 niin, enkawl dam tawh 4417 an ni a, enkawl lai mek mi 17 an awm bawk a ni.
Nimin khan Kolasib DC Dr.H.Lalthlangliana chuan Mizoram Journalists' Association, Kolasib District member te chu a office ah kawmin Kolasib District a Covid-19 dona kawng a hmalakna kal mek leh Kolasib District dinhmunte a sawipui.
Kolasib DC chuan tun dinhmun ah nunphung pangngai zawh chhoh tan anih rualin Assam atanga Mizoram luhka Vairengte leh Bairabi ah te chuan a tul angin khualzin mite endikna kalpui chhunzawm zel a nih thu a sawi a, sawrkar inkaihhruaina dinglaite ngai pawimawh a, fimkhur chhunzawm zel a tul thu a sawi.
Kolasib khaw chhungah kumin January ni 20 kha Covid-19 kai thar hmuh hnuhnun ber a ni a, Vairengte ah chuan January ni 30 kha niin, Bairabi ah February ni 20 khan hmuh a ni bawk a ti.
DC chuan, Kolasib District huapin ni 20 chuang Covid-19 kai thar hmuh a ni tawh lo a ni, a ti a. Hetiang dinhmun a Kolasib District a awm theih na chhan chu mipuite thuawihna leh dawhtheihna vang leh thawktu hrang hrangte thawhho that vang ani, a ti.
Siaha ah chuan nimin khan Covid-19 hri danna vaccine lak thawh hnihna chhunzawm leh a ni a, Kum 60 chin chunglam leh kum 45- 59 inkar natna benvawn nei mi 320 hnenah nimin khan 1st dose hi pek an ni.
Ni 15 hnu ah 2nd dose hi pek leh an ni ang.
A thawh khatna ah Health Care workers, Frontline workers leh kum 60 chin chunglam natna benvawn nei te pek an lo ni tawh a ni.
(DIPR/Andrew/CZ))
<><><>
COVID VIDEO CONFERENCING
Prime Minister Narendra Modi hova State hrang hrang Chief Minister te leh UT Administrator ten ramchhung COVID-19 dinhmun leh hri danna kalpui dan chungchang video conferencing nimina an neihah Health Minister Dr. R. Lalthanglianan Mizoram dinhmun leh vaccine mamawh belh chungchang a thlen a ni.
Health Minister hi he video conference ah hian Chief Minister aiawhin a tel a, Mizoram dinhmun te leh COVID-19 vaccine pek dan dinhmun tlangpui leh vaccine mamawh belh a nih thu he meeting ah hian a thlen a. Hripui dona kawnga Mizoram a hlawhtlin dan leh a chhan hrang hrang te a tarlang bawk a ni.
Nilaini thleng khan ram pumah COVID-19 case nuai 114 chuang hmuhchhuah tawh niin, chung zinga nuai 2 sing 3 sang 4 hi hri vei mek an ni a. Hripui avanga boral mihring nuai 1 sing 5 sang 9 awm tawhin sample test tawh zawng zawng zat hi vaibelchhe 23 chuang a ni tawh a. Mihring vaibelchhe 3 leh nuai 51 hnenah COVID-19 vaccine pek an ni tawh a, heng zinga vaibelchhe 1 leh nuai 38 chu kum upa lam leh natna benvawn neite an ni. Khawvel pumah USA tih lohah chuan vaccine pek tamna ber ram chu India a ni.
(DIPR)
<><><>
BSF
Bangladesh dintu Sheik Majibur Rahman piancham kum 100-na puala Border Security Force (BSF) ten India leh Bangladesh inunauna leh inthian that na bakah ramri a awm te tan a security chungchang hriattirna te leh ramri kaltlanga a ruk a damdawi leh ruihhlo dang tawlhruk a that loh zia inzirtir nan a an buatsaih Maitri Cycle rally chu nimin khan Border Out Post Silkur-ah khar a ni.
He cycle rally hi Jan ni 10 khan BoP Paitar, 153 BSF Bn South Bengal Frontier 24 North Pargana Dist atanga vailiam a ni a, mi 23 in motor cycle-in 4097 Km a thui an tlan a, West Bengal atanga lo tlan tanin Assam, Meghalaya, Tripura leh Mizoram an paltlang a, vawiin khan 60 Bn BSF awmna Indo-Bangla Border, Lunglei Dist.khawthlang lam Silkur-ah hun kharna hman a ni ta a ni.
He hun hi Bangladesh Addl DG Border Guard Zakir Hussein Bangladesh an a rawn hmanpui a, Bangladesh in zalenna a neih hi India in a lawmpui a, an ram dintu piancham kum 100-na hi BSF chuan lawmsak a duh a, Cycle rally bakah ramri a awm te tan Football match buatsaih leh a ni ang a ti.
Ram 2 te chu hun lo kal zel turah pawh kawng hrang hrang a thawk dun tawhin ram 2 te thawh dunna hi ramdang tan pawh entawn tlak a ni tih a sawi.
(Lunglei PTC Thanghmingliana)
<><><>
PM
Prime Minister Narendra Modi-a chuan khawvel pumah thil thar ngaihtuah chhuahna ti hmasawn zelin nungcha leh thilnungte humhalhna kawngah hmalak a tul thu a sawi. Nimina International Conference on Disaster Resilient Infrastructure a hawnnaah he thu hi sawin Pu Modi-a chuan kum 2021 chu hrilengin harsatna a thlen atanga insiamthar lehna kum anih ngei a beisei tih a sawi a. Tuna khawvelin harsatna a tawh mek chu hmuhlawk loh thil a ni a, kum za dana vawi khat thleng thin ang a ni a ti a.
Pu Modia chuan hrileng chuan zirtur pawimawh tak min hnutchhiah tih sawiin tu ram mah hi khawvel puma chhiatna thleng thin lakah hian an him lo tih a lang a ni a ti a. Hrileng avangin khawvel ram hrang hrangte tangrualin an thawkho thei tih a lang a, hei bakah hian kil hrang hrang atanga chhiatna lo thleng thei do turin ngaihtuahna thar hman dan min zirtir bawk a ni a ti a. Hrileng avanga mipui hriselna kawnga chhiatna lo thlengin zirlai a zirchhuah tir chu khuarel chhiatna lamah pawh chhawm chhoh zel a pawimawh a ti a. Khawvel sik leh sa chhe zel siamthatna leh theihtawp chhuahna kawngah pawh hei hian a pui ang a ti.
(Newsonair)
<><><>
FRANCE
France PM jean Castex chuan France ramin COVID-19 hrileng vawi thumna an tuar mek tih a sawi. November ni 20 hnu lamah hri kai hmuhchhuah chawhrual hi ni sarih chhungin 25000 chuang a ni a. French thuneitute chuan nimin khan hri kai 29,975 hmuhchhuah an ni an ti a. France hian tunah hian hri kai pungchak tihniam tur hian theihtawp a chhuah a.Mithiamte chuan inkharkhip chu hrileng tih ziaawmna tur ber anih tu an sawi a. EU ram dangte angin France hi covid vaccine pek kawngah a pe chak lo ber pawl a ni a. Tunah hian India, US leh Britain hnungah an awm a ni.
(Newsonair)
<><><>