🌐🌐🌐🌐
*ALL INDIA RADIO AIZAWL*
*REGIONAL NEWS UNIT*
REGIONAL NEWS BULLETIN
HEADLINES (MORNING) - 15.3.2021
1. Vawiina Assembly inkhawmah minister 2 department chan enkawlna tur sum ruahman sawi hova pawmpui tum a ni ang.
2. Nimin Pathianni khan Covid-19 hri kai 1 hmuhchhuah a ni a, enkawl mek 11 an awm.
3. Hun rei lotea Assembly inthlan hmachhawn tur state-ahte campaign ngawrh chhoh mek a ni.
4. Nimin Pathianni khan Myamar Yangon-a mipui lungawi lohna lantirtu mi 5 thah an ni.
<><><>
ASSEMBLY
Vawiin hian Assembly inkhawmah minister pahnih department chan enkawlna tur sum ruahman sawi hova pawmpui tum a ni dawn a, zawhna leh chhanna hun hman a ni bawk ang.
Inrinni leh Pathianni chawlh a nih hnu-ah vawiin chawhma dar 10 leh a chanve hian assembly inkhawm chhunzawm leh a ni ang a. House chhungah zawhna leh chhanna hun hman a ni ang a. Chumi zawhah minister pahnih - Dr K. Beichhua leh Pu R. Lalzirliana te department chan enkawlna tur sum ruahman sawiho chhunzawm a ni ang a. Pawmpui nghal tum a ni ang.
February ni 23 atanga tan, assembly session kal mek hi Nilaini thleng awh tura ruahman a ni.
(Desk)
<><><>
REFUGEES
Myanmar-a sipai-in sorkarna an chhuh luih hnu-ah Mizoramah raltlan 370 chuang an lo lut tawh.
Home Minister Pu Lalchamliana chuan home department chhinchhiah danin Myanmar mi hi 370 chuang humhimna zawngin an lo lut tawh a ti a. A theih ang angin Mizoram mipuite’n khaw hrang hrangah an lo mikhual a. Ministry of Home Affairs-in Myanmar raltlan lo lutte an rama thawn let turin thu a rawn pe ni a sawi chu chutiang lehkha a la hmuh loh thu Home Minister chuan a sawi a ni. Hetihlai hian Champhai leh ramri khaw ţhenkhata khaw hruaitute chuan raltlan hi hei ai hian an tam tawh an rin thu an sawi a, mi 500 chu an tlin tawh an rin thu an sawi a ni.
Thudawn danin Myanmar aţanga raltlan lo lut tam ber hi Police leh Fire Service hnathawkte an ni a, sorkar hna dang thawk mi hrang hrang, sipai sorkar thawhpui lo tura inpe pawl ‘Civil Disobedience Movement (CDM)’ zawmtute an ni ber a.
(Desk)
<><><>
COVID UPDATE
Nimin Pathianni khan Covid-19 hri kai 1 hmuhchhuah a ni a. Rapid Antigen Test hmanga hmuhchhuah a ni.
Hri kai hmuhchhuah hi New Colony, Siaha ami, hmeichhe kum 35-a upa, nau nei tura Aizawl kal a ngaih vanga endik a ni a, natna lang chhuak lo a ni a, hri a kaina chhui mek a ni.
Heti hian Mizoramah Covid-19 hri kai mek 11 an awm a, enkawl dam hi 4416 an ni tawh a. Mizoram puma kai tawh zawng zawng chu 4437 an ni a. Mi 10-in an thihpui tawh a ni.
Mizorama Covid-19 hri kai tawh zinga 3236 chu mipa an ni a, a dang 1201 chu hmeichhia an ni. Tunah hri kai enkawl mekte hi Aizawl district-ah 8, Siaha, Champhai leh Saitual district-ah 1 theuh an ni a. District dang 7-ah chuan hri kai enkawl lai an awm tawh lo a ni.
(dipr)
<><><>
VACCINATION
Inrinni thleng khan Covid-19 hri danna dose khatna mi 44,726 hnenah pek a ni tawh a, dose hnihna mi 10,074 hnenah pek a ni tawh bawk.
Covid-19 hri danna pek kawnga sorkar thupuangtu Dr Lalzawmi hnen atanga thudawn danin hripui dona kawnga a hmatawnga thawktu zingah hriselna lama thawktu mi 12,048 hnenah hri danna dose hmasa zawk pek a ni tawh a, hripui dona hmatawnga thawktu dang mi 19,576 hnenah dose hmasa zawk pek a ni tawh bawk a. Kum 45 leh kum 60 inkar a upa natna benvawn nei mi 1,140 hnenah hri danna dose hmasa pek a ni tawh a, kum 60 chin chunglam mi 11,962 hnenah hri danna dose hmasa pek a ni tawh bawk a ni.
Hri danna dose hnihna hi mipui hriselna lama thawktu mi 10,008 hnenah pek a ni tawh a, hri dona hmatawnga thawktu mi 76 hnenah pek a ni tawh bawk a. Natna benvawn nei kum 45 leh 60 inkar leh kum 60 chunglamte chu dose hnihna pek an la awm lo a ni.
(Desk)
<><><>
BAPTIST ASSEMBLY
Baptist Church of Mizoram (BCM) rorelna sang ber Assembly chuan sorkar laipuiin a kalpui mek Act East Policy kaihhnawih zir chianna neih leh All India Service a lut an pun theihna atan hmalak ni se tih rawtnate a pawm.
BCM Assembly vawi 125-na Rorel Chanmari Pastor bial in a thlen, Ramthar BCM biakin a nghah chu zan lam program siam lovin nimin chawhnu inkhawm khan a tiak ta a. An thurel zingah hian Act East Policy kaihhnawih zir chianna BCM hian neih ni se tih te, Council of Churches in Mizoram din tura hmalak rawtna te ‘All India Service leh Central Service a lut kan lo pun theihna atan BCM-in hmalak ni se tih te, ‘Ram pum huap awmni kham Tawngtai rual' rawtna te pawm a ni bawk.
(Thanghmingliana, PTC, Lunglei)
<><><>
AMC
Aizawl Municipal Council sawrkar thara Mayor, Deputy Mayor leh Executive Councillor te hna chanpual tur siam fel a ni.
Aizawl Municipal Council inthlan neih zawh takah MNF chuan sawrkarna siamin seat 19 awmah seat 11 an la a. Sorkarna an siam fel hnuah hian Mayor Pu Lalrinenga chuan General Administration leh Public Works Department enkawlin Dy Mayor Pu R.Thanglura chuan Parking, Water & its related matters leh vending te a enkawl dawn a. Executive Councillor Pu Lalringliana chuan Cash & Accounts, Lighting & Electricity (Street Light), Collection of Fees, Rents, Servicing charges & Maintenance of Assets a enkawl dawn a, Executive Councillor Pu Laltlanzova Khiangte chuan Solid Waste Management (Collection of Garbage & Its disposal), Urban & Town Planning a enkawl dawn a thung a. Pi B.Lalawmpuii Executive Councillor chuan Property tax (Collection), Hoarding & Advertising, Granting of Licences, Registration of Births & Deaths a enkawla ang a, Pu H.Zonunsanga Executive Councillor - Building Regulations, Slaughter House, Sanitation & Public Convenience te a enkawl dawn a ni.
(CORR)
<><><>
NIGHT CURFEW
January ni 11, 2021 atanga thla hnih chhung Aizawl khawpui huamchhung (city area) zan pawnchhuah khapna chu a hun a tawp tak avangin, Aizawl district bawrhsap Dr. Lalhriatzuali Ralte chuan thu leh awm hma chu zan pawnchhuah khap chhunzawm a nih thu thupek a tichhuak a. Aizawl khawpui huamchhungah March ni 12 atanga thu leh awm hma chu zan tin dar 10:00 atanga a tuk zing dar 4:00 thleng pawn chhuah khap tlat a ni.
Zan pawn chhuah khap hian a hma lama a huam loh tura puan tawh sate kha a huam dawn lova. A huam loh tur zingah hian Chanchinbumi leh electronic media a thawktu zawng zawng DDK leh AIR tiamin an tel a ni.
(DIPR)
<><><>
STAR CAMPAIGNERS OF POLITICAL PARTIES HOLD ELECTION RALLIES FOR 1ST PHASE OF ASSEMBLY POLLS IN WEST BENGAL, ASSAM
Hun rei lotea Assembly inthlan hmachhawn tur - West Bengal, Assam, Tamil Nadu, Kerala leh Union Territory of Puducherry-ahte chuan political party-te an phusa hle tawh a.
Heng state 4 leh UT 1-ahte hian campaign chuan a vawrtawp a thleng chho mek a ni.
Assam-ah chuan BJP hruaitu hlun, Union Minister Rajnath Singh-a leh Amit Shah-ate chuan nimin khan hmun engemaw zatah vantlang inkhawmah thu an sawi a. Defence Minister Rajnath Singh-a chuan Narendra Modi-a sawrkar hmasawnna hnathawh chuan mipui vantlang dinhmun a chawikang hle tawh a ni a ti a. Union Home Minister Amit Shah-a pawhin BJP an thlan tlin leh chuan Assam-a tuilian thin chu chinfel a ni ang a ti a. BJP chuan kawng tinrengin Assam leh a mipuite hmasawnna turin hna a thawk reng a ni a ti.
Congress party chuan BJP sawrkar chu thalaite tana hna siamsak kawngah a hlawhchham a ni an ti a. Assam-a party dang - AIUDF, Asom Gana Parishad, BPF, Assam Jatiya Parishad, Raijor Dal leh Left party-te pawhin vantlang inkhawm huaihawtin an party tan an campaign bawk a ni.
Assam inthlan thawh 1-na atan Assambly bial 47 huam chhungah tun thla ni 27 khian vote thlak a ni dawn a. April ni 1 khian Assembly bial 39 huam chhungah inthlan thawh 2-na vote thlak a ni ang.
(newsonair)
<><><>
MANIPUR REPORTS TWO NEW COVID-19 POSITIVE CASES
Darkar 24 kal ta chhung khan Manipur-ah Covid-19 hri kai 2 hmuhchhuah a ni a, hri kai 3 enkawl dam an ni bawk.
Tun thlenga Manipur-a Covid-19 hri kai tawh zat chu sing 2 sang 9 leh 313 an ni tawh a, hri kai enkawl dam chu sing 2 sang 8 leh 914 an ni tawh.
Manipur-ah hian hri kai enkawl lai 26 an la awm a. Darkar 24 kalta chhung khan hri kai thihpui an awm lova. Covid-19 vanga thi 373 an awm tawh a. Enkawl dam hi za-a 98.63 an ni mek a ni.
(newsonair)
<><><>
INDIA SUPPLIES OVER 5.86 CR DOSES OF MADE IN INDIA COVID VACCINES TO NEARLY 71 COUNTRIES
Tun thleng hian India chuan ama siam Covid-19 hri danna chu ram hrang hrang 71-ah dose Vbch 5 leh nuai 86 a thawnchhuak tawh.
India thawnchhuah dose nuai 81 chuang chu ram hrang hranga 37-ah a thlawn vekin tanpuina atan pek an ni a, ram dang hmun 31 velah chuan dose Vbch 1 leh nuai 65 chu COVAX facility route hnuaiah thawnchhuah a ni bawk.
(newsonair)
<><><>
AT LEAST 5 KILLED, TWO CHINESE FACTORIES SET ON FIRE IN MYANMAR
Nimin Pathianni khan Myamar Yangon-a lungawi lohna lantirtu mipuite Security force-in an kahnaah mi 5 an thi leh tawh.
Mipui din sawrkar hnehchhuhtu Myanmar sipai sawrkar laka lungawi lohna lantir chuan chawlhkar 6 a awh tawh a. Reuters sawi danin nimina kah hlumte chu Yangon kianga Bago-ah te, hmar chhak lam Hpakant-ah te leh central Myanmar-a Monywa khawpui-ahte a ni. Inrinni pawh khan Myanmar police-ten mi 12 an lo kaphlum tawh bawk a ni.
Thla hlui February ni 1-a Myanmar sipaiten Aung San Suu Kyi-i kaihhruai mipui sawrkar an paihthlak atang khan Sipai sawrkar chuan mi 80 chuang an that tawh a ni.
Chinese media CGTN sawi danin, nimin vek khan China atanga puihna dawng thawmhnaw siamchhuahna factory 2, Yangon Industrial zone ami chu hal a ni a. Factory-te hi lirthei ke 2 neia chuang mi 20-in an hal nia sawi a ni.
(newsonair)
<><><>