...

Ўзбекистонда пахта етиштиришдан бошлаб тайёр маҳсулот ишлаб чиқаришгача бўлган жараёнларни мамлакатнинг ўзида ташкил қилиш имкони бор. Бу эса халқаро ҳамжамиятни ўзига жалб қила олади ва иш ўринларини яратишга ёрдам беради.

Cotton Campaign халқаро коалицияси ўзбек пахтасини бойкот қилиш тўхтатилганини маълум қилди. Шу муносабат билан ўтказилган тадбирда “Cotton Сampaign” коалицияси директори Партиция Журевич ва Ўзбекистон расмийлари бойкотнинг бекор қилиниши Ўзбекистон учун қай даражада аҳамиятли экани ҳақида маълумот берди.

Cotton Сampaign” коалицияси директорининг қайд этишича, Ўзбекистонда пахта етиштиришдан тортиб тайёр маҳсулот ишлаб чиқаришгача бўлган жараённи мамлакатнинг ўзида амалга ошириш имконияти халқаро ҳамжамиятни ўзига жалб қила олади.

“Мен Ўзбекистонни бетакрор мамлакат деб биламан. Кластерлар кўринишидаги вертикал интеграция орқали пахта билан боғлиқ барча жараёнлар шу ернинг ўзида амалга оширилиши имкони бор. Бунда пахта етиштирувчилардан тортиб то охирги маҳсулот тайёр бўлгунгача жараёнларда тўла шаффофлик ва кузатувчанликка эришиш мумкин. Бу жуда ноёб ҳодиса ва халқаро ҳамжамиятни ўзига жалб қила олади. Кластерлар иттифоқи эса, бу албатта яхши, у орқали кўплаб иш ўринларини яратиш, қолаверса, пахта саноатида ишловчиларнинг ҳаётини яхшилай олиш мумкин”, деди Партиция Журевич.

Сенат Раиси Танзила Норбоеванинг таъкидлашича, ишлаб чиқаришни тўлалигича мамлакатнинг ўзида ташкил қилиш экспорт қийматини оширади, қолаверса, иш ўринлари яратилишига имкон беради.

“Олдинроқ биз бутун пахтамизни хомашё сифатида 1 млрд долларга экспорт қилардик. Ўзбекистонда умуман ишлаб чиқариш йўқ эди, ҳаммаси хомашё сифатида сотиларди ва ўз пахтамиздан ишлаб чиқарилган маҳсулотлар ўзимизга етиб келарди. Лекин ҳозир президентимизнинг сиёсати: пахтани экспорт қилмасдан ишлаб чиқаришни ўзимизда ташкил қилишдан иборат. 2-3 йилдан бери пахта хомашё сифатида экспорт қилинмаяпти ва ўзимизда ишлаб чиқариш йўлга қўйиляпти. Бунинг учун 120 тадан ортиқ кластерларимиз бор. Агар олдин пахта хомашёси 1 млрд долларга экспорт қилинган бўлса, ҳозир ишлаб чиқариш ҳисобига 3 млрд долларлик қийматга эришдик.

Кейинги 4-5 йил ичида 50 млрд долларлик маҳсулот экспорт қилишни режа қилганмиз. Бу қўшимча иш ўринлари деганидир”, деди Сенат раиси.

“Ўзбекистон пахта-тўқимачилик кластерлари” уюшмаси раҳбари Муртазо Раҳматовнинг қўшимча қилишича, 1 кг пахта ишлаб чиқариш босқичларидан сўнг 50 долларлик қийматга эга бўлиши мумкин.

kun.uz

FERMER канали