...

...


_شوفت يا ذياد.. فارس طلع معندوش بابا زي ما عندنا، ومامته الداده ايمان اللي بتنظف الحوش. 


=داده ايمان دي تبقى مامته!!.. يع شغل وحش اوي، هي ليه مش بتشتغل شغل حلو زي ماما؟! 


_مش عارف، بص ماما اصلا كانت بتقولي متكلموش مش عارف ليه بس هسمع كلمها ومش هكلمه ولا هلعب معاه. 


=صح وانا كمان مش هلعب معاه. 


: يلا يا زياد نلعب انا وانت و مؤمن. 


=لاء مش هلعب معاك ومؤمن كمان مش هيلعب. 


: ليه يا ذياد؟! 


_كده علشان باباك مش موجود وكمان مامتك الداده ايمان اللي بتكنس فصلنا والحوش ومش بتشتغل زي ماما شغل حلو. 


سابوني واقف ومشيوا مع بعض، قعدت في الحوش و دموعي على خدي حسيت بحد بيقعد جمبي


_مش في فصلك ليه يا فارس؟! 


بصيت ليها=ماما هو بابا فين؟! 


طبطبت على شعري_بابا في مكان حلو اوي.. عند ربنا فوق. 


=طب هو ليه مش معانا هنا ما زياد ومؤمن باباهم هنا ومعاهم ليه بابا مش معايا زيهم وسايبنا لوحدنا ومشى؟! 


_بابا لو كان بإيده انه يفضل معانا و جمبك كان هيبقى معاك بس ربنا كان له امانه وخدها، ينفع نقول ل ربنا لاء. 


حرك راسه بالرفض=يعني بابا مش هشوفه خالص، لو مره واحده حتى؟! 


_اكيد هتشوفه. 


بصلى وهو فرحان=بجد فين؟! 


ابتسمت_في الجنه. 


=طب والجنه دي بعيده؟! 


_فوق عند ربنا، لما نروح عند ربنا وندخلها ان شاء الله هتشوف بابا وهتشوف حاجات كتير حلوه. 


حرك راسه وضم رجله بإيده


_في حاجه تاني مزعلاك؟! 


=.... 


_في اي يا فارس؟! 


=هو انتي ممكن تسيبي الشغل ده وتشوفي شغل تاني؟! 


_اسيب هنا!!.. ليه؟! 


زعق وبدأ يعيط=مؤمن وذياد عرفوا ان الداده إيمان اللي بتكنس الفصل والحوش هي مامتي وخاصموني ومش هيلعبوا معايا بعد كده بسببك. 


بصيت له واتكلمت بهدوء_عارف.. ربنا قال في القرآن "وَبِالْوَالِدَيْنِ إِحْسَانًا ۚ إِمَّا يَبْلُغَنَّ عِندَكَ الْكِبَرَ أَحَدُهُمَا أَوْ كِلَاهُمَا فَلَا تَقُل لَّهُمَا أُفٍّ وَلَا تَنْهَرْهُمَا وَقُل لَّهُمَا قَوْلًا كَرِيمًا " ربنا بيعاقب اللي بيزعل مامته وباباه وهيعاقبك زي ما زعقتلي وزعلتني كده، ده غير ان غلط نعلى صوتنا على حد اكبر منا حتى لو كان غلطان، وبالنسبه ل شغلى ده بسببه مكنش هيكون معانا فلوس، مكنتش هتعرف تيجي هنا المدرسه، وكنت مش هعرف اجبلك اكل، ومش هتعرف تلبس هدوم كويسه، ومكناش هنلاقي مكان ننام فيه غير الشارع.. بالذات بعد ما باباك راح و كل حاجه راحت معاه، لو انا كنت ام وحشه كنت نزلتك تشتغل في سنك الصغير ده ومكنتش هتعب نفسي، لكن انا وعدت نفسي قدام ربنا اني مخلكش تحس بالنقصان من ناحيه اي حد، وعلشان لما تكبر تكون شخص متعلم وتعرف اني علشانك كنت بشتغل كده وتفتخر ب ده. 


قمت وسيبته مكانه.. كان لازم اقول له الكلمتين دول بالذات في سنه ده، مكنتش عايزاه يحس انه قليل وسط صحابه، مكنتش عاوزاه يزعل لما اصارحه واعرفه ان شغلى مش عيب ولا وحش، كنت عاوزاه يعرف ان طالما شغلتي حلال وبناكل وبنشرب من خير ربنا اننا كده في نعمه واننا نايمين وقافلين علينا باب احسن ما نكون نايمين في الشارع ملناش مأوى.. كنت عاوزاه يعرف ان عيشتنا دي احسن مليون مره من عيشه الشارع حتى لو الدخل قليل المهم اننا راضيين. 


خلصت شغلى وجه وقت المرواح جه وقف قدامي مسكته من ايده وطول ما انا ماشيه مكنتش بكلمه ك عقاب له. 


اتنهد وطبطب على ايدي_ماما.. 


=.... 


_ماما انتي لسه زعلانه مني؟! 


=.... 


وقف قدامي حاطط راسه في الارض وبيعيط


_انا اسف.. عاقبيني اي عقاب بس بلاش تخاصميني، انا ممكن اعمل اي حاجه علشان اراضيكي بس ردي عليا. 


=عرفت غلطك؟! 


هز راسه ب ايوه و بصلي ودموعه مغرقه وشه_مش هزعلك تاني خالص وعمري ما هزعق ليكي تاني في حياتي بس بلاش العقاب ده. 


=طب وعقاب ربنا ليك؟! 


بصلي وهو بيعيط_هو ربنا هيعاقبني عقاب صعب اوي؟! 


اخدته وقعدنا على الرصيف=ربنا عقابه صعب على اللي بيعمل حاجات ربنا حظرنا منها وعلشان انا كنت زعلانه منك ف ربنا زعل منك بس انت دلوقتي صلحتني وانا سامحتك وربنا شافك ف هيسامحك وبابا كمان شافك وزمانه مبسوط منك.. بس انا عاوزه اقولك انك متحكمش على حد من مظهره انت متعرفش هو ماله ولا ظروفه ايه، وكمان عايزاك تعرف انك لو شوفت حد بيشتغل على قده متستقلش منه او تعايره ده بيبقى جميل اوي عند ربنا، لسه بقا زعلان على شغلى في المدرسه؟! 


ابتسم وقام قَبل راسي ووقف قدامي_انا مكنتش اعرف كل ده يا ماما بس اوعدك ان عمري ما هزعل ولا هضايق من اي حاجه انتي هتعمليها كفايه ان عندي ام ذيك كده يا ماما. 


حضنته=طب يلا يا بطل نروح علشان نشوف الواجبات اللي ورانا، علشان لما تكبر تكون طالب متعلم شاطر وافتخر بيك. 


ماسك مايك وطلاب كتير حاضره قدامي_من طفل كان عنده 5 سنين ل شاب ناضج عنده 26 سنه قدرت طول السنين دي ان افهم يعني ايه حياه مليانه رضا، عيشه قليله بس بال مرتاح، بيت صغير بس النعمه اللي فيه كبيره، توفيق ربنا، دعا أمي وتعبها وشغلها علشان محسش اني قليل وسط زمايلي، بتوفيق ربنا كنت كل سنه في سنيني الدراسيه كنت بطلع الاول على الدفعه شهادة المدرسين بتوعي و الدكاتره ليا اني من احسن واشطر طلاب الدفعه شهاده اعتز بيها، و ده خلاني ابقى معيد في كليه الصيدله، ده كله مكنش المهم، انا المهم كان عندي اللمعه اللي بشوفها في عين والدتي ليا كل ما انجح واشوفها فخوره بيا زي ما كانت بتتمنى واحسن.

كان ممكن وفاة والدي يبقى عائق ليا بس ده هيكون في حالة ان لو مكنش عندى ام عندها صمود زي صمود أمي. 


Report Page