"සුළඟට මිමිනූ රහසක් 🌺🐝"
………………………………………………………………………………………………………………✍️ KG & Yasasi ✍️……………………………………………………………………………………………………………………………………………………………………………………………………………………………………………………………………………………………………………………
🧑:-
සුවඳ හමනා බිඟුන් බමනා...
සොඳුරු මල් නිති නෙත ගැටෙන්නේ...
හදේ කොතැනක නොසිටිනා මුත්...
ඇයි ද නුඹටම හිත ඇදෙන්නේ...
👩:-
සුවඳ හමනා බිඟුන් බමනා...
මල් ලඟම නොවැ හිත රැදෙන්නේ...
හදේ රැඳෙනට වරම් නැති මුත්...
දැනුණු තැනමයි හිත රැඳෙන්නේ...
🧑:-
නුපුරුදුයි මේ හැඟුම් මා හට...
බොළඳ සිතිවිලි නොවැ නැඟෙන්නේ...
මහද මඬලේ උපන් සෙනෙහස...
නුඹට මදි වෙයිදෝ සිතෙන්නේ...
👩:-
නුපුරුදුම වූ හැඟුම් හිතකට...
බොළඳ යැයි කෙලෙස ද කියන්නේ...
නුඹේ හද තුළ උපන් සෙනෙහස...
මහමෙරක් ලෙස මට දැනෙන්නේ...
🧑:-
නුඹේ සියුමැලි සිනිඳු පෙති දැක...
බඹර කැළ නුඹ වෙත ඇදෙයිදෝ...
රොනට වඩිනා බිඟුන් අතරේ...
මමත් එක් බඹරෙක්ම වේදෝ...
👩:-
බොහෝ මල්වල සිනිඳු පෙති දැක...
රොනට බිඟු ඇදෙනවා නොවෙදෝ...
රොන් අරන් යන බඹරු අතරේ...
මල රකින කෙනෙකුත් නොවේදෝ...
🧑:-
තණ අගක රැඳි පිනි බිඳක් බඳු...
දිවි මඟක් අපටත් හිමීදෝ...
සදාකාලික නොවූ ලෝකේ...
සදා කෙලෙසක පෙම් කරම්දෝ...
👩:-
තණ අගක රැඳි පිනි බිඳක් බඳු...
දිවි මඟේ ලග රැදෙනවාදෝ...
නොමැකෙනා පෙම් කවක් ලෝකේ...
ලියා එකටම නික්ම යමුදෝ...