THIL THLENG MAK TAK TAK 10

PHOTO HI DAHKIM VEK SEN ANI LO. NUMBER 1 NA CHIAH HI DAH ANI ANG. 

1. Overtone Bridge : He lei hi Scotland rama awm a ni a, lal kulhin a zawm a. Helai hmunah hian mihring mai ni lovin ui te pawhin nunna an chân a, ui 50 chuang zet te chu hmun inang vek ațangin an zuang thla a, an thih phah vek a, heng ui te hi vulh lai ui an ni a, a țhen te chu a neitu ten an kaih laia zuang thla te an ni.

He thil thleng hi vawi khata thleng rual ni lovin a khât tawka thleng zeuh zeuh reng țhin a ni a, ran lama Psychologist te pawn he thil thlen chhan hi an hre bik lo a ni.

A chhan ni bera tun thlenga an sawi chu he kulh (castle) a chêng țhin nula pakhat chuan tûn thlengin he lai hmun hi la vil in mi te chu a that țhin ah an ngai a ni! 

Kum 1994 khan, Kevin Moya chuan helai hmunah hian a fapa ngei mai chu a paihthla a, ui an zuan thlâkna hmun lai tak kha a ni a, Police ten Moya an man hnu a a thil sawi chu, chu lai hmuna kal lai chuan hmeichhe aw hi a hria a, chu hmeichhia chuan a fapa chu antichrist (sakawlh) a nih thu hi a hrilh a, chumi a sawi zawh chuan a paih thla ta niin a sawi! 

A bul vela cheng te chuan chu lai hmun chu a țih em em a, hnaih ngam an awm lo a ni.

2. Mr. Hand : Kum 1920 khan Dartmoor, Devon, England rama kawngpui pakhat ah chuan motora chêtsualna mak tak tak mai a thleng fo mai a, nunna chân tam tak pawh an awm tawh a, dam chhuak te pawh an awm ve tho bawk. 

He lai hmuna chetsualna thlen dan hi a damchhuak te sawi dan ațang chuan thil mak tak mai thleng țhin a awm a, kawng tluang tlam țha pangngaia chêtsualna thleng fo chu police te pawn mak an ti êm êm a ni.

Țum khat chu he kawngah hian pa pakhat hi amah chauhva a kal laiin a chetsual ve a, vanneihthlak takin a dam chhuak hlauh mai, damdawi ina thu awmzia an han zawhfiah chuan hlâu leh khûr chhungin ti hian a sawi a.

“Chutia motor ka khalh lai chuan, chu lai kawngpui ka thlen chuan kut pahnih hian a steering hi min lo dawmpui a, ka motor khalh chu min tibuai a, ka chêtsual phah ta a ni,” tiin. 

Police te leh midangte chuan an awih lova, mahse a hnua chêtsualna thlenga damchhuak țhinte an han zawh chuan, chutiang bawk chuan an sawi zêl mai si a! Awih loh rual a ni tawh lo! Thil mak thleng chu a awm ngei a ni tih an hria a, a chhan erawh tuman an sawi thei lo a ni.

3. Urul Mountain : Kum 1959 khan he tlâng ah hian thil thleng mak tak mai a awm a. He tlâng hi vur in a khuh a, țum khat chu he tlâng ah hian hian tlâng lâwn mi țhian za ho hi an lâwn a, an kalkawngah chuan Dyatlov tih hmun hi paltlang a ngai a. 

Mahse chu hmun an thlen chuan kal tlang theih lohvin thli nasa takin a tleh ta țhin a, kal tlang ta lo chuan kawng dang an zawh ta a. Chutia an kal chuan Dead Mountain tih hi an thleng a, chu hmunah chuan hahchawlin riah nan te an hmang a.

An riah hnu chuan an chanchin hriat zui tûr rêng rêng a awm tawh lo! An chunga thil thleng chu tuman an hre lova, a zawngtu pâwl ten zawn hna an thawh chuan an riahna puan in chu an hmu a, an hnu an chhui zêl hnu chuan an zinga panga te chu ramhnuaiah an hmu ta a. 

Ramhnuaiah chuan kekawrte chauh ha in an lo let phung mai a! Heng mithi te hi a tlangpui in ruh tliak leh hliam nei te an ni hlawm. 

Midang pathum an hmuh leh te phei chu blunt trauma an tih mai, tharum thawhna avanga ruh tliak leh taksa pêng danga hliam tuar an ni hlawm a. Heng mithi te hi vûina hun an hman lai chuan an vun rawng a rawn inthlâk a! Zir mi ten an han zir chuan an taksa ah radiation sâng tak mai hi a lo awm hlawm a, chu bakah Dyatlov an tih hmunah pawh chuan chutiang radiation chu hmuchhuah ve bawk a ni.

Mi țhenkhat te sawi dan chuan helai hmunah hian Soviet hovin a rukin Radioactve ralthuam te test nan hman țhin vang a ni an ti a, an hmang țhin ngei bawk a. Heng thu an hriat theihna chhan pawh kum 1990 a Soviet Union an tlûk chhiat khan, lehkha pawimawh tam tak an hmuchhuak a ni. 

A awmzia chu chumi hma zawng chuan an zêp char char a, an thil tih tak hriat theih turin lehkha pawimawh tam tak hmuh theih   

tawh lohvin a awm bawk si a, an râlthuam te chu engah nge an hman țhin tih erawh, hriat theih ani ta lo a ni.

4. Michigan Triangle : Michigan Triangle kan tih ah pawh hian thlawhna te an bo tawp mai zel a, mahse Bermuda Triangle te ang lovin he lai hmunah hi chuan a chhunga chuang te chu thlawhna thlawh lai in an bo tawp zêl mai thin a ni! 

Kum 1930 chho vêl khan Captain Flying-a chu Pennsylvannia ațanga Wisconsin an thlawh laiin hahchawl turin a room – ah lut a, he mi lai hi Michigan dîl zawna an thlawh lai ani a. A hnu darkar velah chuan a co-pilot chuan kaihthawh a han tum chu, hmuh tur a lo awm ta rêng rêng lo mai! Thlawhna chhûng an han zawn pawh chuan an hmu zo ta chuang lova, a bo hlen ta a ni! 

Hetiang ang case, thlawhna bo si lova a chhunga chuang te bo thu hi vawi tam tak a lo thleng tawh țhin a ni.

Țum khat chu Michigan dil zawnah hian Sky diving team te chu zir chiang turin an zuang thla a, a chung sâng ațang chuan lung mak tak mai leh lung tam tak inrem khâwm in a bial a siam chu an hmuh thu an sawi. 

He lai hmunah hian lawng tam tak a lo pil tawh a, thâwk leh khatah chhûm nasa tak ten a zîng chuai chuai a, thlawhna leh lawngte chu an bo ta mai țhin a. Hetiang thil thlen chhan hi tumahin a chhan an sawi thei lo a ni.

He hmuna thil thleng dang i hriat duh chuan HETAH HIAN CHHIAR BELH RAWH! 

5. Point Pleasant : Point Pleasant hmun hi West Virginia – a awm a ni a, kum 1966 leh 1967 – a Mothman an tih maiin a a beih vak khua kha a ni. 

Mothman an tih chu lian tak mai, thla lian deuh nei, mit sen rûm mai hi a ni a. He khuaa thil thleng hi a dik ngei a ni tih a khaw chhunga chêng te chuan an sawi a ni.

He hmun hi sawrkar mi rawih ni âwm tak, coat suit dum ha te chuan an vil in an zirchian țhin thu an sawi a, tam takin an thil hmuh leh an sawi chu heng sawrkar mi te hi Mothman an tih te chu an ni an ti a, mihring pangai anga awmin an insiam danglam leh thei ani an ti! 

An rin chhan ber chu heng sawrkar mi te hi an han biak thut hian an chezia a dangin a țawng thlengin a buai țhin a ni an ti a. Kum 1967, December thla tâwp lama helai hmuna lei pakhat chim țuma mi 46 in nunna an chân khan, he thil thleng hi heng sawrkar mi te nen hian a in kungkaih vek a ni an ti bawk a ni.

6. Bigelow Ranch : Ranch kan tih hian huan zau tak, ran rual te an vulhna hmun a ni. Tuna kan sawi tur hi chu Alien hnathawh tel lo chuan a kim lovang a tih theih a. 

He thil thlenna hi huan pakhat Bigelow Ranch, tûn hnua Skinwalk Ranch an tih tâk hi ni a.

Kum 50 kal ta chhung khan mi tam tak te chuan UFO an hmuh thu te, êng mak tak tak te, thâwm mak tak tak te leh ran sa dangdâi tak tak te an hmuh țhin thu an sawi nasa hlawm khawp mai a.

Journalist pakhat George Knapp chuan sihal mak tak pakhatin bâwng rual a beih țhin thu a ziak a. A beih țhin lai chuan êng zungzâm mak tak mai hi chu lai hmunah chuan a lo êng tel țhin a.

Huan neitu in a han kah fuh châng pawh hian sihal chuan silai mu te chu eng atan mah a ti lova, sihal chu a hmu chiang em em a, mit sen tak mai nei a ni a ti! 

Vawi tam tak hetiang hi a thlen țhin avangin National Institute for Discovery Science te chuan helai hmun hi thlithlai in an zirchiang ta a, an thil hmuh tamtak te chu an la khâwm a, mahse he Institute hian tûn thlengin he lai thil thlen chhan hi an la zêp tlat reng a ni.

A enga pawh chu nise, he ramsa hi warewolf kan tih ang chi pawh a ni thei a, a chhânna diktak erawh puanzâr a la ni lo a ni. 

7. The Devil Sea : The Devil Sea hi Bermuda Triangle leh Michigan Triangle te nen in ang khat ang deuh a sawi theih a ni a. He thil thlenna hmun hi Japan ram bul tuipui ah a ni a, he lai hmunah hian lawng tam tak te an lo pil tawh țhin a, chuvang chuan Japan sawrkar pawhin Danger Zone tiin a puang hial a ni. 

Kum tam tak kalta khan Japan ram leh a bula tuipui hian thawnthu a lo nei tawh a, Mongols hnam hovin Japan ram rûn an tum țumin, khawmual an thlen hma chuan an sipai lawng tam tak te chu chhan hriat lohvin a pil nual mai a. 

He thil mak tak thleng hi tûn thlengin a chhan hriat a la ni lo… Japan sawrkar pawhin helai hmuna sangha mantute leh an lawng te bo fo mai chu chhan hriat tumin sipai lawng a tîr a.

Mahse chung sipai lawng te pawh chu tûn thleng hian an lo la lêt reng reng lo! A chhan nia an sawi pakhat chu he lai hmunah hian tui hnuaiah tlângkâng a thleng țhin a, chu tlangkâng chuan gas a siam a, chu gas te chuan tui mawng a han thlen chuan a puak ta țhin a. Chu vang chuan lawng te chu an pil phah ta țhin a ni an ti a ni.

A dik tak hriat tur erawh a awm lova, a chhan zawng tura kal te lah hmuh tur an awm tawh bawk si lo..!

8. Lake Energy Kuni : Mihring pakhat bo chanchin hi chu kan hre fo ang a, tuna kan sawi tur erawh hi chu khaw pakhat, zan khat thil thu a bo thut chanchin a ni! 

Hmun pakhat Lake Energy Kuni an tih, Northern Canada khuaa thil thleng chanchin a ni a, he khuaah hian pa pakhat ran hmul hralha eizawng, hmun hrang hranga vâk kual țhin Joe LaBelle hi awm a.

LaBelle hian a zin kualna lama a chaw chhum dan hriat thar te avang chuan a lâr phah êm êm a. Zan khat chu a chaw chhumnaa bâwlhlo pawlh tur zawnga a kalna lamah chuan sihal rualin thlân pakhat an lo hai chhuak hi a hmu a, thlân pawh chu a lo ruak vek tawh a, a thil hmuh chuan a tihlâu êm êm mai a, theih tâwp a rangin a tlân haw a, Northern Mounted Police te hnenah chuan thil thleng chu a hrilh ta a.

Chumi zân vêk chuan Police te chu an va kal a, engmah hmuh an nei lova, chu bakah Police te chuan sihal mai maiin thlân te chu an an laih theih loh tawp tur thu an hrilh bawk a.

A tûk zing an han tho chu, chu khuaah chuan mi tam tak an bo țeuh mai a, Nothern Mounted Police te chuan a chhan an hria a ni an ti a, mahse Police te chuan engmah an sawi duh lo a ni! 

Chu hmunah chuan mi tam takin thil mak pui pui an hmuh țhin thu leh thlân ruak atanga êng a lo chhuah țhin thu an sawi bawk a ni.

9. Khâwl tibuaitu : Bermuda Triangle kan hre țhin a, kan sawi fo țhin bawk a, mahse tuna kan sawi tur hmun erawh hi chu Scientist ten a nitina an thil tawn ațanga lo chhuak a ni. A hmun lai vel hi South Atlantic zawn, Brazil Tuipui kam bawr vêl a ni a, mahse a hmun lai tak hi a inthlâk ve țhin a ni.

Kum 1950 chho vêl ah he lai hmun Scientist ten an zirchian hmasak ber țum khan an khâwl te chu êng zungzâm chak tak mai hian a ti buai vak mai a, eng nge tibuaitu ber tih chu tûn thlenga an la hriat chhuah loh a ni.

Chu bâkah he lai zawna thlawhna te leh satellite te an kal lai hian an khâwl leh inbiakpawhna te chu a buai țhin a, hei thil vang hian International Space Centre lam pawhin invênna an dah belh hial a ni. 

He thil thlen chhan chi radiation chak tak vâng a nih rin a ni a, a thlen chhan ni âwm a an ngaih chu he lai hmunah hian magnetic field a hniam bîk vang niin an ngai a. Chuvangin he lai hmuna an awm lai hi chuan a thawkte chu thil dang tih an phalsak țhin a ni. A chhan a chu eng pawh ni se, helai hmunah hian thil mak tak a thleng ani tih erawh phat rual a ni lo.

10. Rangkachak tlâng : Tuna kan sawi tur hi chu tlâng pakhat, Arizona – a awm a ni a, he tlâng hian mi tam tak a ti phâwklêk in puithu na âtthlak tak tak te pawh a lo chhuah phah a ni.

Kum 1891 ah, German mi Jacob Bolts chuan he tlâng ah hian rangkachak lian tak mai awm thu a sawi a, chu rangkachak chu tupawhin a lâk theih chuan hausakna ren rual lohvin a vûr theih tur thu a sawi a. 

Mahse vânduaithlak takin a hna a țan hman chuan a damlo a, a thi ta zui a.He a thil hriat lo lâr chhuah chhan chu amah enkawl țhintu hotel – a thawk pakhat hnênah chuan a thih dawn hnaihin a lo sawi a.

Tichuan mi tam takin chu rangkachak hláwm chu zawn tumin an thawk chhuak a, thil mak tak mai thleng ta chu, rangkachak zawng tura kal te chu tumah lo lêt an awm tawh ngai lo a ni! 

Red Indian Pasalțha te sawi dân chuan he tlâng chhunga rohlu hi tlâng chhungah hian mi tê ten an vêng a ni an ti a ani.

Explorer tam tak ten he lai hmun an kal tlang chan chuan thâwm mak tak tak, nui vak vak ri te, meidil a mihring rûm ri ni awm tak tak an hriat țhin thu an sawi a ni!