...

Олий Мажлис Қонунчилик палатасининг 3 март кунги мажлисида «Қишлоқ хўжалиги кооперацияси тўғрисида»ги қонун лойиҳаси кўриб чиқилди. Бу ҳақда Kun.uz мухбири хабар бермоқда.

Изоҳланишича, кооперация бу – ҳамкорлик, биргаликда ишлаш; жисмоний шахсларнинг биргаликда тадбиркорлик фаолиятини олиб бориш учун ихтиёрийлик асосида бирлашувидир.

Таклиф этилаётган қонун лойиҳасини Қишлоқ хўжалиги вазирлиги ишлаб чиққан. Ҳужжат қишлоқ хўжалигида бугунги шаклланган муносабатларни тартибга солишни мақсад қилади.

Йиғилишда вазир Жамшид Хўжаев сўзга чиқди.

«Бизда 1991 йилда қабул қилинган «Кооперация тўғрисида» қонун бор эди. У қишлоқ хўжалигида бугунги шаклланган муносабатларни тартибга сололмай қолган.

Янги ишлаб чиқилган қонун лойиҳаси эса кооперацияларни ташкил этиш, фаолиятини йўлга қўйиш, бошқарув, молиявий муносабатлар ва назорат қилиш каби муносабатларни ҳозирги замон талабларидан келиб чиқиб тартибга солади», – деди у.

Муҳокамалар жараёнида қайд этилишича, кооперациялар келгусида кластерларга рақобатчи бўлиши мумкин.

«Агар фермерлар бу қонунни яхши тушуна олса, унга бирика олса, фойдани ҳам ўзи олади. Истаганча маҳсулот етиштириб, ўзи сотади, даромадни ўзи тақсимлайди. Кооперацияда деҳқонга кластердан кўра кўпроқ даромад келади», – деди депутатлардан бири.

Вазирлик вакиллари ва депутатлар ўртасидаги савол-жавоблардан кейин қонун лойиҳаси биринчи ўқишда концептуал жиҳатдан қабул қилинди.

@AGROBLOGER канали

kun.uz