...

“Ўзагролизинг” АЖ томонидан жамиятнинг 2021 йил учун белгиланган устувор йўналиш ва вазифаларига бағишланган матбуот анжумани ташкил этилди.

Қайд этилишича, ўтган йиллар давомида “Ўзагролизинг” АЖ томонидан 4 триллион 622 миллиард сўмлик, биргина ўтган йилнинг ўзида эса умумий қиймати 724 миллиард сўмлик 3 минг 820 дона замонавий қишлоқ хўжалиги техникаси лизинг асосида етказиб берилган.

Жорий йил лизинг олувчиларга 1 триллион 530 миллиард сўмлик 11 минг 232 дона ёки ўтган йилга нисбатан қарийб 3 баробар кўп техника ва механизмлар етказиб берилиши кўзда тутилган.

Жамиятнинг асосий фаолият тури қишлоқ хўжалигини лизинг шартларида замонавий қишлоқ хўжалиги техникалари билан таъминлашдан иборат бўлиб, лизинг хизматларини кўрсатиш кўлами бўйича Ўзбекистон бозорида узоқ йиллардан буён етакчи ўринни эгаллаб келмоқда.

Бугунги кунда “Тошкент қишлоқ хўжалиги техникаси заводи”, “Чирчиқ қишлоқ хўжалиги техникаси заводи”, “Агрегат заводи”, “Технолог”, “Урганчкорммаш” акциядорлик жамиятлари, “Уз Клаас Агро”, “Уз Кейс Маш”, “Лемкен Чирчиқ”, “Агрихим” МЧЖ қўшма корхоналари каби маҳаллий ишлаб чиқарувчилар билан яқиндан ҳамкорлик йўлга қўйилган.

Президент томонидан илгари сурилган ташаббус – ишсиз аъзолари бор оилалар, жумладан, “Темир дафтар”, “Аёллар дафтари” ва “Ёшлар дафтари”га киритилган фуқароларга деҳқончилик билан шуғулланиши учун 10 сотиҳдан 1 гектаргача ер ажратилиши дастури доирасида кичик ер майдонларида фойдаланиш қулай бўлган 5 минг дона мотоблок етказиб берилиши режалаштирилган.

Жорий йилнинг дастлабки икки ойида республика қишлоқ хўжалигига умумий қиймати 56 миллиард сўм бўлган 608 дона қишлоқ хўжалиги техникаси лизинг асосида етказиб берилди.

2021 йилда жамият фаолиятига халқаро молия институтларининг маблағларини кенг жалб қилиш учун дунёдаги йирик тўртлик халқаро аудит компанияларидан бирини ҳамда халқаро экспертларни жалб этган ҳолда молиявий ҳисоботларнинг халқаро стандарти бўйича ижобий хулоса олиш режалаштирилган.

@AGROBLOGER канали

Муҳайё Тошқораева, ЎзА

uza.uz