...

Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлигида ташкил этилган брифингда ушбу саволга атрофлича жавоб берилди.

– Техник каннабис таркибида 0,2 фоизгача миқдорда тетрагидроканнабинол гиёҳвандлик моддаси мавжуд, – деди Қишлоқ хўжалиги вазири маслаҳатчиси, вазирлик матбуот котиби Нигора Хўжаева. – Ховос туманида экилган нав Франциядан келтирилган бўлиб, унинг таркибида гиёҳванд жуда кам миқдорни ташкил этади. Бу эса тирик организмга ҳеч қандай наркотик таъсир кўрсатмайди. Шу боисдан Ўзбекистонда етиштириладиган техник каннабис ўсимлигининг таркибидаги моддалар инсон организмига умуман салбий таъсир кўрсатмайди. Мамлакатимизда таркибида 0,2 фоизгача миқдорда тетрагидроканнабинол гиёҳвандлик моддаси мавжуд техник каннабис ўсимлигини саноат мақсадларида етиштиришга рухсат берилди. Бу кўрсаткич Хитой ва Чехияда 0,3 фоизгача, Италия, Венгрия, Швеция, Бельгияда 0,2 фоизгача, Россия Федерациясида 0,1 фоизгачани ташкил этади.

Қайд этилганидек, бугунги кунда Қишлоқ хўжалиги вазирлиги ва Бирлашган Араб Амирликларининг “Industrial Innovation Group LLC” компанияси ўртасидаги келишувга мувофиқ, 181,9 миллион евро миқдорида тўғридан-тўғри хорижий инвестицияларни жалб этиш ҳисобига Сирдарё вилоятида таркибида целлюлоза мавжуд бўлган техник каннабис, зиғир ва бошқа қишлоқ хўжалиги экинларини етиштириш, хомашёни қайта ишлаш орқали рақобатбардош, экспортбоп маҳсулотлар ишлаб чиқаришни назарда тутувчи лойиҳа амалга оширилмоқда.

Техник каннабис иқтисодий ва экологик жиҳатдан юртимиз иқлимига мос ўсимлик ҳисобланиб, унинг ўзига хос жиҳатлари мавжуд. Жумладан, каннабис энг тез ўсувчи экинлардан бири бўлиб, пахта билан солиштирганда 1 гектардан 4 баробар кўп целлюлоз олинади. Ўсимликка қишлоқ хўжалиги кимёвий препаратлари нисбатан камроқ ишлатилади ҳамда сувни анча кам талаб қилади, атроф-муҳитни ифлосланишлардан тозалаш имконини беради. Айланмадан чиқиб қолган ерларни тиклаш учун тупроқдан кадимий ва бошқа заҳарли моддаларни чиқариб олишда ниҳоятда фойдали бўлиб, 110 кун ичида ўсимлик 2-3 метрга етади ва бу бир мавсумда бир нечта ҳосил олиш имконини беради. 40 дан ортиқ давлатларда техник каннабисдан саноат мақсадларида фойдаланиб келинмоқда.

Техник каннабис етиштириш билан кимлар шуғулланиши мумкин, унинг тартиби қандай? Брифингда ушбу саволга ҳам жавоб берилди. Таъкидланганидек, лицензияланган юридик шахслар техник каннабис етиштириш, уни саноат асосида қайта ишлаш, сотиш ва бошқалар билан боғлиқ фаолият турлари билан шуғулланиши мумкин. Лицензиялар Қишлоқ хўжалиги вазирлиги томонидан берилади.

Ўзбекистонда техник каннабис билан боғлиқ айрим фаолият турлари билан шуғулланиш мақсадида лицензиялар олиш учун тўланадиган божлар миқдори тасдиқланган. Ўсимликни етиштириш учун 3 минг базавий ҳисоблаш миқдори, импорт, экспорт, қайта ишлаш, сақлаш, сотиш, сотиб олиш ва ташиш, буларнинг ҳар бири учун 200 базавий ҳисоблаш миқдорига тўғри келади.

@AGROBLOGER канали

Шаҳноза МАМАТУРОПОВА, ЎзА

uza.uz