...

Президент Шавкат Мирзиёев Наманган вилоятида бўлиб турибди. Агросаноат комплекси билан танишув чоғида давлат раҳбари соҳа мутасаддиларига ҳосилдорлик ва экспортни ошириш бўйича кўрсатмалар берди.

«Мана, ёшларга имконият яратиб беряпмиз, ерлар ажратяпмиз. Бундан мақсад нима? Иш жойи, даромади бўлган, қорни тўқ, усти бут ёшларнинг кўнгли ҳам хотиржам бўлади.

Ёшлар масаласида шунча йил қарсакбозлик қилдик, баландпарвоз гаплар гапирдик. Лекин уларга тўғри йўл кўрсатмадик, иш ўринлари яратмадик.

Биргина лимончиликни олайлик. Қани менга айтинглар-чи, ҳозир шунча лимон етиштириляпти, лекин бирор катта омборда шу мева қолиб кетган жойи борми? Йўқ. Сабаби, бозорда талаб бор. Пандемия даврида ўзимизда нархи қанча кўтарилиб кетди, ундан ташқари Ўзбекистон лимонига хорижда ҳам талаб катта.

Тайёр маҳсулот экспорти билан шуғулланаётган мутасаддиларнинг маошини бонус шаклида қилиш керак. Яъни қанча кўп натижа кўрсатса, шунча кўп маош олсин. Керак бўлса, 10 минг доллар олсин, менинг ҳеч қаршилигим йўқ, аксинча фақат хурсанд бўламан. 1 млн сўм маош берадиган пайт эмас ҳозир бу соҳада», – дея давлат раҳбарининг сўзларини келтирмоқда Kun.uz мухбири.

Наманганга ташрифини Янгиқўрғон туманидан бошлаган Мирзиёев БАА компанияси билан ҳамкорликда ташкил этилган «Sura General Investments» МЧЖ агрокомплекси билан танишди.

Президент боғдорчиликда илм зарурлигини таъкидлаб, университетлар қошида лимончилик, ёнғоқчилик каби йўналишларни чуқур ўрганиш зарурлигини қайд этди.

@AGROBLOGER канали

kun.uz