`  

          - Chawngmawii

Thawmhnaw bal ka suk fai zawh chiah ho chu tual zawla tlangbanah chuan letling pah zelin ka zar mawlh mawlh a. Ka zar zo chiah, in chhung ka lut tur chuan tualzawl thlang lam huana an pafa thuma hlo an thlo chu ka melh zuai a, a tê zawk ṭawng zir mek la ṭawng fiah lo zawk chu kan pa chuan ṭawng zir ve mek ang maia ṭawng fiahlo deuh deuh in a lo be pah mawlh mawlh chu ka hmu a. Pindanah lut tlangin kan khum bulah chuan ṭhingṭhi hian thinglung lungchhia, ṭap zawih zawihin ka ṭawngṭai a. Ka mittui chu ka biang ah luang thlain chhuata carpet kan phahah chuan vawithum a far ri kauh kauh hi ka hria a. Chutah ka ṭawngtai chhunzawm zel a. Kawngkhar rawn nam hawng pawp a, khar zui leh tlan chhuah paha,"A nu chu a ṭawngṭai" a ti lauh lauh chu ka hre zui a. A pa in "I nuin eng nge a tih va en la, thingpui a nei tawh em tih zawt la aw", ti tura a rawn tirh a ni tih ka hrethiam mai a. Ka ṭawngṭai chu titawpin choka lamah ka lut phei a.

Thingpui bel chu gas stove-ah chhuangin ka on a, chaw ei dawhkanah chuan chawhmeh zanriah hmeh atana siam ka rilruk te chu ka dah chhuak pah a. Thingpui tur ka chhuan lo so chiah chu siamin an pafa in tur chuan ka chawi chhuak a, an awmna hmunah chuan," Hei le, in ru le, in hah tawhin, in thawk hnem si" ka va ti a. Hetia a pa office kai loh ni a an hnathawhna hmuna infiam paha an zing a tel ve a, ei in tur pek tel te hi nuam an tih ṭhin avangin ka pe tel ve mai zel a. Hlo hi thlawh a ṭul em em pawh a ni lo,kan pa hi tih tur zawng reng mai, taima lutuk, hmun ka tihfai leh insuk buai laite hian naupang awm pahin thawh tur a zawng chawp a ni zawk mah.

In chhung lamah luh san lehin chaw chhum pawh chhuan mai theiha ka siam zawh hnuah dawhkan a anhnah chu thenfai tumin ka ṭhutchilh leh nghal a. Ka ṭawngṭai laia ka thinlunga fiah em em a lo awm chu ka thinlungah chuan rawn lang nawn leh a. Ka zak a ni, 'mi ina kal a ṭawngṭai chu' ka ti rilru sap a. Ka mihring rilru rawn thawkin miin,' a inti piangthar ṭha, midang hlir a vei, a nunpawh engmah a ni bik si lo' min ti ang tih mawlh chu ka hlau va, chuvang chuan pumpelh dan hlir ka zawng ngar ngar a nih chu. Mahse thawk leh khatah hnunglam atang in min rawn kuai vanvadaktu an awm a, ka lu chu kuna tih chet ka tum pawn ka thei si lo, mahse min kawih vanvadahna chu a na chuang miah si lo. Mak tak in, "Aw aw aw, nih leh min thlah la, ka kal ang, ṭawngṭai tur chuan" ka ti ruai a, min thlah ta a. Ka lu ka ti che leh thei ta a.

Pawnah va chhuakin chawhmeh ka siam peih diam a, chaw chhuan mai theihin ka dah a, Kan pa bulah chuan," Pa a,chawchhum hi i lo chhuang mai dawn nia, i intihfai hnuah. Venglaiah kalna tur ka nei a, naupang hi ka tifai ang a kan va kal lawk ang e "ka ti a. Kan pa chuan "Naupang hruai kher lo la, nangmahin va kal mai la" a lo ti a. " Naupang hi zahzelah ka duh a, keimah chuan ka hreh a ,ih,ih, ih,nichina ka ṭawngṭai khan Pathianin min tir a, venglaia second hand zuar ṭhin te inah khan ṭawngṭai turin min ti a, mahse ka hreh si a, ka kal lo ngam si lo, a tu inah mah ka la kal ngai si lo,mahse ka kallo thei silo", ka ti niah niah a. Ka mitah tak min en reng chungin," I va mihlim rawng sawt ve mawle,nangmaha pindana i ṭawngṭai hi a tawk mai lo em ni?" a ti a. " Krista Isua neitu te hi mihlim kan nia lawm", tiin ka ngaihtuah lawk miah ni si lo in ka chhang a, keimah pawn mak ka ti a." Ka rei lo ang, ka hreh mah nak lai a, ka la ti ngai der si lo, chhungkuaah bak mi ṭawngṭai sak hi", tiin ka hreh ve zia chu ka sawi a.

A te zawk puain a u zawk ka kai a. Ka rilru zawng zawng a ṭawngṭai mawlh mawlh pah chuan ka kalna tur te in chu ka pan ding nalh a. Kal kawng chu a thui lo ka ti kher mai, ka hreh lutuk vang a ni ber ang chu.

An in luh dawnah chuan step thui lo te a awm a, kan chhuk ṭan chauh tih chuan an kawngkhar pui chu rawn in hawng ri ṭhuai mai le. Chutah a fapa tlangval chak tawka rawn pen chho hlawk hlawk chu kawng kan lo kian rawk rawk a, ka thin chu a su dup dup in ka hria. Ngaihtuahna ka hman vak chuan ka hreh tulh tulh dawn a ka hriat a vangin luh ka hmanhmawh thar sawt a. Kawng khar kika "Lo lut ru" tih ri kan hriat rual chuan kan pen lut ve nghal a. An chhungkua chu an lo thu thap a. Min hmu thut chu mak an tive viau chuan ka hria, "Eng nge i duh ve tak le? Teh hlawl che chuan", min lo ti a." Ih, ih ,ih hei kar hmasaa kawrlum ka lakna man kha ka rawn pe duh che a", ka ti zet a,"tak tak chuan, hei chu ka chhuanlam, thla thar ah min pe rawh i tih kha a ni a, mahse zahzel ah ka rawn hmang a nih hi. In inah hian tihtur ka nei a,mahse ka hreh in ka huphurh tak zet zet a ni, nichinah ka ṭawngṭai laiin in inah hian rawn kal a, ṭawngṭaina hmang turin Pathian in min ti tlat hian ka hria a, ka hreh lutuk a, mahse rawn kal hrehna rilru ka put apiangin ka lu hi kun theilovin min kuai vanvadakin in inlam hlir hi min entir tlat a,chuvang chuan ka rawn thawkchhuak tawp mai a ni", ka ti ta tawp mai a. Mahse ka thawl hawk thung. An pa ber chuan," E a ni maw, kan va lawm em" a ti a. Chutah nu ber lo ṭawngin," Mama khan buaina a siam a, pawisa min dil a, ka ken lai min chhuh lui a, a chhuak chiah kha i lo tawk hial lawm ni?" tih pah chuan shawl chu a bat ṭha mawlh mawlh pah a.

Eng eng emaw kan sawi hnu chuan," I

 ṭawngṭai ang u, kan mamawh lai tak a ni. Lalpan a rawn tir che a nih hi" an tih chuan ka ngampa ta deuh sawt a. Eng thu nge ka chham ber pawh sawi tur ka hre bar lo ka thinlung a awm chu ka chham chhuak pawp pawp a, Lal Isua hminga dil in Amen in ka ti tawp ve ta hram a. Tichuan,' Hei, min hrethiam mai ula, khua a thim mai dawn tawh a naupang chaw ei a hun tawh bawk si, chutah pa berin rei min lo tipalh ang e, zan lam inkhawm a duh dawn sia" tiin kan mangṭha ta a. In chu thaw deuh hlawp hlawp chung chuan kan thleng a. Kan pa chuan rin loh deuh hian,"I va ti ta maw? ṭawngkam i tla chham ve si a, han chham duah chi i ni si lo a, ka ngaihtuah khawp che a, rilru ṭawngṭaina ka lo hmang char char a", tiin min lo hmuak a. "Ka ti ve thei mai, Thlarau thianghlim puihna in", tiin ka kal na chanchin chu kim deuhin ka hrilh zawm nghal a.

" Ih maw hmanni pawn i office hlanin pindan a ka ṭawngṭai laiin tiang khan kawmchhak pitar damlo kha ṭawngṭai sak turin min ti tawh a, mahse ka duh lo, gate pawn thleng saw va chhuakin, an in khi ka thlir a, ka lut leh daih zel. Mahse a tuk lawk ah a boral ta si a, hreawm hi ka ti ru lutuk a, kalin ṭawngṭai ila chuan a dam mai thei sia ti ringawt in ka ngaihtuah a. Mutnaah te chuvang a nia nichin khan ka ṭhulh ngam lohna chhan", tiin ka hrilh a, Kan pa chuan," aww min hrilh la ṭha mai tur, ka kalpui mai tur che sermon pate te ka'n hlap hmasa a nga", ti in min fiam pah a.

Hun leh thla te lo ral in, nikhat chu kan nau pakhat tlangval ve ṭep tawh a pian hnu lawkah a nuin a boral san, kan hnena cheng ve reng reng ṭhin, a changa a pianna pa hnena awm ve zauh zauh ṭhin tho, min kartawn a ni ber e , a chak na lam lamah a awm kual ṭhin a, taksa ah erawh rualpui te phaklo, kal bai nasa deuh hian tlangkam titi aṭangin ṭawngṭai dam thei khaw hrana mi rawn zin mi sawi chu lo hria in a ke ṭha lo a dam ve beisei a pan a duh a, a sawi reng mai sia," Panpui ve ang, chuti tak a beisei chu", tiin kan kalpui ve a. Hming ziak hmasa apiang an lam a, an lam a piang lutin a lo ṭawngṭai sak zel a. A luh hun a lo thleng a a lut ve ta a. Rei vak lo a luh hnu chuan a rawn chhuak a, "Nu, hei ṭawngṭai damthei hian, i lo luh ve a ngai a ti a, ka rawn ko che", tiin a rawn kal bai chhuak nghauh nghauh mai a. Kei chuan,"aw le" tiin ka zui a. Kan nau zawk chu ṭawngṭai damthei chuan pawnah a chhuah tir lawi a, mak ka ti deuh a, a mamawh tu zawk chhuah tir a,kei min be duh daih chu." Ka pi,I fapa kha i ṭawngṭai sak a ni maw", min ti ta khauh a, i fapa a tih chu mak takin zah aiin ka lawm zawk a,mak ka inti keimah ngei pawn, a hma chuan ka fapa a maw mi ten an tih chang a awm te hian ti lang miah si lo hian ka duh lo tih dawn a ni em em si lo hian ka thinlung ah hian ner deuh sak hi a awm ṭhin kha a nia,   

. "Aw", ka ti bah niai a, khatiang a thinlung taka Pathian hnena ka dil sak kha vawikhat chiah a ni si a, ka ṭawngṭai sak chhun kha a tlem em a ka zak a ni, Pathian leh chu pa hmaah chuan, chhungkaw ṭawngṭai kan hlah ngai lo ti ila ka sawi sual maithei mahse kan ṭhulh ka hre mang tlat lo.Kan nau tan pawh hian kan ṭawngṭai fo a, ani lo midang inhrang chang tawh te kan pianpui unau kan nu leh pa te damlo tan te pawh kan dil fo damna te malsawmna te chu, mahse tihtakzeta thinlung zawng zawng in vawikhat chiah ka ṭawngṭai sak tih lah ka inhre chiangin ka hre thar a, chupawh kar kal ta lawk mai khan a ni. Zanah chhung inkhawm kan neih tumin ṭawngṭai lai chuan ka mit min rawn mentir tu a awm vangin ka meng a, chiang deuhin ka piaha kan nau ṭhu maimitchhinga hmui phuna lo ṭawngṭai ve niap niap chu chiang em em hian ka en a ( min entir a nih mah zawk e,ka mit min mentirtu chuan) ka khawngaih ta em em a,a theihna zawng zawng leh tih takzet hmelpu a a ṭawngṭai lai hmel chuan min hneh hle mai a, maimitchhing leh in a tan chuan tihtak zetin ka dil ta kha ania, a tan a ka dil sak chiah chu ka mit ah mittui lo hnamin ka thinlung mit chuan a pu leh anu (a pu leh a nu hi an thi tawh a) hian lawm em em hian min rawn thlir hian ka hre tlat mai a, thlarau kal ta te hian an hmangaih an kalsan te hi lainat takin min lo thlir reng ṭhin anih dawn hi a kan nat leh hlim lai te min lo hmu reng a nih dawn hi te, ka ti ru nghe nghe a ni. Chhung inkhawm kan neih zawh hnu a kan mutna a ka ngaihtuahna ah chuan", I thinlung zawng zawng a i dil sak vawikhat chauh pawh kha Pathian chuan hria in, nu ṭawngṭai saktu a nei che tih a hmuh khan a thinlung hliam a dam vek asin, i hrin ni lo mah se thlamuang takin a thinlung ah lawmna a siam sak a fahrah mal bik riauva  a inhriatna lak ata nunhlimna a siam a, a hlim a ni" min ti ta a. Ka thiltih kha a tlem hle sia mahse Pathianin rimtuiah lo pawmin ka thinlungah chuan fapa atan kan pawm tharin kan lawm lut khu ruai pek a, tihlan hlau ru takin. Ṭawngṭai damthei chuan," Hmanni deuh lawkah, a fapa ruihhlo ti ṭhinin anu ban a tih tliahsak te in ah kalin ṭawngṭaina i hmang a an thinlung leh taksa ah damna a thleng ani maw", min ti leh a, mak ka ti em em a, a nu ban kha a tliak tih ka hre hleinem kal chu ka kal ngei a tiin khami ni ka kal tuma nu ber in shawl a bat ṭha sek kha ka mitthla let nghal vat a." Tih takzet a Pathian i biak a piangin i bianga mittui luang zawng zawng hi Pathian in a kutphah lo dawhin a thlarau thianghlimin a kuangkuah hnan tlat che ani tih hi theihnghilh suh ang che", min ti a. Khami ni ka ṭawngṭai ṭum a room chhuat a carpet kan phaha ka mittui far ri ka hriat, ka zuk melh zui nghe nghe kha ka thinlung ah lo lang in a rawn thar em em a. Nidang ah pawh ṭap zawih zawih in ka ṭawngṭai fo a ka biangah te aluang a ka hru mawlh mawlh ṭhin ani sia khami ni a ka mittui, kan room chhuata a far ri kha ala cham veng veng. Ka thinglung leh beng ah hian ka mangan chang leh ka nat chang a lo thlena, a hnen ka pan a piangin ka mittui hi a kut in a lo dawh tih hre rengin ka mangan leh natna te ka thlen ta reng anih hi. Taksa chetna ka chan ve chhun ka ti ru mai ṭhin a, heng thil ka tawnhriat ve chhun tlemte mi hriata sawi pawh zahtlak zawk, ka tih ve chhun lah chu a nawra nawr kal chawp ka la ni lehnghal a, a tlem tehreng nen miten an hun leh nun pum Lalpa tan an hmanlai in, kan pan pa lah chuan a lo hre vek pawh kha mak ka la ti reng nia.

Elija ṭawngtaina chuan LALPA mei a au thla a, hâlral thilhlan te, thing te, lung te, vaivut te chu a kangral a, khuara tui chu a hip kang ta vek bawk a. Baala leh a zawlneite chu a timualpho.  

(1 Lal 18:38)

Thinglung leh tih tak zet a *Ṭawngṭaina* hian Lalpa a chettir a, Pathian thiltihtheihna a puan chhuahtir ṭhin a lo nih hi a ka ti chhuak hial a.

Ṭawngṭai thlahthlam ṭhin ringtu chuan Pathian pawlna leh chenchilhna a chang ngai lo ang, tin midang tan hahchawlhna a tling ngai bawk heklo ang. 

Ringtute ralthuam ṭha ber chu TAWNGTAINA HI A NI.

Khawvel hi alo danglam zel ang hian, nang pawh Krista tan lo danglam zel ngam ang che. Khawvel erawh chhe telh telh mahse. Krista tan khawvel lakah i danglam ngam chuan. I thlarau nun a ṭha telh telh thung ang.