..

• Бугун, 12 февраль куни Олий Мажлис Қонунчилик палатасининг ялпи мажлисида айрим қонун ҳужжатларига ўзгартиш ва қўшимчалар киритишга оид қонун лойиҳаси биринчи ўқишда концептуал жиҳатдан қабул қилинди.

Kun.uz мухбирининг хабар беришича, «Ижара тўғрисида»га қонунга киритилаётган ўзгаришга биноан, деҳқонларга ерни иккиламчи ижарага беришга рухсат берилиши мумкин.

Масала юзасидан палата спикери ўринбосари Алишер Қодиров муносабат билдирди.

Унинг айтишича, бугунги кунда фермер ер эгаси сифатида ердан самарали фойдаланиш масъулиятини зиммасига олган ҳолда, фақатгина давлат топшириғини бажаряпти, бироқ иккиламчи экинни ташкил қилиш салоҳияти ва имкониятига эга бўлмагани учун Ўзбекистонда жуда кўп ер майдонлари бўш қолиб кетяпти.

«Ва шу муаммони ҳал қилиш учун Президент қарори қабул қилиниши даражасига келган бўлса, демак, биз фермерларни тайёрлай олмабмиз, деган хавотир пайдо бўлади.

Халқни боқиш учун, экспорт учун маҳсулот етиштириб берувчи манба ҳисобланган ернинг 100 гектари ҳатто иккиламчи экинни ташкил эта олмайдиган фермернинг қўлида қолаётган бўлса, нега камроқ ерга эга фермерлар бўлмаслиги керак?

Фермер ғалла бўйича топшириқни бажаргандан сўнг, ерлар бўш қолиб кетяпти. Ва унинг иккиламчи экинни етиштиришга на самараси, на молиявий маблағи ва на салоҳияти етяпти. Шунинг учун биз қонуннинг бузиб амалга оширилаётган жиҳатларини қонунийлаштиришга мажбур бўляпмиз. Муаммони бартараф этиш имкони бўлмагани учун энди биз ҳам фермернинг иккиламчи экин экишга қурби етадиган одамга ерни беришига рози бўляпмиз», – деб таъкидлади Алишер Қодиров.

Унинг қайд этишича, гарчи ер бўш қолмаслиги учун бу ўзгартириш киритилаётган бўлса-да, савол фермерларнинг мавсум давомида фақат бир марталик экинни ташкил эта олаётгани ва кейин ернинг бўш қолаётгани билан боғлиқ.

«Биз 25 йилдан бери фермер тайёр қила олмадикми? Фермер ерини қаричма-қарич фойдага кирита олмаса, самарали қарор қабул қила олмаса, иккиламчи экиндан ўзи фойда кўришни ўйламасдан уни ижарага берса, у қанақа деҳқон?

Биз қабул қилаётган бу ўзгариш муаммоларнинг тўлиқ ечимини кўрсатмайди. Шунинг учун биз мана шу мавзуни чуқурроқ ўрганиш учун махсус гуруҳ туздик ва иккиламчи ижарага бериш тартиби бўйича аниқ механизмларни шакллантириш юзасидан ўз таклифларимизни бермоқчимиз», – дея қўшимча қилди «Миллий тикланиш» партияси етакчиси.

Бу мавзуда фикр билдирган спикер ўринбосари, ЎзЛиДеПнинг палатадаги фракцияси раиси Актам Ҳайитовнинг айтишича, бозор иқтисодиётида ерни иккиламчи ижарага бериш амалиёти – табиий жараён ва буни тўғри қабул қилиш керак.

«Деҳқон, ўрмон ва яйлов хўжалигидан самарали фойдаланишимиз зарур. Бу ўзгариш эса ердан унумли фойдаланишга ёрдам беради», – деди Ўзбекистон Ўзбекистон фермер, деҳқон хўжаликлари ва томорқа ер эгалари кенгаши раиси.

kun.uz

@AGROBLOGER канали