...

Сўнгги йилларда кузатилаётган сув тақчиллиги инобатга олиниб, ўтган йилнинг ноябрь ойидан жорий йилнинг февраль ойигача Туямўйин сув омборига сув захираси йиғила бошлади. Шу сабабли жорий куз-қиш мавсумида шўр ювиш тадбирларини амалга ошириш ишлари вақтинча тўхтатиб турилган эди.

Ана шу муддатда Жаҳон банки иштирокида «Жанубий Қорақалпоғистонда сув ресурсларини бошқаришни яхшилаш» лойиҳаси доирасида «Ўнг қирғоқ» каналида кенг кўламли реконструкция ишлари амалга оширилди.

«Ўнг қирғоқ каналини лойқадан тозалаш» ишлари бўйича лойиҳанинг умумий қиймати 9,15 млн. долларни ташкил қилиб, 31 км канални лойқадан тозалаш белгиланган. Натижада ушбу магистраль канал 160 м3/с сув ўтказиш қобилиятига етказилиши назарда тутилган. Каналнинг реконструкция ишларига бош пудратчи «Бунёдкор-Мерос» МЧЖ билан бирга 42 та субпудрат ташкилотлари жалб қилинди.

6 февраль куни лойқадан тозаланиб, реконструкция қилинган «Ўнг қирғоқ» каналига Туямўйин сув омборидан сув очилди. Шу муносабат билан ўтказилган тадбирда Қорақалпоғистон Республикаси Сув хўжалиги вазири Ж.Узақов, Элликқалъа тумани ҳокими С.Авезов, Тўрткўл тумани ҳокими Р.Шамуратов ҳамда канал реконструкциясида фаол қатнашган ташкилотлар ва механизаторлар иштирок қилди.

— Бу ишларни имкон қадар тез якунига етказиш бўйича барча зарур тадбирлар амалга оширилди, — дейди Қорақалпоғистон Республикаси Сув хўжалиги вазири Ж.Узақов. — Биз, ҳар бир кунни ғанимат билиб, ҳатто янги йил байрами кунлари ҳам шу объектда, механизатор ва ишчиларга елкадош бўлишга ҳаракат қилдик. Масалан, январь ойида «Ўнг қирғоқ» канали реконструкция ишларига 540 та техникалар жалб қилинди. Шулардан 226 таси экскаватор бир объектда икки сменада ишлашди. Негаки, канални лойқадан тозалаш ишлари белгиланган муддатда якунланиб, каналга сув очилсагина шўр ювиш ва ғалла майдонларини ўз вақтида суғориш имкони яратилади.

Мана бугун сув очилди. Лекин, сув кам ва шўр ювиш муддатлари вақти ҳам қисқадир. Шу боис барча сув истеъмолчилари мавжуд сув ресурсларидан самарали фойдаланиб, суғориш тадбирларини куну тун ташкил қилишини, об-ҳаётнинг ҳар бир томчисидан унумли фойдаланишларини сўраб қолардик.

Тадбирда «Ўнг қирғоқ» канали реконструкциясида фаол иштирок этган халқаро ташкилотнинг гуруҳи раҳбари ва пудрат ташкилотлари вакиллари Ўзбекистон Республикаси Сув хўжалиги вазирлиги ҳамда ҳокимликлар томонидан тайёрланган ташаккурномалар билан тақдирландилар. Шунингдек, ушбу лойиҳада фаол хизмат қилган бир гуруҳ ишчи-механизаторлар қимматбаҳо совғалар билан тақдирландилар.

Маълумот учун Жаҳон банки иштирокида «Жанубий Қорақалпоғистонда сув ресурсларини бошқаришни яхшилаш» лойиҳаси доирасида Тўрткўл, Элликқалъа ва Беруний туманларининг 100 минг гектар экин майдонларини сув билан таъминлаш имконияти яратилади.

@AGROBLOGER канали

Ғ.Отажонов, xs.uz