___________                 _________

        [darxika KHEUHBEUH]

                2020

A bag lian lem lo tak chu a hnungah chuan a ak ṭat a, a sam a tukkhum lamah kawhlah hian a ṭawn a, Chumi delh bet tawk tur chuan nge ni tarmit dum hi vuah ṭha hle hle ta lo chuan a chal chunglawkah chuan a chhawng va a. Tshirt dum chungah jean jacket hain, kekawr dum cotton puan lam chi deuh a taksa rem zaih mai a ha bawk. A pheikhawk pawh ala dum cheu! Converse dum bawk! 

Bus aṭanga a lo chhukthla ka hmuh chuan ka ringhlel hial a! Mahse, amah ngei chu niin ka hre bawk si. Ka lam hawi chuan a ban a lo phar a, a vai lap lap a. Mumang emaw tiin ka insik lo chauh a ni. Ka bike seat erawh nghet zet hian ka ṭham tih ka inhre thei.

Chu chu amah Lalthantluangi nen kan inhmuh hmasak ber ni chu a ni. Ka zam chu ka inti hauh lo, mahse, sap hovin 'confi' an tih ang hian kha mi ni khan ka awm lo tluan ṭhak a ni.

Amah hian sap hming an tih ang chi hi a nei lo hrim hrim a, social media lama hming maksak pui pui inphuah chawp ang chi ngat phei chu a nei lo leh zual a ni. Nizan kha an lo thlen hun tura ngaih a nih laiin kawnglakah an chuanna Bus chu a tluan loh vangin vawiin inhmuh kan tum ni-ah hian an lo thleng ta zawk a ni. Inhmuh erawh kan ṭhulh phah ta lo chu a ni a, a chhan pawh "Bus Terminal-ah min lo hmuak la, i hman ang em? Ka chhungte hi min hmuak hman an awm dawn lova" a tih vang a ni.

Kumkhat chuang zet kan inbe tawh a, kan inbiak ṭanna pawh phone kalsual vang a ni. Engti tiin nge min rawn biak teh nawlh dan kha a sawi ṭha duh lo. 'Mi biak ka tuma ka hmetsual a niang' tih chiahin a sawi. Ka sawichhuah chuan a nui ver ver zel. 

Zirna avanga Kolkatta lama awm bo a ni a, tunah hian MA zovin a lo chuang chhuak zawk ang a, thlahnih hnu lamah coaching kal turin Delhi lama liam thlak leh a tum a ni. A cham chhung na na na chu am taka hmanpui ka tum ve deuh tawp mai.

Keilahin panna chang ka hriat miau loh vang chuan ka awmna lam pan chuan a lo phei zel a. Eng nge ka ngaihtuah chiah pawh ka hrethiam lo, 'tikhan min en char char bik lo la..ka zak ve thei tho a nia..' a tih chuan ka awmdan ka hrethiam ta chauh a ni ber mai. Kutthing meuh chuan kan han inchibai a, Thlah mai pawh ka phal lo. Ka hum veng veng a, lai zeta nui verver paha hnuailam a bih takah chuan ka thlah ve ta hram a ni.

A bungrua te Taxi lama kan dahluh hnuah chuan an inlam panin keini kan tlan a, Taxi chuan min zui a ngaih vangin kan hmanhmawh lutuk thei lem lo. Rem fe mai hian ka hnungah chuan a bei deuh thlam a, ka kawng bawra min kuahna vang chuan ka mu er er hialin a nia ka hriat ni.

An veng kan thlen chuan a ṭhu pangngai ve ta deuh a, "I chhungte tumah an awm lo tihna mi inah?" Ka tih chuan, "Awm e," a ti lawi a. Min hmuak hman an awm lo te kha a ti sia, ka va ngei reuh mai mai tak! A lawmawm viau tho nachungin, ka zak ve deuh a ni. 'Saw saw kan in a nia' a tih chuan ka zam nasa zual sauh emaw ni. Building lian ang reng tak, a hmunhma rem loh ang aia mit la tak mai hi a ni a. Nei ve deuh tan lo chuan hetiang building sak hi chu a har ka ring. 

"Gate-a lo ding saw ka nu a nia, chuan naupangte saw ka u fa..." pawna lo awm ho chu bike aṭang chuan min kawhhmuh nghal zung zung a. "Gate-ah sawn tlan lut mai rawh," atih vang chuan muangchang chuan ka tlan lut a, min lo bial nghal laih mai a. Lo phul ve hlutna chi a ni mang si lova, ka awmdan chu a lai ru khawp mai. Chutah, mi â nileng lo ta chuan a chhungte nen chuan min han inhmelhriattir ta zung zung a, ka hawihai zualpui pawh a reh ve ta deuh e.

A awm chhung chuan zantin mai pawh ni lo, chhunah pawh ka kal fo vangin a chhungte nen pawh chuan kan inpawh ṭha viau mai a. Thil ṭhenkhatah phei chuan min makpa chei lek lek em aw ka ti deuh ṭhin. Ka zak ve lek lek a ni. Mahse, kan inpawh em vangah te pawh ngai mai ila a hahdam zaw phian mahna le.

Hun rei lo te Aizawla a awm chhung khan sulhnu kan ngah dun hman hle a, reiek tlang aṭanga tuirial lui inkara mi lenvahna ṭhin chu kan suartluan chhuak hman thaw thang hialin ka ring. Mahse, fel ka intih ve riauna chu maw, "Ka la virgin..." a tia, mipat hmeichhiatna lam hawi zawngin hun ka hmanpui ngai lo. Inkuah a, han in 'muah' te, han in nul thuak thuak te chu chutiang khawpa hun ngahah chuan kan nei ve nameuh mai a. Mahse, ka puakruk erawh a paiah awmin, a puak ngai lo.

"Ka la virgin.." tih thu a sawi chhan pawh chutia chhul lak loh leh tilreh loh te innul ve sek ta chu ka puakrukin ka tin ngawt pek alawm mawle, a hmui chu a pet khur dar dar a, a mittui khap hnam sak pah chuan harsa takin ala thianghlim thu chu a sawi a... ngalchara khawn ang hlauh ka ni. 'Min tilui suh' tiin min ngen hauh lo nachungin tihluih tumna ka nei ta lo a ni.

Coaching kal tura min liamsan dawn zan khan a mu hauh lova, keipawh ka mu hman bik lo. dar 2 thleng rawk mai lengin sawi tur alawi pawh hre lovin kan inkuah ngawih ngawih a ni ber mai. Chutah, mittui tla deuh par chunga min mangṭha hnua ka haw ta pawh chu phone lamah kan inbe zui leh nghal a, hunin daih mawlh hek lo le, khua a var hman ta hial a nih kha.

Thlaruk chhung vel coaching a kal hnua lo let leh mai tur a nih vangin a hma ang em chuan a rei ta lo bawk a, a hun a thleng ve leh mai ang tih chu ka innghahna a ni mai a. Zep lovah chuan a awmchhung khan kan inzui nasa ve he haw bawka ka ngai tak zet a ni. A kal leh ni khan ka mittui a tla lo chauh a nih ber kha maw.

Zankhat chu ka mutui lai hi ka harh hlawl mai a, ka thlan lah chuan min lo bual zuih mai bawk si. Ka tawnzau hak chu phelhin khum bul dawhkanah chuan ka theh phei daih a. Rizai pawh sin tawh lem lo chuan ka mu leh nghal mai a. Mahse, ka mut chhuak a han reh chian mai zia chu mak tak a ni. Ruah bawhawk sur han leh nghal duak, ih..ruah mual liam an tih ang mai kha a ni. 

Dinglamah saisirin ka mu a, veilam ka hawi leh a, ka zangthal thul, bawkkhupin ka ke te chu ka han dah kawisawi vel a, mutchhuak reng reng a awm lo. 

A tihluih theih hlawl si lova le, ka boxer haklai nen chuan inthiarna lam panin ka kal ta nge nge a, tih tur teh vak pawh ka hre chuang lo. Ka va zung tur tur ringawta a ni ber mai e. Ka mutna lam ka pan leh hnuah pawh chuan mut chakna ka nei hauh lova. Cigaratte leh lighter chu banin pawnlamah zu turin ka chhuak zui nghal a. 

Kan kawt mai hi kawngpui a ni a, kawtzawl zau lutuk lo kan nei ve a, kawldai hling nei lo an tih ang chi kha kawngkamah chuan kan phun phei vangin a phui hneh hle a, a hrana a hungna dah vak pawh a ngai lem lo. Kawtzawl lamah erawh chuan ka nuin pangpar chi hrang hrang a dah hnem em vangin a hnawk lam lek lek a ni.

Verandaa ṭhutthleng sei kan hunah chuan ṭhuin zial chu ka fawp ta vang vang a, ngaihtuah loh tum pawhin Lalthantluangi bawkin a ni mitthla leh suangtuahna rawn luah leh ṭhin chu. Ka ngai veng veng hian ka hria.

Zan dar 10 vela kan inbiak khan ani pawhin min ngaihthu a rawn sawi chiam a nih kha. Zandang aimahin kan inbe rei a, 'lo haw chhoh vat vata i bula awm ka chak tawh...' a tih ri te kha ka bengah ala cham reng mai. Ani aia ka chak lohna lah a awm a ni bik hek lo. 'Kan inneih hnuah hna chu ka zawng ve mai anga..' tiin min thlem ti tih hial a nih kha. Ka tan chuan a lawmawm tih bak han sawi dan tur a vang khawp mai.

Chutia ka lo ngaihtuah vung vung lai chuan ka nu pangpar kar aṭang chuan Zawhte hur pahnih hi an lo inngur chhuak thut mai pek a..E khai..thla nei ila chuan ka va han thlawk chhuak chiang dawn tak em! Ka nei lo hlauh a, ka ṭhutna ngaiah ka la ṭhut phah hlauh zawka ni.

Ka zial fawh vang vang lai pawh chu bawlhhlawh bawm bulah chuan a ling vat vat ka va hmu leh hram a ni. 

Chu tih lai rei lo te, mit kan khap hman awrh chauh ang tihah chuan maw boruak a lo inlumlet hman nasa kher mai. Chhum a lo let but but a, thli a rawn thawk chiam mai bawk a. 'Ehe..ruah thimpui a thawk dawn niang," kan ti rilru ve ngawt a, chutiang hunah ruahthimpui a haw ṭhin em tih pawh ka hre chuang lo. 

Current lah chu khawchhe support lo tih takah a thim zui nghal hmiah mai bawk si. Kawtzawl tlangbana an thil zar phe deuh lawp lawp chu ka hmu deuh ruau ruau a, hetiang khua a nih chuan seng loh chuan a ṭha dawn lo ti nauh nauh chungin ka tlan chho ta vat a. Mahse..., a mak lutuk, kan kawtzawl ka thlen chuan thli thaw reng reng a lo awm hlek lo nia mawle!

Hrilhhai zet chuan ka hawi kual hruk hruk ringawt a, zahzel tur a vang khawp mai. Thil zar phe lawp lawp te kha ka hmu ve bawk sia... kei hi ka harh chiang lo emawni le tiin ka nu pot pakhat chu ka han chawi sawn ringawt a, ka harh chian hmel fu bawk si.

Tukkhum hiat nauh nauh chung chuan veranda lam pan chuan ka kal leh ta ringawt a, thilpho phei chu ka seng lui ta thova ni. Veranda ka pen kai chiah tihah chuan a hma ang bawkin thli thaw vuk vuk bawk chu ka hre leh a, 'i hi le..' tih leh kawngkhar pawhhawn ka rual a, thli lum huk mai hian min rawn tuam zui a, ka khar ṭha em pawh ka hre lo, ka kalh leh kalhloh phei chu ka ngaihtuah hman teuh lo. Ka khar ribur a ni tih chiah ka hria.

Ka pindan ka panna lamah pawh chuan eng eng nge ka pal phei pawh ka hre lo. Ka ri phei buan buan tawh maiin ka hria. Khumah chuan ka zuangkai a ni ber mai. Rizai chu ka inkhuh nghal sawk sawk ringawt a, ka thlan lah chu a tla bawrh bawrh mai leh nghal. Ka rizai chu ka ṭham ngawt ngawt a ni ber mai. Current tal awm sela ṭha tur a nia...

Chutianga thlabara ka awm mek lai chuan kawl a rawn phe zawr a, ka purda zar chhanah pawh chuan a eng pup thei nia! Khawpuiri ring zet mai hian chhunzawmin.. ruah fang lian tih hriat zet mai chu a rawn tla zui nghal phuar phuar a, Chu chuan min ti chi-ai zual tak meuh a ni. 

A thim em vang chuan meng mah ila awmzia a awm vak chuang lo. Mahse, mak tak maiin ka maimitchhing ngam hauh lo zu nia! Ka maimitchhin chuan ka hmaibul seta min bihtu awm tlat hian ka hre pek a...thim eng ang mahse ka maimitchhing ngam ngang lo a ni.

Kawl rawn phe leh zawkah chuan ka purda zar phe lawp lawp chu ka va hmu thei a, a ni thei lo, ka purda zar chu phet ngawt nachhan tur a awm lo. Tukverh a inkhar ṭha vek alawm. Engtin nge sawti tak sawn a phet theih! Ka mur nghal sung sung a, thil dik lo chu a awm a ni. Thawh ka han tum a, ka tho thei der mai bawk si lo. Maimizial ang mai hian harh kur chung si chuan ka awm a, ka thi dawn tlata inhriatna te ka nei a, hlau em em e ti lo chuan a eng ber chu nge ka hlauh lah ka hmu bawk si lo. Boruak hi ka hlau a niang.

Ka awmdan chu a hahdam tial tial a, hlauh lampang pawh a lang leh tawh lo. Sakei pakhat hi hmun nuam deuh maiah hian Lalthantluangi nen chuan kan lo um dun a, a chang leh ka sakei um chu zawhte te hi a lo nia, a chang leh a thlawk nul nul a, keini pahnih lah chu za em em hian kan lo nui bawk bawk a. Ka hnung lama a tlan vang chuan ka lo nghak a, alam ka va hawi chuan... amak lutuk, kawrvar lampang a fual hi a lo ha a, a balh hmelh ngawih ngawih a ni. A hmel lah chu thlarau niawm tak hian ka hmu leh nghal a. Ni lo, Saw chu Lalthantluangi a ni lo tawp mai tiin tlansan ka han tum a, ka che leh thei tawh hauh lo.. ani lah chu a lo hnai tial tial leh nghal a...ka hrawkah chuan a rawn rek ta, a thaw huam huam mai leh nghal a kamsir aṭanga a chilphuan niawm tak tla te chu ka hmu chiang kher mai, ka hlau lutuk chu ka theih ang tawk chuan ka han ṭe vak vak a, ka hrawka a reh tlat vang chuan ka auchhuak ring thei bawk si lo.

Nu, ka thi dawn tak ngial ta a nih hi... “Mama Mama...” tia ka lu an rawn sawi takah chuan ka harh chhuak hlawl a. Ka nu hi ka bulah chuan a lo ding reng chu lo niin... “Mu ṭha rawh, rizai te kha inzial lo la...” a rawn ti a.

Ka nu chhuah hnu chuan mak ti zet hian ka ngaihtuah zui ta vang vang a. Ka mumang nge a tak, a ṭhen kha chu ka mumang a ni ngei ang. Mahse, nizana pawna ka va chhuah te kha... Rang lutuk tak mai hian ka inperh tho nghal a. Kawta puan zar te chu ka va en ta ngat a, a ngai ngai chuan a lo la inzar dal a, ka hmuh ang chiah khan thil inzar pawh chu a awmin ka hria. Engtin nge ka khatiang kha mumang ni ta se ka hmuh dik thlap theih zawk le.. A mak hle mai. Ka awm a ti nuam lo deuh hial a ni. Ka nu Pot ka chawisawn pawh kha ka han en ngat a, a hunna chu insawn a lo awm chiang alawm. Amak hle mai. Thawmhnaw te kha ka seng ve thlap khan ka hre sia, nge, ka chhungte hian an lo zar chhuak leh hman tawh zawk le.

Inchhungah chuan ka lut a, ka nu leh ka u fapa hi chokaah chuan an lo ri rak rak a, “Nu, puanzar saw in pho chhuak leh tawh mi? Nizan khan ka seng khan ka hre sia,” ka ti lut ringawt a. “Phochhuak nang..” a lo ti sam et a, sawi tur tur a vang duh teh e, min zawt zui lo hlauh zawk a.

Tukṭhuan kan eikhamah chuan phur fahran lo hian hna lama kal turin ka insiam zui nghal a, zep lovah chuan ka chak lo ngawih ngawih a ni. Mumang vel bawr mai mai chutia han ngaihtuah buai chiam chu dikin ka hre chiah bawk si lo.

Sikul ka thlen chuan ṭan dar hi a lo ri chiah a, a hmasa lama kalna tur ka nei chuang lovin ka hria, dawhkawn bawh diaiin muthlu mai mai teh ang tiin ka bag pawh chu pawhdawhah chuan ka hnawhlut nghal rawk a ni ber mai. Naupang chiar nak nak thawmte chu nidangah ka nin ngai loh nen tukin chu ka thin a ti rim hlur mai nia mawle. Ka bula ṭhu, Tlanhlua Nupui Rami lah chuan tukin ataka eng nge maw a hriat ni Scale chuan Dawhkan a khawng ri ang koh koh a, ninawm lutuk, ka barakhaih thut dawn emawni le, ṭe ring awm diar duar hle si.

Kan Sikul Chowkidar Kinlova, Lu kawlh tel tul in dar vawihnihna a han khawn pawh chuan ka la muhil chuang der lo, ka haw daih zawk dawn emaw ni ka ti rum rum a ni.

Naupang zirtir tur chuan ka kal ve bawk a, ho an ti ve ngawt ang, zirlai lamah keimah ber chuan ka rilru pethei chai hek lo le, anmahni chuan an zir ngawr ngawr a ni ber a. Nuam an ti phian zawk emawni lehnghal a.

An mid-Day Meal lah chu nidanga duh ber ṭhin khan ka ei peih ta tlat lova, an dal kan eng hlui mai te chuan ka luak zuk pawt tlat peka maw le!

Chawhnu lama class ka neih lai chuan ka phone nghawr dar dar chu ka hre reng a, ka laklawh em vang chuan ka zawh hunah law law ka be mai ang tiin ka ngaihven zui duh ta lova. Vawihnih vawithum lai a rik nawn takah chuan a pawimawh ngang a ni ang e tiin ka la chhuak a, naupang ho chu laklawh deuh hian ka chhuah san a, min rawn biak tumtu lah chu a number tak ngial pawh ka save loh a lo ni leh nghal a.

A tua pawh chu ni se chuti kauva mi biak tum chu a pawimawh viau a ni ang e tiin ka phone let ta nghal a, a rik pawh a ri emawni tihah chuan a rawn hello lauh a. “E, Mala ka nia, i miscall ka hmu a, eng nge ni ta?” ka ti zui nghal zat a.

“E, Mala maw, ah... eng lo a nia. I ṭhiannu Tluangpuii kha nizan lamah khan a che sual a, khulama a awmna lamah a boral hlauh mai a...” “Engtin maw..?” ka ti zui ve bawk tak nain ka phone chu ka beng hlat zawngin ka la thla ruai ruai lawi a, a ṭawng awm tak chu ka hria a, eng nge a sawi erawh ka hrephak ta lo a ni.

Office lamah chuan ka lut zui a, ka dawhkana tui inchhawp chu ka va inkhawlh khawlh ringawt a, “Eng a ti nge a Sir?” tiin min lo chiau au thuai hlawm a, “Kan ṭhiannu a boral thu ka’n hre thut alawm mawle,” ka ti chhuak hram a, “A nih chu mawle, ava zia lo ve, khawihmunah nge?” tih te chu min zawt zui hlawmin ka hria, ka chhan leh chhan loh erawh ka hre ta hauh lo mai.

Nizanah pawh kan inbia a, tunah a thi maw? Nizan ka awmdan zawng zawngte kha he boruak tur vang hi a lo ni dawn maw! Sikul aṭanga ka haw te pawh chuan ka mumal meuh pawhin ka hre lo. Engatinge tukin lamah pawh khan biakna chang pawh ka hriat miah loh le, nidangah lem Sikul kal dawnah emaw ka thlen veleh emaw tal ka hrilh ve ,hin kha a ni a, zing lama a message ka hmuh loh kha chuan han ngaihven nachang te pawh hriat ve awm tak hi a nia.

Ka chhungte pawh chuan min lo bengkhawn lem lova, ka pindan lamah chuan ka lut tlang nghal pawrh a, khumah chuan ka han let vei ngat a, thil ngaihtuah viau e ti lo chuan ngaihtuah mumal ka neih erawh ka hre chuang der lo nia mawle. 

Ka thova, ka inbual hnuah chuan ka han insiam ṭha leh a, insiam ve e ti lo chuan a hnua an sawi ka hriat leh dan chuan kekawr bul te ka lo ha lawi a ni awm e.

An in ka thlen chuan mi an lo phusa sap sap tawh a, inchhung pindanna te pawh chu an lo ṭhiat darh huai tawh mai a, tih tur pawh hre lo chuan ka lo tei ve mai mai a ni ber e. Thil thlen dan kha chiang kuang fak pawhin ka hre lo. Ka mang deuh tlat ni hian ka hria. A ruang lah zankhat hnuah, chu pawh tlaiah emaw zanah emaw a lo thleng chauh ang an ti leh nghal a. Khawvel hi a zau duh rak rak kher mai. 

Engti tiin emawni kan thawhpui leh ka ,hian ni bawk pakhat hian min rawn hruai haw ringawt a, ka chhungten chawei min siam kha ka ei ta em pawh ka hre lo, pindan lam panin khumah chuan ka va mu hle hle tih chu chiang takin ka hre thung.

Ka hnar verh zet mai thil rim ka hriat vang chuan ka ṭhu chhuak hlawl a, current tak ngial pawh ti thim lovin ka lo mu pek a ni maw. Ka parda thlarah chuan thil che niawm tak ka hmuh vang chuan chu lam chu ka’n en deuh ran a, mihring ruangam niawm tak, kal tawn vel ni hian ka hria a, ka chhungte emawni dawn le. Mahse, kawngka te pawh hawn awm tak a nia. Ka pindan aṭang lo chuan helam veranda hi a kal theih bawk si loh. Ka nu ke sa a mu thei lo vei vel a nih ka ring ta deuh a, mahse ka ngaih a ṭha chiah lo thung.

Ka thova Parda chu ka zuk keuva tumah pawh chu ka hmu leh chuang si lova, tu emaw chu vei an awm kha mawle tiin kawngkhar hawng meuh chuan ka thlek leh a, ka hmu chuang lo. Ka chhuaka inthiarna hmun thleng chuan ka kal phei a, kawngka lah a lo inkalh ṭhap mai bawk si. Ka mit vai a niang a ti nauh nauh chung chuan ka let leh a, ka hnara rim cham lah chu a rimchhe uih em em mai leh nghal a.

Kawngka ka han khar tur chu pawttu awm ang mai hian a ṭang ta tlat mai a, daltu tur a awm ka hre bawk si lo, ka hlau ni ta berin ka hria... Theih tawp tak meuh chuan ka han pawt leh a, thawri deuh hrawk ka hriat rual chuan ka kawngkhar pawh lai chu thlah thut ang mai hian a awm a, ka pawt ri bur chuan a zui nghal a, thawm dang erawh hriat tur a awm lo thung. Rimchhe zet ka hriat pawh kha a reh zui ta daih a, keilah chu rit la zo ang mai hian ka rawl ṭhum a, ka thlan lah chuan mi lo bual zuih leh nghal a.

Haklai nena let ve mai ka nih vang chuan kekawrte chauh chu zuahin a dang zawng chu ka hlip ta vek a, Ceiling fan chu ka tivir vut vut bawk a, muthilh erawh ka hnaih teh chiam pawhin ka hre lo. ‘I duhtak Tluangi kha mitthi a ni tawh a sin...’ ka beng bula min hrilhtu awm ang mai hian ka hre chiang a ni. Ka han hawi kual vut nain engmah phei chu ka hmu chuang lo. Pindan lah ka kharphui vek si a.

Chu thu chuan min luh ta ngut ngut a, Tunah a ruang an rawn hawpui mek ang a, ka hnen a lo thlen meuh chuan hmel hmuh tlak alawi pawh a nei dawn si lo.. Tluang, engtin nge hetiang hi ka chungah i thlentir theih le, engtin nge awm se min tih, chhungkaw din tura ruahmanna kan siam ve zawng zawng te kha engtin nge ni ta ang? Ka mittui tla thei lo emaw ka tih tawh kha dan rual loh hian a lo sur ta zung zung a, a boral ka hriat tirh aṭanga a tlak vawikhatna a ni.

Ka ngaihtuah nasa kher mai. Nizana ka thil tawn te, Vawiina Tluangi Boral thu ka hriat dan leh zanina ka tawn thlengin... Ngawiteh, nizan leh zanina ka thil tawn hi eng emaw a ni ngei ang. Ka duh leh ngaih em em Tluangi hian min rawn tlawh a ni thei ang em? Tiin ka ngaihtuah chhuak a. Ka tho nghal zawt a, thlanglam veranda-ah chuan ka va chhuak hluai ringawt a. Engmah phei chu hmuh leh hriat ka va nei lem chuang lo. Kawmthlang te ui lian, mawl zet chu ral leh lam khawrh rum rum khawpin a bauh chiam a, chu zawng chu a ni mai e.

Aw..nichin te khan tuna ka ngaihtuahna ang hi lo pu tawh ila ṭha tur a nia tiin sawt mang hlei lo chuan ka insawh a. Veranda thlang lamah chuan tuemawni lo kal leh nghak chuan ka ṭhu tlaivar a ni ber mai.

‘Ruang a lo thleng’ tiin min rawn kai tho a, ka chiang lo vel vek a ni. Ka mu lo emaw ka ti kha ka lo muhil nileng leh ṭhiai lawi si a nih awm chu mawle.

A zana zanin an vuiliam nghal a, ṭah chu sawi loh chu lai boruak chu ka rilruah zuk awm hauh lova, chu mawlh aichuan zan lo thleng vat vat se tih ngawt a ni ka ngaihtuah. A lo kal lehin ka ring alawm. Vawikhat tal hmu leh ila tichuan ka rilru na pawh a dam phah mahna le.

A chhungte chuan min ngaih ven em em a, min ngaihsakna chhawn let turin eng thilmah tih nachang ka hre lo thung. A ṭhen phei chu ka aw e liam vel mai mai a ni. Ka ngaihtuahna chu helai hmunah mai pawh ni lo, he khawvelah hian a awm lo tlata hriatna te ka nei, tumah ngaihsak nei lovin ka thil zawn lai hmuh tumin ka hawi kual vak vak niberin ka hria.

Ka unaupa pakhat hi min riahpui turin ka chhungten an lo sawm a ni awm a, chu thu ka hriat chuan ka lawm lo kher mai a, ‘a ngai lo’ tiin ka vin deuh ṭhat nghe nghe a. Mahse, ka hnial hneh ta lo. Zan ka nghahhlelh chhan em em chu a ral mai dawn a sin. Tluangi a lo kal duh nang... In hrethiam lo mi? Zaninah hmuh ka duh a sin...

‘Tak mialin...’ tih chu ka innghahna a ni ber a. Mut a chhuah lem loh vang chuan ka bul ṭhutthlenga mu hnar kuk kuk chu ka hnung chhawn ngut a. Veranda thlanglam chhuahna kawngkhar chu ka hawng a, tukverh parda pawh pakhatmah ka zar pharh duh lo a, thawm emaw ka hriat vat theihna turin ka inruahman a ni. Mahse, zanlai dar sawmpahnih te, dar khat te a pel chhova thawm riva hriat tur engmah a awm lo. Ka chhaka mu chu han hnek chawrh mai te ka duh rum rum a...amah vanga lo inlar ngam lovah ka puh deuh tlat a!

Ngaihtuahna thar ka nei thut! Thawm dim tak chuan ka thova, bike pawh lachhuak ngam lovin ke ngatin Tluangi an zalhna thlanmual chu ka pan ta ngawt mai a. Chutah chuan min lo nghah ka ring tlat si a ni. Ka unaupa mutduh hlauh chu a tihzia kher mai. Motor tawh tur a awm lova, zan chu a reh ruih a ni ber mai. Vanlam lah ni se a thiang kuk mai bawk a.

Thlantla hluama ka kal fe hnuah Thlanmual chu ka thleng ta hram a, ka vawihnih kalna. Darkar tam lo tak liamtaah khan ka duh leh ngaih em em chu helai hmunah hian min vuiliam sak a nih kha.

A thlan, hungna pawh la nei lo, lei pawngthara an chhun chungah chuan ka ṭhingṭhi hnawk a, ‘Tluang, engmah sawi lovin maw min kalsan dawn, tun thleng hian ka la nghak che a sin...’ mittui khap far zawih chung chuan ka han ti a, han sawi leh tur pawh ka hre chuang lo, hnuk ulh ṭeuh chuan ka awm a.

Ka hnunglama lum deuh ham ham leh thil rimchhe zet ka hriat zui takah chuan ka kiangah chuan min uaptu an awm a ni tih ka hre thei a, hlauh ngaihna lah chu ka hre lo leh nghal a. Che lo chuan ka awm ngai chuan ka awm ngawt ngawt a, ‘Tluang...Ka hmangaih che a sin..” ka han ti a. Ka ṭawng chu a ri chhuak zo em ka hre tawh lo.

Ka hnunglam aṭang chuan min rawn kuah niin ka hria, mahse maw...a taksa erawh chu a dai thlur mai thung a. Kuah let tuma ka inher chuan engkim mai chu vawilehkhatah a reh nghal duak a. A thiang nghal kuk a ni ber mai. “Tluang..khawngaihin..’ lawi deuh ruai chuan ka han ti a, a reh tlawk tlawk a, khuangchingchiri hram leh zan sava thawm bak min chhawntu ka nei ta lo.

Ngawirengin darkar fe chu ka nghak hialin ka ring. A tawpah chuan Beidawngin ka ding ta hluai a. A thlan an vurna lei chu ka veilam chuan theihtawpa tam ka ṭham a, inah ka hawn dawn, chu thil ka tih chhan chu ka hnenah ngaihngam taka a lo kal theih ka beisei vang a ni.

In ka thlen hnu rei vak lovah chuan khua a var zui mai a, chhin khatmah chhing lovin chu zan chu ka hmang liam leh ta. Chhunah chuan chhuah pawh chhuak lovin khumah chuan ka awm chawt a ni ber a, a chang leh ka lo muhil a, mu mang ṭha lo tak tak ka neih vangin ka harh zawk zawk a, ka muhil rei hman lo a ni ber mai.

Chutiang chuan karkhat dawn chu mumal lo takin hun ka hmang a, hna lam ka ngaih sak lova, ei leh in lam lah ka rilruah a awm hek lo. Ka awm awm chuan ka awm ve mawp mawp ni berin ka hria. A chang leh ka chhungte chuan eitur min pe lui a, drip min khaisak chang te pawh a awm hial. Rilru lam daktawr thlengin min panpui! 

Boruak dang min chimtu awm lo ta chu zawiin ka nunphung pawh a zia chho ve leh ṭan hret hret a, ngaihtuahna lam chu fim viau lo mahse ka khawsak dan erawh a langah chuan a danglam tam viau tawh lovang. Chhunlamah hna lamah ka kal a, chaw ei tam lo mah ila ka kilpui ve ziah a, zanah pawh buaina nei lovin ka mu mai a, muthilh erawh ka la nei tam vak lo thung.

Zankhat chu Zanriah kan eikham hlimah hian ka tawngkhawng ve tawk tawh a niang ka mut chu namen lo hian a chhuak a, ha tak ngial pawh ka nawt hman lo a ni ber e. Khum lam pan chuan ka kal zui nghal a. Thawmhnaw pawh hlip lo chuan ka awm ang ang chuan ka va let tawp a ni ber mai. Tui tak chuan ka mu zui ta a ni ngei ang.

Ka bianga min rawn khawih vang chuan ka harh zawk a, ka manghriat a ni hauh lo, ka harh chiang khawp mai. Pawnlam eng deuh uau tukverh aṭanga lo lut vang chuan pindan chhung chu a hmuh theih deuh ruau a, tumah ka hmu lawi si lo. Ka ṭhu chhuak a, rizai tlawh hlimin ka tho zui nghal a, Light ka tih en pawh chuan engkim chu a pangngai vek bawk si. Tukverh kalhna leh ka pindan luhna chen chuan ka ennawn a, engkim chu a ṭha vek. Ka mumang aniang tiin eng chu ka ti thim a, ka mu zui ve leh mai a.

Lukham ka tawk chiah tihah chuan thlang lam tukverh parda hrulah chuan hlim thla niawm tak ding hi ka hmu ta tlat mai a. Mit ka han nuai a, a reh hauh lo. A awmna chu pindan chhunglamah ngei a ni. Nichina ka tih en lai khan tumah an awm si lo. Mak tak maiin ka thauvah min man a, ka ṭim deuh er er mai a.

Chulaia ding chuan ka lam a hawi lova, tukverh darthlalang aṭang chuan pawnlam a thlir ni ber hian ka hria. Ka awm dan dik zat loh vang chuan hlau chung chungin ka inlukhup a, inlukhup ngai lo tih takah ka thaw pik lutuk chu rei ka inlukhuh thei bawk si lo. Ka han dah chhuah leh chuan... a lo awm tawh lo!

A awm tawh loh chuan thawk huai awm tak, chuti ta lo chuan khawiah nge a awm tiin ka pindan chu ka enkual ruai lawi a, khawilaiah mah chuan ka hmu tawh lo. Inhumruh ṭeuh chung chuan a hmaa a dinna lam chu ka melh reng ringawt mai a, ‘Tluang...’ tia ka phun sap rual chuan thawk leh khatah parda inzar chu a che lawp mai a, eng emaw ka beisei laiin khawvar thleng chuan beisei chhuah erawh ka nei tawh lo thung.

A tuka sikul aṭanga ka haw ka inthlak lai chuan khumlua penbawm ka hunah chuan hnim lo ṭo hi ka hmu a, pawh mai ka tumlai chuan ka pawt mai phal tlat lo! Chu Penbawmaah chuan Lalthantluangi thlan aṭanga ka hawn lei kha ka pen dahchhuak meuhin ka dah a ni a, chu hnim lo lo chuan eng emaw ti tak hian min khawih tlat a, chu bakah pakhat chauh a mal ṭo deuh ngawk bawk nen ka pawt phal ta ngang lo a ni. Khum bula bottle ka chhawp chu lain tui tlem ka leih zui ta zawk a.

Zana ka mut dawnah chuan uluk fe mai hian ka thlek vang vang a, reingial chu ka ṭhut chilh a ni. Chu hnim ṭo vang chu nge ni ka bulah ka Lalthantluangi a awma hriatna ka nei tlat mai a, Rilru nuam ang reng deuh chuan ka mutsan zui ta a.

Chiang em em mai hian motorin a su lai chu ka hmu a, a sutu chu sikh palian tak, lutuam ber bur hi a ni. Scorpio dum chu chak zet hian a lo tlan a, zebra crossing a tantlang lai chuan chu pa chuan a hnuhnungbera kal Lalthantluangi chu a su leng lawp mai a, hla deuh taka kawngpui chara a bawk thlar mai chu ka en reng a, motor horn ri chuah chuah leh mi zi nuaih nuaih, rak chel chul mai karah chuan amah aṭang chuan nuisang mai hian amah vek chuan min rawn pan a nih chu!

Mihring angin a kal lova, a rawn leng phei delh delh ni ber hian ka hria. Mak ti taka ka thlir lai chuan ka kiang chu a rawn thleng der tawh a. Ka banah chuan kaiin min thawlhpui niber hian ka hria. 

Aizawl daia kan kal tawhna hmun hrang hrangte chu kan hmu zut zut a, an ina a ruang an ṭah laih laih laite pawh chu ka hmu, zawhna zawh nachang pawh ka hre lova, ani lah chuan sawifiah a tum hek lo.

Nui ver ver chung hian ka mit a rawn hup a, a thlah leh meuh chuan ka pindan chhungah kan lo awm reng tawh a, khumah chuan kei ka ṭhu a, ani ka hmaah chuan a ding thung. “En teh, hei pangpar hi ka phun sak che a, duat deuhin lo enkawl rawh aw,” tiin pangpar chu hnai feah hian a va thlek a, chutih lai chuan a par huna a awmdan tur zawng zawng nen ka lo hmu lawk vek nia mawle. A par chu a lian lova, kumtluang par ang tiat vel hi a ni. A pawl lam deuh niin a laimu bawrah chuan a sen hian a kap deuh ṭhek a, mawi tak a ni. 

Ka bulah amah ngei a awm vang chuan ka thla a muang em em a, sawi tur pawh ka hre lo a ni ber mai. A kalna lam apiangah chuan ka enzui vawng vawng zel a, ka tan chuan a mawi ber a sin. Thil dang zawng aiin. Kan inkuah a, kan infawp a...

“Ka haw tawh ang aw, lo in enkawl ṭha la...” a tih chuan chutia min han kalsan mai tur chu ui tak te hian ka ui a, ani lah chu “Ka kal a hun tawh alawm,” tih ṭanin a ṭang ve tlat mai bawk si. Ka chelh rual loh chuan ka pindan chu a chhuahsan ta a. Ka thinrim bawk si awmngaihna hre lo chuan ka bula thil awm chu ka han chhuih bur mai a, ka harh zawk mai!

Ka mumang maw! Ni lo, mumang a ni lo.. Mahse, engtinnge khatiang khan a thlen theih si! Ka ngai veng veng a, ka inngaihtuah nasa deuh nge ni ka mittui chu a rawn luang chhuak ta hial a, rawl chhuaha ṭah hawk hawk mai ka va han chak tak em! Khumlua pangpar inhung chu mittui tla zawih zawihin ka thlir ta reng a.

A tukah pawh chuan hna lamah pawh kal peih lovin ka mu nileng ṭhak a, ka lung a leng veng veng a, maimitchhinga inngaihtuah vang vang mai chu a nuam berin ka hria.

Chutiang chuan zanthum ngawt mai min rawn tlawh a, hlim takin kan awm dun ṭhin. Zawhna zawh tur engmah ka nei ngai lo. A zan thumnaa min kalsan dawn chuan ani pawhin a mittui a dang zo bik lo. Khawfing a chah rual chuan ‘Mangṭha’ tih a lak aṭanga ka dawn hnuhnung ber tawh tur chu fiah lo riai hian a han sawi a. Muang changa a ral riai riai mai chu ka thlir tlawk tlawk a ni ber e. A awm loh chiah chuan awm ngaihna hre lovin a hming chuan ka ko zui vak vak a, ka chhungte lo tlan lut ṭak ṭak chuan thil awmzia chu a tifiah zo ta!

Ka thawmhnaw hak lai te chu min phelhsak sawk sawk a, ka nu chuan towel huhin min lo hru mawlh mawlh bawk a. Eng mah an sawi lova, keilah mittui nen ka lo inchiah deuh pur mai bawk si.

Ka nu chuan min awmpui chawt a ni ta ber a, zanlamah pawh pindan hrana ka riah an phal lova, an pindan lamah khum awl pakhat an zawn lut a, chutah chuan ka awm ve mai ṭhin a, a hma zana kan inhmuh hun awm te a lo thlen chuan ka han tho uai uai ṭhin a, ka nu leh pa chuan min vil reng a ni tih hriat tak hian thawm an rawn nei thuai zel bawk si. Ka thawhluih lahin ka nuin emaw ka pa emaw chuan min zui thuai zel a, engmah a falin ka ti thei bawk si lo. Ka ngai asin, ka ngai ngawih ngawih tih inhre lo em ni!

Hun a kal a, a tan engmah ka tih theih tak si loh vangin kan inhmu thei ta lo. A pangpar chu te tak te hian a rawn par a, ka lo hmuhlawk ang thlap khan a par! Chu thil ka hmuh tukah chuan mittui tla zawih zawihin ka thlir a, ‘Mangṭha...’ zawitea ka tih chuan ka bula a ding ve tih pawh ka lo hriat loh ka nu chuan, “Mangṭha le Tluangpui, kan ngai lutuk che. Mahse, In khawvel a in ang tawh lova, engtikah mah in duhthusam hi a puitling thei dawn lo, chuvangin khawngaih takin i hmangaih em em hi hlim taka a awm ve theih nan kalsan tawh rawh aw...” a ti a.

Ka nu chuan mittui tla chung min rawn kuah a, “Mama, a tawk tawh e. Engkim tan hun ruat a awm tih a nih kha...” tiin ka hnungah chuan a chul hauh hauh a.

Inkhawmnaah min hruai a, Pastor te leh rawngbawltu te nen inkawmna hun te min ngaihtuahpui zel a, ka hnaah aikal min laksakin dawr lamah ka nu kiangah a tam thei ang ber hun ka hmang lui ve ta zel a. Thlahnih thla thum a vei meuh chuan nunphung pangngaiah ka kir ve thei ruai chu a ni tawh e. Zing tina pangpar tuipek erawh ka hmaih thei ngang lo a ni.

Kum tawp lam kan thlen meuh chuan ka nu dawr ṭhenawma mi nula pakhat hian mi ngaihzawn zia chu thup rual lovin a sawi ta phawng mai a. Keilah chuan chutiang lam rilru pu mawlh hek lo, ka en liam mai a. Kan inhmu ngun si, a chang chuan a fel lutuk leh min ngaihsak lutuk chu ka ning lek lek ṭhin a ni. Ka chhungte lah chuan ngaihven ve tur chuan min tur sek mai leh nghal a.

December Ni 15, Zirtawpni a lo thlen chuan kan dawr Lane ho chu picnic an rawt a, ka nu ruhseh a lan deuh vangin ‘Nang tal kal mai rawh, pawisa kan chawi ve vek tho sia, a uiawm’ tiin min hnawn deuh a, peih vak lo chung chuan ka kal ve ta thova. Rin aitak chuan nuam ka ti phian a, inhresa vek kan nih vang chuan han inthlahrunna tur teh chiam awm hek lo le.

Tui ka cheng zo chu inthlak turin pindan pakhat ka pan a, ka inhak mawlh mawlh lai chuan min ngaihmelh ngawih ngawih reng tu chu a lo lang hlawl mai a. Kekawr bul ka ha fel hman hlauh zawk a. “A nuam i ti em?” tih pah chuan min rawn kuah a, “Ahh.. um a nuam khawp mai, nangni in awm chuan a nuam a ni mai a...” ka tih chuan phur deuh hian meng de sar chung hian min thlek deuh ha a, “Tak tak maw...?” a tih chuan amah kuah zui pah hian, “Ka ti tak tak alawm,” ka ti zui ve mai a. A nihna takah chuan ka sawi ve mai mai. Chutiang lam ka rilruah a awm hauh lo. Mahse, ka boruak hip hi thlak ngaia ka hriat vang zawka chutia sawi lui chu ka ni mah zawk.

“A nih min hmangaih em?” kun deuh ngaih chunga a tih chuan ka lum pup hian ka hria, chu zawhna chu min zawt lo se ka ti kher mai. ‘Hmangaih’ tih ṭawngkam hi sawi tawh loh ka duh asin. Mahse, mipa ka ni. Harsatna in delh beh tir reng tur ka ni em ni? Hun liam tawh hnu vanga indawm kun reng hi ka tan a sawtna a awm em ni?

Dim tein a khabe-ah chuan ka dawm kang a, en pawh min en ngam lo chuan a maimitchhing diar diar a, a hmui khur dar darah chuan dim te hian ka fawhsak zui ta a. Min kuah ngheh sauh pah chuan am zet hian min chhanglet zui nghal a. Tichuan, ngaihzawng ka nei ve leh ta a nih chu.

Mahse, chumi zan zet zawng a manganthlak tak zet a ni. Dar 11:00 velah mu tura eng ka han ti thim chiah chu thawm maksak pui pui hi ka hre zui a, thlabara ṭap thawm te, ṭe vawn vawn mai te, thli leh ruah pui thawk tur niawm tak chen chuan ka hrekim vek niberin ka hria. Ka mangang chu ka nu te pindan lamah ngawi rengin ka insawn leh ta daih a, chulamah chuan thawm ka hre zui ta lo.

A tuk zinga ka thawh chuan zanlam boruak pawh ka lo hrechang leh tawh chuang lova, pangpar tui pe tur chuan no hian ka chawi lut va va a, pindan ka hawn chuan chhuata thlalak lo tladarh leh a frame te, darthlalang te lo darh nuaih mai chu ka hmu hmasa ber a. Chu thlalak chu Lalthantluangi nena kan lakdun, khumbul dawhkana ka hun a ni tih ka chiang viau. Ka chhungte pawh hrilh chuang lo chuan ka tifai nghal thuak thuak a, pangpar tui pek tuma ka pan leh chuan ka pangpar roh em em mai chu a thi tih hriat zet hian a lo vuai nan mai a. Engkim chu ka ngaihtuah chhuak thiam ta! 

“Tluang, min ngaidam rawh...” tiin chu pangpar uai zawi hniang mai chu ka thlir vawng vawng a....

            A TAWP TA

    ©________[ɐʞızɹɐp]________®