...

Наманган вилояти ҳокими вазифасини бажарувчи Шавкат Абдураззоқов ҳамда Исроилнинг “DRTS” (Drip Research Technology Solutions) компанияси минтақавий вакили Сулаймон Хартавиўғли ўртасида бўлиб ўтган музокарада айни шу масала муҳокама этилди.

“DRTS” томчилатиб суғориш ва агротехнологиялар бўйича дунёдаги етакчи компания ҳисобланиб, АҚШ, Туркия ва Ҳиндистонда филиалларига эга. Ҳозирда компания томонидан Тошкент вилоятининг Юқори Чирчиқ туманида 40 гектар майдонда лаванда плантацияси барпо қилинмоқда. 

Мулоқотда компания ходими Сулаймон Хартавиўғли худди шундай плантацияни Наманган вилоятида ҳам жорий этишни таклиф қилди. 

Хорижлик мутахассиснинг айтишича, лаванда кони фойда ўсимлик. Уни тиббиёт ва парфюмерияда кенг қўлланилади, суви, гули ва мойидан фойдаланиш, экспортга йўналтириш мумкин. Килограмми жаҳон бозорида 8-9 минг долларга баҳоланади, бир гектардан эса 70-80 килограмм мой олиш мумкин. Энг асосийси, лаванда кўп сув ва парвариш талаб қилмайди. Муҳими, Ўзбекистон шароити учун жуда қулайдир. 

Учрашувда Шавкат Абдураззоқов 2018 йилда Туркиянинг атиргуллар ва лавандалар ўлкаси ҳисобланган Испартага сафар қилгани ва ўзаро тиғиз алоқалар ўрнатилганини эслаб, мазкур ташаббусни қўллаб-қувватлади. Бунинг учун “Косонсой-фарм” эркин иқтисодий зонаси ҳудуди билан танишишни таклиф қилиб, бу ерда плантациялар ташкил этиш ва ишлаб чиқаришни йўлга қўйиш учун барча шароитлар яратилганини билдирди.

Сулаймон Хартавиўғли шу куннинг ўзида Косонсой туманига бориб, эркин иқтисодий зонада яратилган шароитлар билан танишди. Компания томонидан туманда томчилатиб суғориш тизимини йўлга қўйиш бўйича ҳам яқиндан кўмак берилишини таъкидлади.

Оқилхон Дадабоев, Ҳотам Мамадалиев (сурат), ЎзА. uza.uz

@AGROBLOGER канали