...

Шу кунларда Германия пойтахти Берлин шаҳрида озиқ-овқат саноати, қишлоқ хўжалиги ва боғдорчилик бўйича йирик халқаро кўргазма – «International Green Week» – «Халқаро яшил ҳафталик» (“IGW-2020”) кўргазмаси давом этмоқда.

Унда Қишлоқ хўжалиги вазири Жамшид Хўжаев бошчилигидаги Ўзбекистон делегацияси ҳам қатнашмоқда. Бу ҳақда вазирлик матбуот хизмати Kun.uz’га маълум қилди.

«International Green Week» кўргазмасида дунё миқёсида озиқ-овқат, ўрмончилик ва ёғочни қайта ишлаш саноати, боғдорчилик, чорвачилик ҳамда паррандачиликда соҳасида эришилаётган ютуқлар намойиш этилади. 

Ўзбекистонлик мутахассислар кўргазмада иштирок этиш орқали Ўзбекистон қишлоқ хўжалиги, унинг табиий имкониятлари, туризм, иқтисодий ва экспорт салоҳияти, ўзбек пазандачилиги намуналарини намойиш этиш имкониятига эга бўлади.

Шунингдек, соҳадаги халқаро тажрибалар билан танишиш, Ўзбекистоннинг полиз ва боғдорчилик маҳсулотлари учун бозорлар топиш, дунёдаги етакчи компаниялар билан ҳамкорлик алоқаларини ўрнатиш имкони бор.

Матбуот хизмати хабарида айтилишича, кўргазма доирасида Жамшид Хўжаевнинг БМТ Қишлоқ хўжалиги ва озиқ-овқат ташкилоти (ФАО) бош директори Кью Донгью, Польша Қишлоқ хўжалиги ва қишлоқ ишлари вазири Ж.К.Ардановски, Нидерландия Қироллиги Қишлоқ хўжалиги, табиат ва озиқ-овқат сифати вазири К.Шоутен, Беларусь Республикаси Қишлоқ хўжалиги вазири А. Котко билан бир қатор учрашувлари белгиланган.

Ҳафталикда, шунингдек, Европанинг бир қатор нуфузли университетлари ректорлари, жумладан, Лайбниц университети президенти Волкер Эппинг билан ҳам қишлоқ хўжалиги соҳасида кадрлар етиштириш борасида икки томонлама ҳамкорлик қилиш масалалари муҳокама қилинади.

Тадбир доирасида бугунга қадар Ўзбекистон қишлоқ хўжалиги салоҳиятини акс эттирувчи бир қанча тақдимотлар ҳам ўтказилган.

«Халқаро яшил ҳафталик» ташкилотчилар жорий йилги кўргазмаларнинг кенг қамровли бизнес дастури бутун дунё бўйлаб қишлоқ хўжалиги маҳсулотлари ишлаб чиқарувчилари ва харидорлари ўртасида ўзаро манфаатли алоқаларни ўрнатишда муҳим восита бўлаётганини таъкидламоқда.

Маълумот учун, бу халқаро кўргазма илк бор 1926 йилда Берлиндаги “Messe Berlin GmbH” ширкати кўмагида ташкил этилган ва бу йил 85-бор ўтказилмоқда.

«Халқаро яшил ҳафталик» кўргазмасида Ўзбекистон вакиллари ҳам бир неча йиллардан буён иштирок этиб келади.

kun.uz

@AGROBLOGER