...

Шафақни йўргаклар булутлар,

Туманнинг кўзлари саросар...

Кўзингда мўъжаз бир тароват

Оламга етгулик нур сочар.

Тимдалаб юлдузлар юртини,

Кўзимга боғлайман рўёни,

Сен келсанг ечилар дилимнинг

Сукутдан тўқилган рўмоли.

Кезинар апрелги сабодай

Самонинг илоҳий еллари.

Кўнглимга занжирлаб қўйган У

Қалбининг қандайдир ерларин.

Истило хотима эмаску,

Қиш тилар баҳорнинг бўйларин.

Коинот оқликка менгзайди

Ҳар тонгда бир жуфт "Оҳ" унларин.

Дардимнинг дардини билсайдим,

Куларди бахтимнинг бахти ҳам,

Бир шунга тутинай,тутиб бер

Ишқимнинг Ишқидан бир тутам!..

06.04.2020

***

Мезонлар рақсига лаб босган Ситор

Кўзлари кўзимга санчилди бу тун.

Фаромуш тилсимлар ҳароратидан

Туб-тубим эриди-Ўзландим бутун.

Турналар сололмай кетган тизгинга

Руҳимни тортқилаб кетди кавокиб.

Тупроқ само билан алмашганидай

Хаёллар рўёни ташлади букиб...

Феруза ранг ичра товланиб,интиқ

Етиб борар экан манзилга сужуд,

Олтин чилтор чалган ҳаёт куйидай

Борлиққа тарқалиб кетаркан вужуд.

Йўқликнинг тубидан келди бир садо-

Борлиқнинг овози эди,шубҳасиз:

"Бари мавжуд бунда,бари мухтасар,

Тинглай билсанг агар ҳайқирмай,сассиз..."

ТИРГАК ТОШ

Кадарлар сиғинган илоҳий дилроз,

Ажаб,кўзларингдан тўкилмиш бетин...

Йўқотган борларинг эмас,сарафроз,

Ёлғиз қолдирмаган ҳечларинг- олтин!..

Чўкинди ҳисларни чаёлмас бардош,

Харсангга эврилди ўчган чўғлар-да...

Ниҳолларга тиргак бўлган асрий тош

Энди отилишни истайди...Зада...

Нега ўксинасан,шунчаки,ёш тўк,

Олтин чилторгинам,бахтнинг муқаррар!

...Букун столимда қора сиёҳ йўқ,

Ёзарман оқ сиёҳ битгунга қадар!..