...

Хозирги шароитда мамлакатимиз иқтисодиётининг барқарорлиги ва валюта захиралари ўсишининг муҳим шартларидан бири маҳаллий қишлоқ хўжалиги маҳсулотлари етиштириш ва ташқи бозорларга экспорт қилиш ҳисобланади.

Бугунги кунда дунё бозорларида органик мева-сабзавот маҳсулотларига талаб юқори. Уни етиштиришда замонавий агротехнологиялар ва сифатли биоорганик ўғитлардан фойдаланиш катта самара беради.

Ўзбекистон Республикаси Қишлоқ хўжалиги вазирлиги кўмаги билан «BMB trade group» компанияси кузатув кенгаши раиси Бекзод Маматқулов ва «ADAGA Food and Consulting Co.» (Туркия) раҳбари Зеки Юсуфоғлу ўртасида мамлакатимизда биоорганик ўғитларни қўллаш истиқболлари юзасидан музокара ўтказилди. Учрашувнинг эртасига Туркия делегацияси Жиззах вилояти Aрнасой туманида жойлашган «BMB Agro Trade» шўъба корхонасида бўлиб, унинг фаолияти билан танишди.

Мулоқотнинг мантиқий якуни сифатида томонлар ўртасида қўшма фаолият ҳақида келишув имзоланди. Унга кўра, Жиззах вилоятида илк бор Туркиядан олиб келинган биоорганик ўғитлар самарасини текшириш учун қишлоқ хўжалиги маҳсулотлари етиштириш тажриба майдонлари ташкил қилинади.

Туркиянинг «ADAGA Food and Consulting Co.» компанияси 2011 йилда ташкил қилинган, хитозан асосида биоорганик ўғитлар ишлаб чиқариш билан шуғулланади. Компанияда юқори малакали муҳандис, кимёгар ва агрономлар ишлайди, биоорганик маҳсулотларини Ўзбекистонга ҳам етказиб беришни режалаштирмоқда.

«BMB Trade Group» компанияси эса юртимиз бозорида хорижий сармоялар иштирокидаги лойиҳаларни муваффақиятли амалга ошириш, хорижий компанияларга консалтинг хизмати кўрсатиш билан танилган.

Келишувга кўра, инвестор биоорганик ўғитларнинг синов партиясини ажратиб, тажриба участкасида туркиялик агрономлар фаолиятини йўлга қўяди, лаборатория тадқиқотларини молиялаштиради.

Текширув натижалари асосида томонлар Ўзбекистон Қишлоқ хўжалиги вазирлиги билан биргаликда Туркияда ишлаб чиқарилган биоорганик ўғитларни қўллаш борасида тўпланган тажрибани мамлакатимиз қишлоқ хўжалиги соҳаси вакилларига етказиш учун амалий семинарлар ўтказади.

Телеграм: @petrochemagro_uz

petrochem.uz

ЎзА, uza.uz