Forbes журналининг 2021 йил март ойида берган маълумотига кўра, Россия Федерациясининг энг бой аёли ким эканлигини биласизми? Бу тадбиркор аёлнинг исми- шарифи Татяна Владимировна Бакалчук. У Wildberries- Россия- халқаро интернет-магазини асосчиси ва бош директори. Ташаббускорлиги, қатъиятлиги, мақсадга эришиш учун тинмасдан меҳнат қилиши туфайли Татяна Владимировна кўп миллиард долларлик бойликка эга бўлди. Бу тадбиркор аёл Россия бизнес оламида юқори чўққисига ресурсларни сотиб эмас, балки янги инновацион ғояларни ҳаётга татбиқ этиш туфайли кўтарилди.
Биз сизга бир неча миллиард долларлик сармояга эга, жозибали Татяна Владимировна Бакалчук ҳақида ҳикоя қилишни ният қилдик.
Ёшлиги.
Асли корейс миллатига мансуб бўлган Татяна Бакалчук (Ким) 1975 йил Москва вилоятининг Газопровод шаҳарчасида туғилган. 1992 йил ўрта мактабни тугатиб, Москва вилояти ижтимоий- гуманитар олийгоҳига ўқишга кирди. Олийгоҳни 1997 йилда тугатиб инглиз тилидан сабоқ бера бошлади.
Тадбиркорлик фаолияти.
Татяна турмушга чиққанидан сўнг, 2004 йил фарзандлик бўлди. Ёш бола билан педагогик фаолият олиб бориш қийинчилик туғдиргани сабабли, интернет орқали кийим- кечак ва пойабзал сотишга қарор қилди. У харидорларга Германиянинг «Otto» ва «Quelle» каталогидаги маҳсулотларни тавсия қилишдан бошлади.
Оилавий бизнесни ривожига Татянанинг турмуш ўртоғи Владислав Бакалчук ҳар томонлама ёрдам берди. Улар биргаликда 2005 йилда Wildberries (Вайлдберриз) компаниясига асос солдилар. Ҳозирги вақтда улар Россия Федерациясида энг катта онлайн-дўконларга эгалик қиладилар. Компаниянинг бош офиси Москва вилоятининг Милково қишлоғида жойлашган.
Wildberries компанияси кунида 20 мингга яқин буюртма қабул қилади. Бир ойлик мижозлар сони 17 миллиондан ортиқ. Эътиборли томонларидан бири компанияда директорлар кенгаши назарда тутилмаган. Умуман раҳбарлар сони камчиликни ташкил этади. Wildberries ходимларининг аксарияти компанияда асос солингандан бери меҳнат қилишади. Компаниядаги барча жараён; ходимларини ишга келиши, ишдан сўнг кетиши, меҳнат фаолияти, савдо- сотиқ мунтазам назорат қилинади. Компания дам олиш кунисиз ишлайди. Wildberries ўз фаолиятини самарали реклама қила олган. Компания сайтида ҳар куни буюртма ва харидорлар сони ва маҳсулотлар тури кўрсатилиб борилади. Россия Федерациясининг аксарият ҳудудларига буюртмалар етказиб бериш текин. Буюртмаларнинг тахминан 40 фоизини мижозларнинг ўзи олиб кетади. Мижозларга қулайлик яратиш учун Россия Федерацияси ҳудуди бўйича етти юздан ортиқ буюртмаларни тарқатиш шаҳобчалари ташкил этилган. Бундай шаҳобчаларнинг сони яна 100 -150 тага ошириш режалаштирилган. Wildberries ўз фаолиятини бошлаган вақтда асосан кийим- кечак, пойабзал, уй жихозлари ва бошқа саноат маҳсулотларини савдоси билан шуғулланган бўлса, ҳозирги вақтга келиб электроника, парфюмерия, спорт товарлари, китоблар ва бошқа турдаги маҳсулотларни ҳам етказиб беришни йўлга қўйган.
Таҳлилчиларнинг фикрича Татяна Бакалчукнинг бизнесда катта муваффақиятларининг асосий сабаблардан бири , ХХI – асрнинг бошларида онлайн- савдо ташкил этишда рақобат кучли бўлмаганлиги билан тушунтириш мумкин. Ҳозирги вақтда бу йўналиш бўйича рақобат жуда кучайган, Data Insight агентлигини берган маълумотига қараганда ҳозирги вақтда Россия Федерациясида 2 мингдан кўп компания онлайн- савдо йўналишида фаолият олиб бормоқда.
2017 йилга келиб Wildberries пул айланмаси 47,5 миллиард рублга етди. Соф фойда эса 1,5 миллиард рублдан ошди.
Forbes журналининг 2020 йил 20 февралдаги маълумотига кўра Татяны Бакалчук 1,4 миллиард долларга тенг бойлиги билан Россия Федерациясининг энг бой аёллари рўйхатига карвонбошиликни ўз қўлига олди. Аввалги пешқадам Елена Батуринанинг бойлиги 1,2 миллиард долларга баҳоланди.
Бакалчукнинг бойлиги 2020 йилда, 2019 йилга нисбатан 400 миллион долларга ошган. Шу давр ичида Wildberries компаниясининг пул айланмаси 88 фоизга ошиб, 223,5 миллиард рублга етди. Етказиб берилган маҳсулотлар тури 1,8 миллиондан 3,6 миллионга ошган. Бир йил ичида бажарилган буюртмалар сони икки бараварга ошиб, 164 миллионга етди. Шунингдек, Татяны Бакалчук раҳбарлик қилаётган Wildberries компанияси Россия Федерацияси бўйича онлайн-савдо билан шуғулланувчи компаниялар орасида 1- ўринга чиқиб олди. Иккинчи ўринда «Аэрофлот» (221 миллиард рубль), учинчи ўринда AliExpress (201,4 миллиард рубль).
Wildberries асосчиси Россия Федерациясининг энг бой аёллари рўйҳатига биринчи бор 2018 йилда киритилди. У даврда Татяны Бакалчукнинг бойлиги 600 миллион долларга баҳоланган эди.
Татяна Бакалчук 2021 йилда 12 февралда - «Стандарт-кредит» банкнинг 100 фоиз улушини сотиб олди.
Forbes журналининг 2021 йил 3 март кунидаги маълумотига кўра Татяна Бакалчук 14,5 долларга тенг бойлиги билан Россия Федерациясининг энг бой аёллар рўйхатида пешқадамлик қилмоқда.
Оила.
Татяна ва унинг турмуш ўртоғи Владислав Бакалчук уч нафар фарзандлигини вояга етказишмоқда. Шуни таъкидлаб ўтиш керакки, Владислав Татяна билан инглиз тилидан сабоқ олиш даврида танишган.
