ᅠᅠ

ПУЛ ТОПИШНИНГ ЕТТИ ҚОИДАСИ. 

Вавилонда олиб борилган қурилиш ишлари тугагандан сўнг, қурилишда ишлаган кўплаб одамлар ишсиз, яшаш учун маблағсиз қолдилар. Йиғиб қўйган маблағлари ҳам тез кунда тугай бошлади. Шаҳарда молиявий инқироз хавф сола бошлади. Шундай қалтис вақтда шаҳар ҳукмдори буюк Саргон, Вавилоннинг энг бой одамларидан бири Арқадга аҳолига топган маблағидан унумли фойдаланиш қоидаларини ўргатишни илтимос қилди. Арқад шаҳар аҳолисига фаровон ҳаёт кечиришни етти қоидасини тушунтирди.

Биринчи қоида. Сарф-харажатни тежаб, маблағ тўплашни бошланг. 

Ушбу қоидани Арқадга устози Алгамиш ўргатган.

Хар қандай иш маълум миқдорда маблағ олиб келади. Топган маблағингизни ўндан бир қисмини четга олиб қўйинг. Буни иложи борича тезроқ бошланг. Сизга топган маблағингизни ўндан тўққиз қисми етади. Ҳаётингиз ижобий томонга ўзгара бошлайди. Тўплаган маблағингизни фойдали ишга сармоя қилиб киритинг. Шунда киритган сармоянгиздан ҳам маълум миқдорда маблағ келиб туради. Натижада, одамнинг ҳаёти янги поғонага кўтарилади. Куч ва иштиёқ пайдо бўлади.

Иккинчи қоида. Харажатларни назорат қилинг.

Арқадни тинглашга келган одамлар ҳар хил даромад топишган ва яшаш шароити ҳам хар хил бўлган эди. Уларнинг аксарияти камбағал эди. Чунки улар қанча кўп пул топишмасин харажатлари ҳам шунга яраша бўлган. Уларнинг истак ва эҳтиёжлари имкониятларидан баланд бўлган. Қанчалик кўп пул топилмасин ҳамма истакларни қондира олмаганлар. Шунинг учун Арқад уларга қуйидагиларни маслаҳат берди:

Зарур ва зарур бўлмаган нарсаларни ажратиб олиш керак. Шундан келиб чиққан холда истак ва эҳтиёжларингиз рўйхатини тузинг. Кейин ушбу рўйхатдан устуворларини танланг. Қолганларини четроққа суриб туринг, уларга келажакда қайтиб келасиз. Ўзингизнинг маблағингизни асосий эҳтиёжларингизга қараб режалаштиринг, аммо ҳар ўндан бирига тегманг. Пулни иқтисод қиламан деб ўзингиз ва оилангизни ҳамма нарсадан чеклаш шарт эмас.

Учинчи қоида. Маблағингизни оширинг. 

Маблағ - бойликка биринчи қадам. Агар пул бўлса — бу ёқимли, аммо пул бир четда ётса, у ўлик юк. Фойда олиш мақсадида сармояни ишончли лойиҳага киритинг. Агар сармоянгиз сизга фойда келтира бошласа бу сизнинг жамғармангиз барқарор ошиб бораётганлигини англатади. Шундай давом этса, сиз ўзингиз ёқтирган нарса билан шуғулланишингиз мумкин. Масалан дам олиш, саёҳат қилиш. 

Тўртинчи қоида. Маблағингизни йўқотишдан сақланинг. 

Катта бойлик ваъда қилувчи фирибгарлардан эҳтиёт бўлинг. Пухта режалаштирмаган, шубҳали лойиҳаларга аралашманг. Сармоя киритишни асосий қоидаси хавфсизликдир. Маблағ ишончли ҳимоя ва хавфсизликка муҳтож. Дўстларингиз ва қариндошларингиз сизни шубҳали лойиҳаларга жалб қилсалар ҳам, уларга берилманг. Аввал сармоя киритадиган лойиҳани истиқболини яхшилаб ўрганиб чиқинг. Бу лойиҳани иштирокчилари кимлар, уларнинг обрў-эътибори, малакаси қандайлигини аниқланг.

Сармояни хавфсиз лойиҳага киритишдан аввал шу соҳа мутахассислари билан маслаҳатлашиб кўринг. Арқад йиғилган ҳамшаҳарларига, ёшлигида тажрибасизлик қилиб қимматбаҳо тошлар савдоси билан шуғулланишни ният қилгани, бу соҳадан мутлақо хабари бўлмаган ғишт терувчига ўз маблағларини ишониб топширгани ва касодга учрагани ҳақидаги воқеани мисол сифатида гапириб берди. 

Бешинчи қоида. Ўз уйингизнинг эгаси бўлинг. 

Вавилон аҳолисини аксариятини шахсий уйи бўлмаганлиги сабабли катта ҳақ тўлаб ижарага олинган уйларда яшаган. Арқад уларга қуйидагиларни маслаҳат берди. Насияга уй сотиб олинг. Топган маблағингизни ўндан бир қисмини четга олиб қўйиб йиғилган жамғармангиз уй тўловига кафолат бўлади. Сиз яшаган уй эгасига тўлаган ижара ҳаққини энди насия қарзларингизни тўлашга сарфланг. Шунга сиз ўз уйингиз учун пул тўлаётган бўласиз. Инсонни ўз уйи бўлса уни ободонлаштиришга ҳаракат қилади.

Олтинчи қоида. Ўзингиз ва оилангиз келажагини таъминланг.

Кексаликни муносиб кутиб олишга ҳаракат қилинг.

Сиздан кейин ҳам оила аъзоларингиз қийналиб қолиши керак эмас. Қашшоқ қарилик бу - фожиа. Сармоя киритган лойиҳангиздан, сиз ишламаган тақдирингизда ҳам маблағ келиб туришини режалаштиринг. Иложи бўлса кўчмас мулкка сармоя киритинг. Омад кулиб боқса сизни ва оила аъзоларингизни фаровон келажаги таъминланади. 

Еттинчи қоида. Пул топишни янги имкониятларини қидиринг.

Агар сиз кўпроқ пул ишлашни хоҳласангиз, бу сиз аллақачон бой бўлиш йўлида эканлигингизни англатади. Аммо сиздаги хоҳиш аниқ ва ўзингизга хос бўлиши керак. Мавҳум нарсалар ҳақида орзу қилманг ва дарҳол кўп нарсага эришиш ҳақида ўйламанг. Чалғиманг ва бир неча ишни кетидан қувманг. Ўз ҳунарингиз, касбингиз ёки ишингизни янада такомиллаштиринг. Қатъиятли ва ғайратли бўлинг, шунда сизнинг ишингиз албатта тақдирланади. Янги воситаларни ва иш усулларини изланг. Ҳамкасблар билан тажриба алмашинг, бир дақиқа ҳам тўхтаманг.

Арқад ҳамшаҳарларига юқорида баён этилган қоидалардан ташқари қуйидагиларга амал қилишни тавсия қилди: 

- Олинган қарзни вақтида қайтаринг.

- Оилангизга эътиборли бўлинг.

- Меросни адолатли тақсимланг.

- Ёрдамга муҳтож бўлган инсонларга имкон қадар ёрдам беринг.

Пул жуда кўп, ҳаммага етади. Фақат уни қўлга киритиш учун ҳеч нарсадан қўрқмасдан олдинга интилинг. Кўп йиллик тажриба ва малакадан келиб чиқиб баён этилган кўрсатмаларини синаб кўринг. 

БОЙЛИК ОРТИРИНГ ВА УНИ КЎПАЙТИРИНГ! СИЗГА ОМАД ТИЛАЙМИЗ!