Қуёш супербўрони бутун сайёрамиз бўйлаб электрон қурилмаларни ишдан чиқариши мумкинлиги айтилди

Kun.uz

АҚШнинг Атмофсера тадқиқотлари миллий маркази олимларининг фикрича, яқин орада Қуёшда суперчақноқ юз бериши ва юлдуз сиртида кучли термоядровий портлаш оқибатида сунъий йўлдошлар ва Ердаги электрон қурилмаларни йўқ қилишга қодир қуёш нурланишининг кучли оқими кузатилиши мумкин. Бу ҳақда Business Insider нашри маълум қилди. Олимларнинг таъкидлашича, инсоният ҳанузгача бундай ҳодисалардан ҳимояланиш ва уларши қарши туришнинг самарали воситаларини ярата олмаган.  

Олимларнинг айтишича, қуёш фаоллигининг пасайишига қарамай, бундай портлаш оқибатлари фалокатли бўлиши мумкин – юз берадиган янги геомагнит бўрон тарихда қайд қилинган энг кучлиси – 1859 йилдаги қуёш супербўронидан ҳам кучлироқ бўлиши мумкин. Ўшандаги электромагнит бўрон оқибатида бутун дунё бўйлаб телеграф ва радиоалоқа ишламай қолган.

2012 йилда ҳам Қуёш Ерни шундай “ўққа тутганди”, бироқ электромагнит бўрон сайёрамиз олдидан ўтиб кетган. Бироқ яқин йилларда сайёрамизни “нишонга бехато урадиган” қуёш бўрони юз бериши мумкин. 

Олимларнинг айтишича, инсонларнинг электрон тизимлар ва сунъий йўлдошларга жиддий боғлангани сабабли бундай супербўрон етказадиган зиён 2 трлн долларни ташкил қилиши мумкин. Бундай электромагнит бўрон “қурбонлари” нафақат сунъий йўлдошлар ва навигация, балки электрон қурилмалар ҳам бўлиши мумкин.